بۇل تۋرالى ۇلتتىق ستاتيستيكا بيۋروسىنىڭ ءباسپاسوز قىزمەتى مالىمدەدى.
ءباسپاسوز قىزمەتى كەلتىرگەن دەرەكتەرگە قاراعاندا, ونلاين ساناقتان وتكەندەردىڭ ىشىندە 394933-ءى sanaq.gov.kz سايتىندا, 46492 Egov پورتالىندا تىركەلۋ ارقىلى جاۋاپ بەرسە, 12131 ادام ساناققا اitu قوسىمشاسى ارقىلى قاتىستى.
العاشقى التى كۇننىڭ قورىتىندىسىمەن مەگاپوليستەر الدا كەلە جاتىر. 65736 استانالىق تۇرعىن ساناقتان وتكەنى جايلى حابارلاما العان. ونلاين ساناقتان وتكەن تاعى 64537 ادام الماتىدا تىركەلگەن. ۇزدىك ۇشتىكتى شىمكەنت تۇيىندەدى. مۇندا 51386 ادام ساناق ساۋالدارىنا جاۋاپ بەردى.
بۇل كورسەتكىش بويىنشا ازىرگە سوڭعى ەكى ورىندى تۇركىستان جانە اتىراۋ وبلىستارى ەنشىلەپ تۇر. بۇل وڭىرلەردە سايكەسىنشە 5713 جانە 4124 ادام ساناقتان ءوتىپتى.
ەرەكشە اتاپ وتەتىن جايت, ءبىر ادام وزىمەن بىرگە تۇراتىن باسقا دا وتباسى مۇشەلەرى ءۇشىن تولتىرا الادى. ياعني, sanaq.gov.kz سايتىنا ءبىر رەت قانا تىركەلىپ ءبىر وتباسىن قامتۋ مۇمكىندىگى قاراستىرىلعان. ساناق پاراقتارىن تولتىرۋ باستالعان ساتتە «رەسپوندەنتتى قوسۋ» نۇسقاسى ۇسىنىلادى. بىرگە تۇراتىن تۋىسىڭىزدىڭ جسن-ءىن ەنگىزگەن سوڭ جۇيە ونىڭ تولىق اتى-ءجونىن اۆتوماتتى تۇردە شىعارادى. بۇل مۇمكىندىك ارقىلى ساناق پاراقتارىن تولتىرۋعا كەتەتىن ۋاقىتتى ايتارلىقتاي ۇنەمدەۋگە بولادى. ساناق ساۋالدارىنا جاۋاپ بەرگەن سوڭ حابارلاما ونلاين وتكەن بارلىق وتباسى مۇشەلەرىنە ورتاق بولىپ سانالادى.
«ۇلتتىق ستاتيستيكا بيۋروسى ازاماتتاردىڭ بەلسەندىلىگى ءۇشىن العىس ايتا وتىرىپ, ساناقتى ونلاين وتۋگە شاقىرادى. sanaq.gov.kz سايتى 15 قازانعا دەيىن تاۋلىك بويى قولجەتىمدى بولماق. ونلاين ساناقتان وتپەگەندەر 1-30 قازان ارالىعىندا ينتەرۆيۋەرلەردىڭ ساۋالدارىنا جاۋاپ بەرە الادى. بارلىق ساۋالدار بويىنشا 1446 بايلانىس ورتالىعىنا حابارلاسۋعا بولادى. قوڭىراۋ شالۋ تەگىن. قازاقستاندا اركىم ماڭىزدى!», دەلىنگەن حابارلامادا.
