ولار «پاكىستان, اۋعانستاننان كەت», «اۋعان ازاماتتارىن ءولتىرۋدى دوعارىڭدار», ء«بىز احماد ماسۋدتى جاقتايمىز» جانە «قارسىلىق جاساسىن» دەپ ۇرانداتتى.
نارازىلىق اكتسياسىنا قاتىسۋشىلار وزودي راديوسىنا ولاردى ەلدىڭ بولاشاعى تولعاندىراتىنىن, پاكىستاننىڭ اۋعانستاننىڭ ىشكى ىسىنە ارالاسۋىنا الاڭدايتىنىن ايتتى. پاكىستان تاليباندى قولدايتىنىن, اۋعانستاننىڭ ىشكى ىسىنە ارالاسقانىن ۇنەمى جوققا شىعارىپ كەلەدى. الايدا اۋعان ەلشىلىگى الدىندا بەيبىت ميتينگ وتكىزگەندەر پاكىستاننىڭ تىكەلەي ارالاسۋىمەن تالىپتەر شابۋىلعا كوشىپ, رەسمي كابۋل جەڭىلىسكە ۇشىرادى دەپ ەسەپتەيدى.
ولار حالىقارالىق قاۋىمداستىقتى تاليبان ۇكىمەتىن مويىنداۋدان باس تارتۋعا, سونىمەن بىرگە احماد ماسۋد پەن ۇلتتىق قارسىلىق مايدانىن قولداۋعا شاقىردى. «تاليبان امىرلىگىن مويىنداۋ - حالىقارالىق قاۋىمداستىقتىڭ تەرروريزمدى مويىنداۋىمەن بىردەي», دەپ مالىمدەدى اكتسياعا قاتىسۋشىلاردىڭ ءبىرى.
«اۋعانستاننىڭ تاجىكستانداعى ەلشىسى مۇحامماد زوحير اگبار تاليبان امىرلىگى ۇكىمەت بيلىگىن ورناتىپ, مەملەكەتتى باسقارا المايدى دەپ ەسەپتەيدى. ونىڭ ايتۋىنشا, تالىپتەر ايەلدەردىڭ جۇمىس ىستەۋ جانە ءبىلىم الۋ قۇقىعىن قۇرمەتتەمەيدى», دەپ جازادى ورتالىق ازيانىڭ جاڭالىقتار قىزمەتى.
