ۇكىمەت وتىرىسىندا ءبىلىم جانە عىلىم ءمينيسترى اسحات ايماعامبەتوۆ بىرجولعى اقشالاي سىياقى حالىقارالىق وليمپيادالاردىڭ جەڭىمپازدارىن دايىنداعان پەداگوگ-تالىمگەرلەرگە دە بەرىلەتىنىن جەتكىزدى.
«زياتكەرلىك, شىعارماشىلىق, سپورتتىق باعىتتار بويىنشا جانە WorldSkills سىندى حالىقارالىق وليمپيادالاردىڭ جەڭىمپازدارىن قولداۋ ماقساتىندا كونكۋرسقا قاتىسپاي-اق جوعارى وقۋ ورىندارىنا ءتۇسۋ ءۇشىن گرانت تاعايىنداۋ ماسەلەسى زاڭنامالىق تۇردە رەتتەلەتىن بولادى. سونداي-اق حالىقارالىق زياتكەرلىك وليمپيادالارعا قاتىسۋشىلاردى ىنتالاندىرۋ جانە قولداۋ ءۇشىن التىن مەدال يەگەرلەرىنە – 1500 اەك, كۇمىس – 1000 اەك, قولا – 500 اەك كولەمىندە سىياقى تاعايىنداۋ جوسپارلانىپ وتىر», دەدى اسحات ايماعامبەتوۆ.
وسى شارالاردى جۇزەگە اسىرۋ ءۇشىن ء«بىلىم تۋرالى» قازاقستان رەسپۋبليكاسىنىڭ زاڭىنا تولىقتىرۋلار ەنگىزىلەتىن بولادى. اتاپ ايتقاندا, جالپى ءبىلىم بەرەتىن پاندەر بويىنشا حالىقارالىق وليمپيادالاردىڭ جەڭىمپازدارى مەن جۇلدەگەرلەرىن, ولاردىڭ جاتتىقتىرۋشىلارىن كوتەرمەلەۋ قاعيدالارىن بەكىتۋ ءبىلىم جانە عىلىم مينيسترلىگىنىڭ قۇزىرەتىنە كىرمەك.
ايتا كەتەلىك, بيىل ءىرى حالىقارالىق جارىستاردا وقۋشىلار 26 مەدال جەڭىپ الىپ, رەكوردتى جاڭارتتى. ياعني ءبىلىم الۋشىلار ەل قورجىنىنا 2 التىن, 13 كۇمىس جانە 11 قولا مەدال سالدى. ەسكە سالا كەتەيىك, بۇعان دەيىن مەملەكەت باسشىسى قازاقستان حالقىنا جولداۋىندا دارىندى بالالاردى جان-جاقتى قولداۋدى تاپسىرعان بولاتىن.
