ءبىلىم • 19 قىركۇيەك، 2021

جىل سوڭىنا دەيىن 37 جاتاقحانا پايدالانۋعا بەرىلەدى

43 رەت كورسەتىلدى

 

جىل سوڭىنا دەيىن 37 جاڭا ستۋدەنتتەر جاتاقحاناسى پايدالانۋعا بەرىلەدى، دەپ جازادى Egemen.kz.

سونىمەن قاتار سوڭعى ءۇش جىلدا ءۇشىنشى الەۋمەتتىك باستاما شەڭبەرىندە ەلىمىزدە 85 جاڭا جاتاقحانا ىسكە قوسىلىپ، 22 مىڭنان استام ستۋدەنت قونىستاندى. 

«مينيسترلىك ەلباسىنىڭ ءۇشىنشى الەۋمەتتىك باستاماسىن ىسكە اسىرۋ اياسىندا ستۋدەنتتەر جاتاقحانالارىن سالۋ مەن قايتا قۇرۋ قارقىنىن جەدەلدەتۋدىڭ جاڭا تەتىكتەرىن ازىرلەدى. اتاپ ايتقاندا، جاتاقحانالار نىسانالى قۇرىلىس جانە جوعارى وقۋ ورىندارىنىڭ ءوز قاراجاتى ەسەبىنەن، سونداي-اق مەملەكەتتىك-جەكەمەنشىك ارىپتەستىك قاعيداتى بويىنشا سالىنادى. ياعني، ينۆەستورلار ءوز قاراجاتىنا جاتاقحانا سالادى، ال مينيسترلىك ولارعا مەملەكەتتىك تاپسىرىستى ورنالاستىرىپ، ستۋدەنتتىڭ ءاربىر جاتىن ورنىن تولەيدى»، دەپ اتاپ ءوتتى قر بعم قارجى ورتالىعىنىڭ پرەزيدەنتى اسقار يبرايموۆ.

مۇنداي الگوريتم ستۋدەنتتىك جاتاقحانالار سانىن ەداۋىر ارتتىرۋعا جانە ستۋدەنتتەردىڭ ءومىر ءسۇرۋ جاعدايلارىن جاقسارتۋعا مۇمكىندىك بەردى.

قۇرىلىس جۇمىستارى نۇر-سۇلتان قالاسىندا، قىزىلوردا، قاراعاندى، شىعىس قازاقستان، جامبىل جانە ماڭعىستاۋ وبلىستارىندا بەلسەندى جۇرگىزىلىپ جاتقانىن ايتا كەتكەن ءجون.

نۇر-سۇلتان جانە الماتى قالالارىندا جەكە ينۆەستورلاردى قوسىمشا ىنتالاندىرۋ ءۇشىن مەملەكەتتىك تاپسىرىس كولەمىن 47 اەك-تەن 92 اەك-كە دەيىن ۇلعايتۋ مۇمكىندىگى قاراستىرىلىپ جاتىر. بۇل قالالاردا جاتاقحانالارعا اسا قاجەتتىلىك بايقالادى. سونداي-اق قازىرگى ۋاقىتتا مەملەكەتتىك تاپسىرىستى ورنالاستىرۋ مەرزىمىن 8 جىلدان 5 جىلعا دەيىن قىسقارتۋ جونىندە ۇسىنىس ازىرلەندى.

جوعارى وقۋ ورىندارى مۇمكىندىكتەرىنە قاراي ءوز قاراجاتى ەسەبىنەن جاتاقحانا سالادى. كەيبىر وقۋ ورىندارى تۇرعىن ءۇي، جاتاقحانالار مەن قوناق ۇيلەردى جالعا الۋ ارقىلى ستۋدەنتتەردىڭ تۇرعىن ۇيگە دەگەن قاجەتتىلىگىن تومەندەتىپ جاتىر. بۇگىنگى تاڭدا 13 جوو 5 مىڭ ستۋدەنتى ءۇشىن جاتىن ورىنداردى جالعا الدى. كەلەسى جىلى 60-قا جۋىق ستۋدەنت ءۇيى پايدالانۋعا بەرىلەدى دەپ جوسپارلانىپ وتىر.

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار