قازاقستان ترياتلون فەدەراتسياسىنىڭ مالىمەتىنشە, جارىسقا نۇر-سۇلتان, الماتى, شىمكەنت, اقمولا, قوستاناي جانە تۇركىستان وبلىستارىنان كەلگەن ءتۇرلى ساناتتارداعى 95 سپورتشى قاتىستى. سپورتشىلار 300 م ءجۇزۋ, 8 كم ۆەلودودا مەن 2 كم جۇگىرۋ بويىنشا ءوزارا مىقتىنى انىقتادى.
الماتىلىق انۋار تۋرۋباەۆ قارسىلاستار الدىندا مىقتىلىعىن تاعى دا دالەلدەدى. ول Elite ساناتىندا 24:31 ناتيجەسىمەن توپ جاردى. ودان ەكى مينۋتتاي جەڭىلگەن سەمەن پيۆوۆاروۆ (قوستاناي وبل.) ەكىنشى ورىننان كورىندى. بۇل ساناتتاعى قىزدار اراسىندا سايىس الاڭىنا تەك داريا بىچكوۆا شىعىپ, 29:43 ناتيجەسىمەن سايىستى ءتامامدادى.
«اندەر» ساناتتارىنداعى سپورتشىلار اراسىندا باسەكەلى سايىس ءوتتى. U15 ساناتىنداعى قىزدار اراسىندا ءوزىنىڭ تىڭعىلىقتى دايىندىعىن 28:06 ۋاقىتىمەن ديانا ەرجانوۆا كورسەتتى. استانالىق ترياتلون فەدەراتسياسىنىڭ شاكىرتى ديانانىڭ وسى جىلى بارشا رەسپۋبليكالىق دودالاردا جەڭىسكە جەتكەندىگىن ايتا وتكەن ءجون. ەكىنشى جانە ءۇشىنشى ورىنداردى اقمولا وبلىسىنىڭ سپورتشى قىزدارى يۋليانا پەتروۆا (29:46) مەن انەل يساباەۆا (30:02) جەڭىپ الدى.
بۇل ساناتتاعى ەرلەر اراسىندا 26:07 ۋاقىتىن كورسەتكەن استانالىق الينابي مارالبەكوۆ التىن الدى. كۇمىس جۇلدەنى اقمولالىق تيمۋر باكيروۆ (26:39) جەڭىپ السا, قولا جۇلدە تاعى ءبىر استانالىق قۋانىش بەكەنوۆتىڭ (26:41) قانجىعاسىندا كەتتى.
U17 ساناتىنداعى قىزدار اراسىندا تاعى ءبىر استانالىق سپورتشى ەۆا پينچۋك (30:21) جەڭىسكە جەتتى. ەكىنشى ورىندا وتىز سەكۋندقا قالىپ قويعان اناستاسيا زاحاروۆا (اقمولا وبل.) بولسا, ءۇشىنشى ورىندا – الماتىلىق ميلەنا ساپرينا (31.04). U17 ساناتىنداعى بارلىق ەرلەر اراسىندا مارەگە ءبىرىنشى بولىپ كوكشەتاۋلىق ارلان جاڭاباي (25:15) جەتتى. قوستانايلىق رۋسلان بەكەنوۆ (25:43) ەكىنشى اتانسا, استانالىق الي جانات (25:47) ءۇشىنشى بولدى.
U19 ساناتىنداعى قىزدار اراسىندا التىندى جاسوسپىرىمدەر قۇراماسىنىڭ مۇشەسى ارۋجان امانجولوۆا (تۇركىستان وبل.) 30:46 ۋاقىتىمەن الىپ كەتتى. ەكىنشى ورىندا شىمكەنتتىك حافيزا گۋلتۋراەۆا (31:21). وسى ساناتتاعى ەرلەر اراسىندا ۇزدىك ۇشتىك اتانۋ باسەكەسىندە الماتىلىق سپورتشىلار ناعىز ۇزدىك ناتيجە كورسەتتى. مارەدەگى كۇرەستى 23:41 ۋاقىت كورسەتكەن دانيل پورودنوۆ جەڭىپ الدى. ەكى سەكۋند قانا كەشىككەن الەكساندر تەن كۇمىس جۇلدەگەر اتانسا, ءبىر سەكۋندتان كەيىن مارە كەسكەن ەگور كرۋپياكوۆ قولا جۇلدەنى قاناعات تۇتتى.
23 جاسقا دەيىنگى ساناتتا سايىسقا شىققان يۋليا وزەروۆا 28:01 ۋاقىتىمەن مارەگە جەتتى. اليحان ابۋسەيت (شىمكەنت) U23 ساناتىنداعى سايىستى جەڭىپ الدى (24:06). الماتىلىق كيريلل روجكوۆ (24:41) ەكىنشى ورىننان كورىنسە, تۇركىستاندىق ەراسىل امانجولوۆ جەڭىمپازعا ەلۋ سەكۋند ۇتىلىپ, ۇشتىكتى قورىتىندىلادى.
