بيولوگيالىق قاۋىپسىزدىك – ۇلتتىق قاۋىپسىزدىك. سول سەبەپتى بۇعان بەيجاي قاراۋعا بولمايدى. ال بيولوگيالىق قاۋىپسىزدىك مىقتى بولۋ ءۇشىن وسى سالاداعى زەرتتەۋشىلەر مەن عالىمداردىڭ جۇمىس ىستەۋىنە جاعداي جاسالۋى ءتيىس. شىندىعىنا كەلگەندە, ەلىمىزدە وسى سالادا ەڭبەك ەتەتىن, الەمنىڭ تاڭداۋلى ماماندارىمەن يىق تىرەستىرە الاتىنداي, كاسىبي بىلىكتىلىگى جوعارى قىزمەتكەرلەر كوپ. تەك جوعارى ساپالى زەرتحانالاردىڭ ازدىعى نەمەسە جەتكىلىكتى جابدىقتالماۋى كوبىنىڭ قولىن بايلايدى. مىنەكەي, ەندى وسى ماسەلە ءوز شەشىمىن تاپپاق. سەبەبى پرەزيدەنت كەشەگى جولداۋىندا «دەنى ساۋ ۇلت» جوباسى بويىنشا كەمىندە 12 زەرتحانانى جوعارى تەحنولوگيالىق جابدىقپەن قامتاماسىز ەتۋدى تاپسىردى. راسىمەن دە ەلىمىزدەگى كوپتەگەن عىلىمي-مەديتسينالىق ساراپتامانى جاسايتىن ساناۋلى زەرتحانا حالىقارالىق ستاندارتتارعا سايكەس كەلەدى. تىڭ زەرتتەۋلەر جۇرگىزۋگە ارنالعان زەرتحانالاردىڭ الەۋەتى ارتسا, وتاندىق عىلىم ەل ەكونوميكاسى مەن دامۋىنا, ۇلتتىڭ قاۋىپسىزدىگىنە پايدا اكەلەتىن ەدى.
نەگىزى 2021-2024 جىلدارعا ارنالعان «دەنى ساۋ ۇلت» ۇلتتىق جوباسى اياسىندا جىلىنا ءۇش سەس زەرتحاناسىن جابدىقتاۋ جوسپارلانعان. زەرتحانالىق جابدىقتاردى جاڭعىرتۋ قاجەتتى زەرتتەۋلەردىڭ بارلىق سپەكترىن ورىنداۋعا, تەستىلەردى وتكىزۋ ۋاقىتىن قىسقارتۋعا, كورسەتىلەتىن قىزمەتتەردىڭ ساپاسىن ارتتىرۋعا, سونداي-اق ەپيدەميالىق تەكسەرۋلەردە كومەك كورسەتۋگە جانە تۇتانۋدىڭ باستاپقى سەبەپتەرىن انىقتاۋعا مۇمكىندىك بەرەدى.
عىلىمي-زەرتتەۋلەر كەيدە ءبىر جىلدا ەمەس, ءۇش جىلدا دا زەرتتەۋشىلەر كۇتكەن ناتيجەنى بەرمەۋى مۇمكىن. وسى ماسەلە ەسكەرىلگەن جولداۋدا عىلىمي-تەحنيكالىق زەرتتەۋ جوبالارىن قارجىلاندىرۋ مەرزىمىن ءۇش جىلدان بەس جىلعا دەيىن ۇلعايتۋ تاپسىرىلدى.
بۇدان بولەك جولداۋداعى عالىمداردىڭ جالاقىسىن نەگىزگى قارجىلاندىرۋعا قوسۋ, تۇراقتى جانە لايىقتى جالاقىنى قامتاماسىز ەتۋ تۋرالى شەشىم حالىقارالىق باسەكەگە قابىلەتتى يننوۆاتسيالىق زەرتتەۋلەر جۇرگىزۋگە جاعداي جاسايدى ءارى عىلىمي قاۋىمداستىققا بىلىكتى, تالانتتى جاس عالىمداردى تارتۋعا ىقپال ەتەدى.
توقتاسىن ەرۋباەۆ,
م.ايقىمباەۆ اتىنداعى اسا قاۋىپتى ينفەكتسيالار ۇلتتىق عىلىمي ورتالىعىنىڭ باس ديرەكتورى, پروفەسسور
