اۋعانستاننىڭ گەرات قالاسىندا 70-كە جۋىق ايەل «تاليبان» قوزعالىسىنىڭ جاڭا باسشىلىعىنان ايەلدەر قۇقىعىن ساقتاۋدى جانە كەڭەيتۋدى تالاپ ەتىپ, نارازىلىق اكتسياسىن وتكىزدى. بۇل تۋرالى Daily Mail حابارلادى.
ء«بىلىم, قاۋىپسىزدىك جانە جۇمىس - ءبىزدىڭ نەگىزگى قۇقىعىمىز», دەپ ۇراندادى شەرۋشىلەر.
تاليباننىڭ العاشقى بيلىگى كەزىندە ايەلدەر مەن قىزدارعا ءبىلىم الۋ مەن جۇمىس ىستەۋگە تىيىم سالىنعان ەدى. قوعامدىق ورىنداردا بۋركا كيۋ مىندەتتى بولدى جانە ايەلدەر ەركەكسىز ۇيدەن شىعا المادى.
ء«بىز ءوز قۇقىعىمىزدى سۇراۋعا كەلدىك», دەدى كوتەرىلىسشىلەردىڭ ءبىرى فەرەشتا تاحەري AFP اقپاراتتىق اگەنتتىگىنە تەلەفون ارقىلى.
«بۋركا كيۋگە دە دايىنبىز, بىراق ءبىز ايەلدەردىڭ مەكتەپكە بارعانىن, جۇمىس ىستەگەنىن قالايمىز», دەدى ولار.
گەرات - يران شەكاراسىنا جاقىن ورنالاسقان ەجەلگى جىبەك جولىنىڭ قالاسى. ول كونسەرۆاتيۆتى ورتالىقتارمەن سالىستىرعاندا ەداۋىر كوسموپوليتتىك كوزقاراستاعى قالا بولدى. دەگەنمەن كەيبىر ايەلدەر بۋركا كيەتىن.
وتكەن ايدا بيلىكتى باسىپ العان تالىپتەر جاڭا ۇكىمەتتىڭ قۇرامىن تالقىلاپ جاتىر. ولار بيلىك ادام قۇقىقتارىن ساقتايتىنىن, ايەلدەرگە شاريعات زاڭى شەڭبەرىندە جۇمىس ىستەۋگە رۇقسات بەرەتىنىن مالىمدەگەن, بىراق تۇرعىنداردىڭ كوپشىلىگى اۋعانستاننىڭ جاڭا اكىمشىلىگىندە ايەلدەرگە ورىن بولاتىنىنا كۇمانمەن قارايدى.
«ۇكىمەتتىڭ قۇرامىندا ءبىزدىڭ دە بولعىمىز كەلەدى. ەشقانداي ۇكىمەت ايەلدەرسىز قۇرىلمايدى. تالىپتەردىڭ بىزبەن كەڭەسكەنىن قالايمىز», دەدى شەرۋشىلەردىڭ ءبىرى.
«دارىگەر, مەدبيكە سىندى ايەلدەر جۇمىسقا ورالىپ جاتىر, بىراق تالىپتەر ولاردى قورقىتقانىن ايتىپ شاعىمدانادى», دەدى تاعى ءبىرى. ونىڭ ايتۋىنشا, تالىپتەر ولارعا قارامايدى, سويلەسپەيدى, تەك اشۋلى ءتۇر تانىتادى.
گەراتتاعى كوتەرىلىسشىلەر نارازىلىقتى جالعاستىراتىنىن مالىمدەدى.
ء«بىز نارازىلىقتى جالعاستىرامىز. گەراتتان باستادىق جانە جاقىن ارادا باسقا پروۆينتسيالارعا تاراتامىز», دەدى باسيرا تاحەري.
