ويتكەنى بۇل جولداۋدا وسى ۋاقىتقا دەيىن كوپ نازارعا ىلىگە بەرمەيتىن مادەنيەت قىزمەتكەرلەرى مەن مۇراعاتشى, كىتاپحاناشىلاردىڭ جاعدايى ەسكەرىلدى. بۇل, ەڭ الدىمەن بيلىكتىڭ مادەنيەتكە, رۋحانياتقا دەگەن قامقورلىعى دەپ بىلەمىن. سۋرەتشىلەر قاۋىمى ءۇشىن مادەنيەت سالاسىنداعى بۇل باستامالار جاڭا ءبىر وزگەرىستىڭ نىشانىنداي بولدى. بۇگىنگىدەي تەحنولوگيا قارىشتاپ دامىپ, قوعام ونەردەن الىستاپ جاتقان ۋاقىتتا مەملەكەت باسشىسىنىڭ مادەنيەت سالاسىن نازاردان تىس قالدىرماعانى ءبىزدى عانا ەمەس, بارشا زيالى قاۋىم وكىلدەرىن قۋانتتى.
سونداي-اق ەل باسشىسى مەملەكەتتىك بيۋدجەت ەسەبىنەن مادەنيەت پەن رۋحانيات سالاسىنا بولىنەتىن قارجىنىڭ بەلگىلى ءبىر مادەنيەت قايراتكەرلەرىنىڭ جوبالارىنا عانا جۇمسالىپ وتىرعانىن اتاپ ءوتتى. «جاس ءارى دارىندى مۇسىنشىلەر, سۋرەتشىلەر, تەاتر قىزمەتكەرلەرى, مۋزىكانتتار, قالامگەرلەر جاڭا جانر تۇرلەرىن يگەرىپ, ۇدايى ىزدەنىس ۇستىندە جۇرەدى. سويتە تۇرا, ولار ەلەۋسىز قالىپ, مەتسەناتتاردىڭ كومەگىمەن عانا كۇن كورەدى. شىن مانىندە, قازاقستان مادەنيەتى سول جاس دارىنداردىڭ ارقاسىندا جاھاندىق دەڭگەيدە تانىلىپ جۇرگەن جوق پا؟!» دەپ, جاس تالانتتاردى قولدايتىن جوبالار جوسپارىن ۇسىنۋدى تاپسىردى.
بۇدان بولەك قوعامنىڭ ءار سالاسىنداعى كۇرمەۋلى ماسەلەلەر دە باستى نازارعا الىندى.
«بىزدە ەڭ تومەنگى جالاقى مولشەرى 2018 جىلدان بەرى وسكەن جوق. كوروناۆيرۋسقا بايلانىستى الەمدىك داعدارىس تۇرعىنداردىڭ تابىسىنا كەرى اسەر ەتتى. ونىڭ ۇستىنە قازاقستان ەڭ تومەنگى جالاقى دەڭگەيى بويىنشا تمد-نىڭ بىرقاتار ەلدەرىنەن ارتتا قالىپ قويدى. سوندىقتان, 2022 جىلعى 1 قاڭتاردان باستاپ ەڭ تومەنگى جالاقىنى قازىرگى 42,5 مىڭ تەڭگەدەن 60 مىڭ تەڭگەگە دەيىن كوتەرۋ تۋرالى شەشىم قابىلدادىم», دەدى پرەزيدەنت. بۇل باستامانىڭ قوعامداعى ءارتۇرلى ساناتتاعى حالىقتىڭ تۇرمىسىنا اسەر ەتەتىنى انىق.
قاسىم-جومارت كەمەل ۇلى جولداۋىندا مەملەكەتتىك ءتىلدىڭ مارتەبەسى تۋرالى ءسوز قوزعادى. قازاق ءتىلىنىڭ ءبىلىم مەن عىلىمنىڭ, مادەنيەت پەن ءىس جۇرگىزۋدىڭ تىلىنە اينالىپ جاتقانىن دا ايتتى. «اتا زاڭ بويىنشا قازاقستاندا ءبىر عانا مەملەكەتتىك ءتىل بار. بۇل – قازاق ءتىلى. ورىس ءتىلى رەسمي ءتىل مارتەبەسىنە يە. ءبىزدىڭ زاڭناماعا سايكەس, ونىڭ قولدانىلۋىن شەكتەۋگە بولمايدى. بولاشاعىن وتانىمىزبەن بايلانىستىراتىن ءاربىر ازامات قازاق ءتىلىن ۇيرەنۋگە دەن قويۋعا ءتيىس. بۇل وتانشىلدىقتىڭ باستى بەلگىسى دەۋگە بولادى», دەدى پرەزيدەنت.
بۇل جولداۋ ەل ومىرىندەگى كەيىنگى ۋاقىتتاعى وقىس وقيعالاردان سوڭ قوعامعا جاڭا تىنىس اكەلگەندەي بولدى. باستاۋ العان جاڭا باستامالار مەملەكەتتى تىڭ وزگەرىستەرگە باستايدى دەپ سەنەمىز.
كاميل مۋللاشەۆ,
سۋرەتشى, مەملەكەتتىك سىيلىقتىڭ لاۋرەاتى
