فوتو: Liter.kz
«مەملەكەت باسشىسى قاسىم-جومارت توقاەۆ ءوزىنىڭ قازاقستان حالقىنا جولداۋىندا مەملەكەتتىك جانە ەكونوميكالىق ساياساتتىڭ جاڭا مىندەتتەرىن بەلگىلەپ بەردى. جولداۋدى ىسكە اسىرۋ ءۇشىن جالپىۇلتتىق جوسپار ازىرلەندى. ول جولداۋدىڭ نەگىزگى باعىتتارى مەن مەملەكەت باسشىسىنىڭ باستامالارى بويىنشا مىندەتتەردى ساپالى ءارى جەدەل شەشۋگە باعىتتالعان», دەدى پرەمەر-مينيستر.
ءماميننىڭ مالىمدەۋىنشە, ۇكىمەت جۇمىسىنىڭ ماڭىزدى باعىتى مەملەكەت باسشىسىنىڭ ازاماتتاردىڭ ءال-اۋقاتىن ارتتىرۋ جونىندەگى باستامالارىن ىسكە اسىرۋ بولادى. جالاقىنى كوتەرۋ, جەكە سەكتوردىڭ ۇلەسىن ۇلعايتۋ, سالىقتىق جۇكتەمەنى ازايتۋ ارقىلى ناقتى تابىستىڭ ءوسۋىن قامتاماسىز ەتۋگە ەرەكشە نازار اۋدارىلادى.
«ۇسىنىلىپ وتىرعان جالپىۇلتتىق ءىس-شارالار جوسپارى العا قويىلعان مىندەتتەرگە تولىقتاي ساي. بارلىق ءبىرىنشى باسشىلارعا جوسپاردىڭ ءىس-شارالارىنىڭ ساپالى ءارى ۋاقتىلى ورىندالۋىن قامتاماسىز ەتۋ بويىنشا دەربەس جاۋاپكەرشىلىك جۇكتەلەدى. ۇلتتىق ەكونوميكا مينيسترلىگىنە پرەمەر-مينيستر كەڭسەسىمەن بىرگە وتە قىسقا مەرزىمدە جارلىق جوباسىن پرەزيدەنت اكىمشىلىگىنە ەنگىزۋدى تاپسىرامىن», دەدى اسقار مامين.
