«2021 جىلعى 3 قىركۇيەكتە ونلاين فورماتتا تمد-عا قاتىسۋشى مەملەكەتتەردىڭ مەملەكەتارالىق ەكولوگيالىق كەڭەسىنىڭ VII وتىرىسى ءوتتى. قاتىسۋشىلار كەڭەستىڭ جاڭا توراعاسىن سايلادى, ول قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ بولدى», دەلىنگەن قر ەكولوگيا مينيسترلىگى ءباسپاسوز قىزمەتىنىڭ حابارلاماسىندا.
وتىرىسقا تمد مەملەكەتارالىق ەكولوگيالىق كەڭەسىنە قاتىسۋشى مەملەكەتتەردىڭ – ارمەنيا, بەلارۋس, قازاقستان, قىرعىزستان, مولدوۆا, رەسەي, تاجىكستان جانە وزبەكستان رەسپۋبليكاسىنىڭ دەلەگاتسيالارى, تمد ەلدەرىنىڭ پارلامەنتارالىق اسسامبلەياسى كەڭەسى حاتشىلىعىنىڭ, تمد ەلەكتر ەنەرگەتيكالىق كەڭەسىنىڭ اتقارۋشى كوميتەتىنىڭ, تاۋەلسىز مەملەكەتتەر دوستاستىعىنىڭ اتقارۋشى كوميتەتىنىڭ وكىلدەرى قاتىستى.
وتىرىس بارىسىندا قاتىسۋشى ەلدەر قورشاعان ورتانى قورعاۋ سالاسىنداعى ىنتىماقتاستىقتىڭ جاي-كۇيى مەن دامۋ پەرسپەكتيۆالارى ماسەلەلەرىن تالقىلادى.
«سونداي-اق پوليمەرلىك قاپتامانى پايدالانۋدان ەكولوگيالىق قاۋىپسىز قاپتامانى پايدالانۋعا كەزەڭ-كەزەڭمەن كوشۋ, پارنيكتىك گازدار شىعارىندىلارىن ساتۋ جۇيەسى, تمد اۋماعىندا قورشاعان ورتانى قورعاۋ سالاسىندا, سونداي-اق بالىق شارۋاشىلىعىن (اكۆاوسىرۋ) دامىتۋ سالاسىندا تۇراقتى دامۋ ماقساتتارىن ەنگىزۋ ماسەلەلەرى بويىنشا تاجىريبە الماسۋ ءوتتى», دەلىنگەن حابارلامادا.
قازاقستان پارنيكتىك گازدار شىعارىندىلارىن ساۋدالاۋ جۇيەسىنىڭ تاجىريبەسىمەن ءبولىستى. قر جاڭا ەكولوگيالىق كودەكسىنىڭ شەڭبەرىندە پاريج كەلىسىمى مىندەتتەمەلەرىنىڭ ورىندالۋىن قامتاماسىز ەتۋ ماقساتىندا پارنيكتىك گازدار شىعارىندىلارى مەن سىڭىرۋلەرى سالاسىنداعى مەملەكەتتىك رەتتەۋ جۇيەسى جەتىلدىرىلدى. وسىلايشا, 2021 جىلدان باستاپ كومىرتەگى بيۋدجەتى جىل سايىن 1990 جىلعى كومىرتەگى بيۋدجەتىنىڭ دەڭگەيىنەن 1,5%-عا قىسقاراتىن بولادى.
قازاقستاندىق تاراپ قورشاعان ورتانى قورعاۋ سالاسىنداعى تۇراقتى دامۋ ماقساتتارىن ەنگىزۋ تاجىريبەسىمەن الماسۋ ناتيجەلەرى جانە بالىق شارۋاشىلىعىن دامىتۋ سالاسىنداعى ىنتىماقتاستىق تۋرالى ايتىپ بەردى.
كەڭەس بارىسىندا تمد ااەج-عا مۇشە مەملەكەتتەر قورشاعان ورتانى قورعاۋ سالاسىنداعى وزەكتى ماسەلەلەر بويىنشا ىنتىماقتاستىقتى جالعاستىرۋعا ۋاعدالاستى.
وتىرىس قورىتىندىسى بويىنشا تمد-عا قاتىسۋشى مەملەكەتتەردىڭ مەملەكەتارالىق ەكولوگيالىق كەڭەسىنىڭ 2022-2023 جىلدارعا ارنالعان جۇمىس جوسپارى بەكىتىلدى, شەشىمدەر قابىلداندى جانە وتىرىس حاتتاماسىنا قول قويىلدى.
