جازعى لاگەردىڭ اشىلۋىنا ءماجىلىس دەپۋتاتى, ۇلتتىق ەرىكتىلەر جەلىسىنىڭ توراعاسى ۆەرا كيم, اقدم ازاماتتىق قوعام ىستەرى كوميتەتىنىڭ توراعاسى ماديار قوجاحمەت, «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ باسقارما توراعاسى اسىلبەك ەسەنباەۆ قاتىستى. ءوز سوزىندە ا.ەسەنباەۆ مەملەكەت باسشىسى قاسىم-جومارت توقاەۆتىڭ باستاماسى بويىنشا قازاقستاندا 2020 جىل ۆولونتەر جىلى دەپ جاريالانعانىن اتاپ ءوتتى. «پرەزيدەنت ۆولونتەرلىكتى تەك ۇلتتىق دەڭگەيدە عانا ەمەس, ءاربىر قالا مەن اۋىلدا دامىتۋ قاجەتتىگىن بىرنەشە رەت ايتتى. بۇل مەملەكەتتىڭ ۆولونتەرلىك ينستيتۋتىن جۇيەلى, جاڭا دەڭگەيگە شىعارۋعا مۇددەلى ەكەنىن بىلدىرەدى. ول ءۇشىن بىزدە ۇلكەن الەۋەت بار», دەدى ول. ققدي باسقارما توراعاسى وتكەن جىلعى پاندەميا ەل ءۇشىن قيىن سىناق بولعانىن ايتا كەلىپ, ءتۇرلى الەۋمەتتىك زەرتتەۋلەر مەن باعالاۋلار بويىنشا سول ءبىر كۇردەلى كەزەڭدە قازاقستاندىقتاردىڭ 45%-عا جۋىعى ۆولونتەر اتانۋعا دايىن بولعانىن جەتكىزدى.
اقدم ازاماتتىق قوعام ىستەرى كوميتەتىمەن بىرلەسىپ ىسكە اسىرىلاتىن Birgemiz: áreket ýaqyty جوباسى اياسىندا تابىستى وڭىرلىك ۆولونتەرلىك جوبالاردىڭ جيناعى ازىرلەنۋدە. «رۋحاني جاڭعىرۋ» ققدي ۇلتتىق ۆولونتەرلىك جەلىنىڭ كومەگىمەن www.qazvolunteer.kz.بىرىڭعاي ونلاين-پلاتفورماسىندا «جىل ۆولونتەرى» حالىقارالىق سىيلىعىن وتكىزەتىن بولادى.
