ەلوردا اكىمى التاي كولگىنوۆ وندىرىستىك جاراقاتتاردىڭ الدىن الۋ ءۇشىن قانداي شارالار اتقارىلىپ جاتقانى تۋرالى ايتتى.
التاي كولگىنوۆ قۇرىلىسشىلاردىڭ قاۋىپسىزدىك ەرەجەلەرىنىڭ ساقتالۋىن قاداعالاۋدى كۇشەيتۋ قاجەتتىگىن ەسكەرتتى.
«قالا كاسىپورىندارى, اسىرەسە, قۇرىلىس نىساندارى قاۋىپسىزدىك ەرەجەلەرىن بۇلجىتپاي ساقتاۋى قاجەت. ادام ءومىرى مەن كومپانيالاردىڭ بەدەلى وسىعان تىكەلەي بايلانىستى. وندىرىستىك جاراقاتتانۋدى ازايتۋ ءۇشىن بىرقاتار جۇيەلى شارا قابىلدانىپ جاتىر. بۇگىن الەۋمەتتىك ارىپتەستىك جانە ەڭبەك قاتىناستارىن رەتتەۋ جونىندەگى كوميسسيا وتىرىسىندا وزەكتى ماسەلەلەر قارالدى», دەپ جازدى ول ءوزىنىڭ Instagram پاراقشاسىندا.
اكىمنىڭ سوزىنە سۇيەنسەك, وسىلايشا كاسىپوداق جانە جۇمىسشىلار كونفەدەراتسياسى بىرلەسىپ, نىسانداردا قاۋىپسىزدىك ەرەجەلەرىن ساقتاۋ جۇمىسىن كۇشەيتپەك. ءتارتىپ بۇزىلعان جاعدايدا قىزمەتكەرلەردىڭ قاۋىپسىزدىگى قامتاماسىز ەتىلمەيىنشە قۇرىلىس نىساندارىنىڭ جۇمىسى توقتاتىلادى.
«بۇدان باسقا, قۇرىلىس نىساندارىندا قاۋىپسىزدىك شارالارىن ساقتاۋعا ارنالعان مونيتورينگ جۇمىستارىن قوسىمشا كۇشەيتەمىز, ەڭبەك قىزمەتى تاراپتارىنىڭ قۇقىقتارى مەن مىندەتتەرىن ءتۇسىندىرۋ ءۇشىن كاسىپورىندارعا بارۋ جالعاسادى. سونداي-اق, مەملەكەتتىك كىرىستەر دەپارتامەنتى جۇمىس بەرۋشىلەردىڭ مىندەتتى زەينەتاقى جارنالارى مەن الەۋمەتتىك تولەمدەردى تولەۋ ماسەلەلەرىن باقىلاۋدا ۇستاپ, ءىرى بورىشكەرلەردىڭ تولەمدەر ماسەلەلەرىن شەشۋى قاجەت», دەدى ول.
