پەداگوگيكالىق ماماندىقتى تاڭداعان ۇزدىك تالاپكەرلەردىڭ قاتارى كۇرت كوبەيدى. كەزىندە باسقا سالاعا ويىسىپ كەتكەندەر ورالا باستادى. وسىلايشا, باسەكە پايدا بولدى. ال باسەكە ءوز كەزەگىندە ساپانى ارتتىرادى.
پرەزيدەنت جولداۋدا جاعىمدى جاڭالىقتى جەتكىزدى. ءبىز قانشا بالالاردى وليمپيادالارعا دايىندايمىز. سوڭعى ۋاقىتتا قازاقستاندىق وقۋشىلار الەمدىك دودالاردا وق بويى وزىق كەلىپ, جوعارى ناتيجەلەر كورسەتىپ, التىننان, كۇمىستەن مەدال تاعىنىپ ءجۇر. وسىنداي وقۋشىلاردى ءوزىمىز عانا ىنتالاندىرىپ قويامىز. شەتەلدەردە مۇنداي بالالاردى پرەزيدەنت رەزيدەنتسياسىندا قابىلداپ جاتادى. مىنە, ەندى بىزدە دە مەملەكەت باسشىسى حالىقارالىق وليمپيادالاردىڭ جەڭىمپازدارى مەن جۇلدەگەرلەرىنە قولداۋ كورسەتىلەتىنىن ايتتى. بۇدان بىلاي حالىقارالىق وليمپيادالاردىڭ دارابوزدارىنا جوعارى وقۋ ورنىنا ءتۇسۋ ءۇشىن كونكۋرستان تىس گرانتتار بەرىلمەك. بۇعان قوسا ءبىر رەتتىك اقشالاي سىياقى دا تولەنەدى.
عىلىم مەن تەحنولوگيانىڭ دامىعان زامانىندا پەداگوگ زاماناۋي تالاپتارعا ساي ءوزىن ءاردايىم جەتىلدىرىپ وتىرۋى كەرەك. وسى ماسەلە ەسكەرىلگەندەي, مەملەكەت باسشىسى جولداۋىندا مۇعالىمدەردى قازىرگىدەي بەس جىلدا ەمەس, ءۇش جىلدا ءبىر رەت قايتا دايارلىقتان وتكىزۋدى تاپسىردى. كەيدە اقىلى كۋرستاردان وتۋىمىزگە تۋرا كەلەدى. ال پرەزيدەنت ەندى ۇستازداردىڭ كۋرستان ءوتۋ ءۇشىن ءوز قالتاسىنان اقشا تولەۋىنە جول بەرىلمەيتىنىن شەگەلەپ ايتتى.
بۇدان بولەك جولداۋدا ورتا ءبىلىم بەرۋ جۇيەسىندەگى وزەكتى پروبلەمانىڭ ءبىرى – مەكتەپتەردەگى ورىن تاپشىلىعىنا توقتالدى. قازىردىڭ وزىندە ەلىمىزدە 225 مىڭ وقۋشىعا ورىن جەتىسپەيدى. بۇل ماسەلەنى تەز ارادا شەشپەسەك, 2025 جىلعا قاراي ورىن تاپشىلىعى 1 ميلليونعا جەتۋى مۇمكىن ەكەن. وسىعان وراي مەملەكەت باسشىسى 2025 جىلعا دەيىن كەمىندە 800 مەكتەپ سالۋ تۋرالى تاپسىرما بەرگەن بولاتىن. كەشەگى حالىققا جولداۋىندا وقۋ وشاقتارىنىڭ سانىن مىڭعا جەتكىزۋدى مىندەتتەدى. مىندەت ورىندالىپ, جوسپار جۇيەلى جۇزەگە اسسا, ءۇش اۋىسىمدى مەكتەپتەر ماسەلەسى كۇن تارتىبىنەن تۇسەر ەدى.
گۇلزينا بەكمۇحامبەتوۆا,
فيزيكا-ماتەماتيكا ءپانىنىڭ مۇعالىمى, «ۇزدىك پەداگوگ-2019» بايقاۋىنىڭ جەڭىمپازى
