«ەل استاناسى نۇر-سۇلتان قالاسى مەن وڭىرلەردى «ساۋلەلى پرينتسيپ» بويىنشا بايلانىستىراتىن جوعارى جىلدامدىقتى 4 جولاقتى اۆتوماگيسترال قۇرىلىسى جالعاسادى.
كوكشەتاۋ, پاۆلودار جانە قاراعاندى باعىتىنداعى جۇمىستار اياقتالدى. قازىرگى ۋاقىتتا قۇرىلىس جۇمىستارى قاراعاندىدان قاپشاعايعا دەيىنگى ۋچاسكەدە ىسكە اسىرىلۋدا. بيىل ۇزىندىعى 363 شاقىرىم بولاتىن قاراعاندى-بالقاش ۋچاسكەسىندەگى نەگىزگى جۇمىستاردى اياقتاۋ كوزدەلگەن», دەدى بەرىك كاماليەۆ ورتالىق كوممۋنيكاتسيالار قىزمەتىندەگى ءباسپاسوز ءماسليحاتى بارىسىندا.
ونىڭ اتاپ وتۋىنشە, ۇزىندىعى 288 شاقىرىم بولاتىن «بالقاش-بۋرىلبايتال» ۋچاسكەسىن رەكونسترۋكتسيالاۋ جۇمىسىنا كوروناۆيرۋس پاندەمياسى كەرى اسەرىن تيگىزدى. ياعني, جەكەلەگەن شەتەلدىك كومپانيالار جۇمىسىن جالعاستىرا المادى. دەگەنمەن, قازىرگى ۋاقىتتا حالىقارالىق قايتا قۇرۋ جانە دامۋ بانكى قارجىلاندىراتىن بۇل جوبانى باسقا مەردىگەرلەر قولعا الىپ, جۇمىس ىستەپ جاتىر.
«جالپى, مەملەكەت باسشىسى تاپسىرعانداي, قاراعاندى-بالقاش-الماتى ءدالىزىن تولىقتاي 2023 جىلى اياقتايمىز», دەدى ۆيتسە-مينيستر.
