جامبىل وبلىسى بايزاق اۋدانىندا ورىن العان وقيعادان بارلىعى 118 جەكە مەنشىك جىلجىمايتىن م ۇلىك وبەكتىسى, ونىڭ ىشىندە 106 تۇرعىن ءۇي جانە 12 كوممەرتسيالىق وبەكت زارداپ شەكتى. ونىڭ ىشىندە 35 ءۇي مەن 12 كوممەرتسيالىق نىسان ايتارلىقتاي قيراعان. بۇگىنگى تاڭدا 12 مەردىگەرلىك ۇيىم قالپىنا كەلتىرۋ جۇمىستارىن قىزۋ جۇرگىزۋدە. بۇل تۋرالى وڭىرلىك كوممۋنيكاتسيالار قىزمەتى الاڭىندا وتكەن بريفينگتە جامبىل وبلىسى اكىمدىگىنىڭ قۇرىلىس باسقارماسىنىڭ باسشىسى ەرلان ورىنباەۆ ايتتى.
سونداي-اق, بريفينگكە بايزاق اۋدانى اكىمىنىڭ ورىنباسارى قايرات يسمايل, «كازنيسا» اق جۇيەلى تالداۋ, توتەنشە جاعداي, سەيسميكالىق باقىلاۋ زەرتحاناسىنىڭ باسشىسى سەرىك الداحوۆ تا قاتىسىپ, جۋرناليستەردىڭ سۇراقتارىنا جاۋاپ بەردى.
«بايزاق اۋدانى اكىمىنىڭ 28 تامىزداعى №114 وكىمىمەن تج-دان كەلتىرىلگەن زالالدى انىقتاۋ ءۇشىن كوميسسيا قۇرىلدى. بايزاق اۋدانىندا تج كەزىندە زارداپ شەككەن وبەكتىلەردى تەكسەرۋ جانە قالپىنا كەلتىرۋ ءۇشىن جەرگىلىكتى اتقارۋشى ورگاندار 5 جۇمىس توبىن قۇردى. ولاردىڭ قۇرامىنا قۇرىلىس باسقارماسىنىڭ, قازقسعزي, جوبالاۋ ۇيىمدارىنىڭ قىزمەتكەرلەرى جانە توتەنشە جاعداي قىزمەتكەرلەرى تارتىلدى. جۇمىس توپتارى تەكسەرۋ جۇرگىزدى جانە اقاۋلى ۆەدوموستار قۇراستىردى. ناتيجەسىندە, 8 نىسانعا قورىتىندى بەرىلدى», دەدى اۋدان اكىمىنىڭ ورىنباسارى قايرات يسمايل.
ال, وبلىستىق قۇرىلىس باسقارماسىنىڭ باسشىسى ەرلان ورىنباەۆتىڭ ايتۋىنشا, جەڭىل زاقىمدانعان 71 ءۇيدىڭ بۇگىندە 43-ءى قالىپقا كەلتىرىلدى.
«زارداپ شەككەن 4 الەۋمەتتىك نىسان بويىنشا اۋدان باسشىلىعى جەكە دارا توقتالىپ ءوتتى. ونىڭ ىشىندە الدىن الا دەرەكتەر بويىنشا اپاتتى جاعدايدا تۇرعان جىبەك جولى اۋىلىنىڭ №5 ورتا مەكتەبى ايتارلىقتاي زارداپ شەكتى. جەر ۋچاسكەسى انىقتالىپ, 150 وقۋ ورنىنا ارنالعان جاڭا مەكتەپ قۇرىلىسىنا جوبالىق سمەتالىق قۇجاتتارىن ازىرلەۋ باستالىپتى. 3 ۇيىم (ۇشبۇلاق جانە بازارباي نش, ۇشبۇلاق مپ) ازداپ زارداپ شەككەن. وندا قالپىنا كەلتىرۋ جۇمىستارى دەمەۋشىلىك قاراجات ەسەبىنەن جۇرگىزىلىپ جاتىر. بۇگىندە 12 مەردىگەرلىك ۇيىم, 23 تەحنيكالىق قۇرالدار مەن 185 جۇمىسشى قالپىنا كەلتىرۋگە كىرىسىپ كەتتى. ءبىرشاما جۇمىستارى بەل ورتاسىنا كەلىپ قالعان. ال قۇرىلىس جۇمىستارى ەكى اي كولەمىندە اياقتالادى دەپ جوسپارلانىپ وتىر», دەدى ەرلان ورىنباەۆ.
