DELOS امەريكالىق حالىقارالىق دىبىس جازۋ كومپانياسى الەمدە 40 جىلدان استام ۋاقىت بويى جۇمىس ىستەپ كەلەدى. ونىڭ جازبالارى بىرنەشە رەت گرەممي سىيلىعىنا ۇسىنىلعان. سونىمەن بىرگە ايتۋلى جوباعا ليتۆالىق سوليستەر دە قاتىستى. جازباعا باستاماشىلىق تانىتقان نيۋ-يورك قالالىق وپەراسىنىڭ جاڭادان تاعايىندالعان مۋزىكالىق جەتەكشىسى, ايگىلى ديريجەر كونستانتين وربەليان.
− ەل تاريحىندا العاش رەت ۆ.بەللينيدىڭ «پۋريتاندار» وپەراسىنا قاتىسىپ, بىرەگەي اۋديوديسكىنى جازۋ – مەن ءۇشىن ۇلكەن تاجىريبە بولدى. تانىمال كوۋچ, ديريجەر دجون فيشەرمەن جۇمىس ىستەۋ ءۇشىن ءبىر اپتا ەرتە كەلدىم. جازۋ بارىسى اسقان دالدىكپەن جۇرگىزىلدى, ول ءتورت بولىمنەن تۇردى. تۋىندىنى جازۋ, شامامەن ەكى اپتاعا سوزىلسا دا, ءبارى دە كوڭىلىمنەن شىقتى. الەمدە بەللينيدىڭ «پۋريتاندار» وپەراسى جازباسىنىڭ ءبىرلى-جارىم نۇسقالارى بار. بۇل شىعارما – وپەرا ونەرىنىڭ شىڭى, بەلكانتو جاۋھارى, سوندىقتان ءانشىنىڭ شەبەرلىگى مىقتى بولۋى كەرەك, سەبەبى بەلكانتو – ۆوكالدىق تەحنيكانى مەڭگەرۋدىڭ ەڭ بيىك كورسەتكىشى, − دەپ اتاپ ءوتتى ازامات جىلتىركوزوۆ.
شىنىن ايتقاندا, بۇل الەمدىك مۋزىكا ءۇشىن عانا ەمەس, وتاندىق وپەرا ونەرى ءۇشىن دە ايتۋلى وقيعا. ەكسكليۋزيۆتى ديسكىنىڭ مۇقاباسىندا دارىندى جەرلەسىمىزدىڭ ەسىمى جازىلادى. ەندى ازامات جىلتىركوزوۆ حالىقارالىق تاجىريبەسىن ءوز ەلىمىزدە پايدالانىپ, شەتەلدىك ارىپتەستەرىمەن بىرلەسىپ, قازاقستاندىق ورىنداۋشىلارمەن, ديريجەرلەرمەن ۇلتتىق وپەرا رەپەرتۋارىن جازۋعا نيەتتەنىپ وتىر.
