كەزدەسۋ اياسىندا جوبانىڭ قازىر قانداي دەڭگەيدە جۇزەگە اسىرىلىپ جاتقانى, سونىڭ ىشىندە ۇلتتىق بانكتىڭ تسيفرلى ۆاليۋتانى ازىرلەۋدە تەحنولوگيالىق ارحيتەكتۋرا مەن الەمدىك ترەندتەردى قالاي قولدانىپ جاتقانى تانىستىرىلعان.
تەحنولوگيا مەن تولەم جۇيەسى قاتار دامىپ جاتقانىن ەسكەرسەك, تسيفرلى تەڭگە قولدانىستاعى قولما-قول جانە قولما-قول ەمەس تولەم جۇيەلەرىنە قوسىمشا رەتىندە جاڭا تولەم ينفراقۇرىلىمى بولا الاتىنداي الەۋەتى بار. تسيفرلى تەڭگەنى ەنگىزە وتىرىپ, تولەم قىزمەتى نارىعىنداعى باسەكەنى ارتتىرۋعا, قارجى تەحنولوگياسىن دامىتۋعا جاڭاشا سەرپىن بەرۋگە, سونداي-اق ايماقتارداعى قارجى قىزمەتتەرىنىڭ قولجەتىمدىلىگىن ارتتىرۋعا مۇمكىندىك تۋادى.
«تالقىلاۋ بارىسىندا تسيفرلى ۆاليۋتا قارجى تۇراقتىلىعىنا قالاي اسەر ەتەدى دەگەن, تۇتىنۋشىلار ءۇشىن تولەم جاساۋ قانشالىقتى ىڭعايلى بولاتىنى, سونداي-اق تاۋەكەلدەردى تومەندەتۋدىڭ جولدارى قانداي دەگەن ماسەلەلەر تالقىلاندى. قارجى نارىعىنىڭ قاتىسۋشىلارى مۇددەلى تاراپتاردىڭ بارلىعىن تاجىريبەدە قولدانۋعا بولاتىن شەشىمدەردى ىزدەۋ ءۇشىن ساۋالداما مەن سۇحباتتاسۋدان وتۋگە شاقىردى. قاناتقاقتى جوباعا نارىقتاعى تاراپتاردىڭ بارلىعى شەكتەۋسىز قاتىسا الادى. قازىرگى تاڭدا «تسيفرلى تەڭگە» قاناتقاقتى جوباسىن جۇزەگە اسىرۋعا ەكىنشى دەڭگەيلى 3 بانك قاتىسا باستادى», دەلىنگەن ۇلتتىق بانك حابارلاماسىندا.
قازاقستان ۇلتتىق بانكى قارجى نارىعىنداعى تاراپتار مەن قوعام اراسىندا جوبانىڭ ناتيجەلەرىن تالقىلاپ, سول تالقىلاۋدىڭ ناتيجەسىن ورتاعا سالىپ وتىرادى.
