فوتو: Oqu-agartu ministrligi
وڭىرلەر اراسىنداعى الشاقتىق
كۇن تارتىبىندە ايماقتارداعى ءبىلىم ساپاسىنىڭ دەڭگەيى ساراپتالىپ, وڭىرلەر اراسىنداعى ايىرماشىلىق اشىق ايتىلدى. كەيبىر وبلىستاردىڭ كورسەتكىشتەرى تومەن ەكەنى سىنعا الىندى. باسقارما باسشىلارى جاڭا جوبالار مەن پەداگوگتەردىڭ بىلىكتىلىگىن ارتتىرۋ شارالارى تۋرالى ەسەپ بەرگەنىمەن, مينيستر ساندىق مەجەگە عانا سۇيەنۋدى دوعارۋ كەرەكتىگىن باسا ايتتى.
«وكىنىشكە قاراي, ارامىزدا ءبىلىم ساپاسىن وقۋشىنىڭ تەرەڭ بىلىمىمەن ەمەس, اتقارىلعان جوبالاردىڭ سانىمەن ولشەيتىن مەنەدجەرلەر ءالى دە بار. بىزگە قاعاز جۇزىندەگى ەسەپ ەمەس, شاكىرتتىڭ شىنايى جەتىستىگى مەن ءبىلىم دەڭگەيىنىڭ ءوسۋى قاجەت. سول سەبەپتى, وڭىرلەردە قالىپتاسقان جاعدايدى بۇكپەسىز ايتىپ, ونى شەشۋدىڭ جولدارىن بىرگە ىزدەستىرۋدەن عانا ناتيجە بولادى», دەدى جۇلدىز سۇلەيمەنوۆا.
وقۋ-اعارتۋ ءمينيسترى مۇعالىمدەرگە ارنالعان جوبانىڭ توقتايتىنىن مالىمدەدى
كادر تاپشىلىعى – كۇردەلى ماسەلە
جيىندا مەكتەپتەردەگى باسقارۋشىلىق كادرلاردىڭ جەتىسپەۋشىلىگى ەرەكشە اتاپ ءوتىلدى. قازىر ەل بويىنشا 490 مەكتەپ ديرەكتورىنىڭ ورنى بوس. اسىرەسە سولتۇستىك قازاقستان, اقمولا, شىعىس قازاقستان, قاراعاندى وبلىستارىندا تاپشىلىق ايقىن سەزىلەدى. 2025 جىلى ديرەكتورلىققا ۇمىتكەرلەردىڭ نەبارى 21%-ى عانا تەستىلەۋدەن وتكەن.
باسقارۋشىلىق داعدىنىڭ السىزدىگى مەكتەپ ىشىندەگى احۋالعا دا اسەر ەتىپ كەلەدى. كورپوراتيۆتىك مادەنيەتتىڭ تومەندەۋى, پەداگوگتەردىڭ تۇراقسىزدىعى, ورتالىق ورگاندارعا شاعىمنىڭ كوبەيۋى – سونىڭ سالدارى. وسىعان بايلانىستى كادر جەتىسپەيتىن وڭىرلەرگە وزگە ايماقتاردان بىلىكتى ماماندار تارتۋ مۇمكىندىگى قاراستىرىلماق.
ناقتى عىلىمدار بويىنشا پەداگوگتەر تاپشىلىعى دا وزەكتى. مۇعالىمدەردىڭ 52-62%-ى كاسىبي باعالاۋ كەزىندە شەكتى دەڭگەيدەن وتە الماعان. تۇركىستان, جامبىل, اتىراۋ, اقتوبە, ۇلىتاۋ وبلىستارىندا بۇل كورسەتكىش تومەن.
وقۋ-اعارتۋ ءمينيسترى: بۋللينگ ءۇشىن ديرەكتوردى جۇمىستان بوساتۋ ورىنسىز
دەرەكتەردى بىرىزدەندىرۋ جانە تسيفرلاندىرۋ
اقپاراتتىق جۇيەلەردىڭ ارتۇرلىلىگى مەن دەرەكتەردىڭ شاشىراڭقىلىعى دا سالانىڭ ءالسىز تۇسى رەتىندە اتالدى. مينيسترلىك بۇل باعىتتا جۇيەلى جۇمىس جۇرگىزىپ جاتىر. وڭىرلىك پلاتفورمالار كەزەڭ-كەزەڭىمەن ەڭبەك جانە حالىقتى الەۋمەتتىك قورعاۋ مينيسترلىگىنە قاراستى Esep.kz جۇيەسىنە بىرىكتىرىلەدى. بۇل دەرەكتەردىڭ اشىقتىعىن قامتاماسىز ەتىپ, ەسەپتىلىكتى قىسقارتۋعا جانە اقپاراتتى بىرىزدەندىرۋگە مۇمكىندىك بەرەدى.
مينيستر ينكليۋزيۆتى ءبىلىم بەرۋ ماسەلەسىنە دە توقتالدى. ونىڭ ايتۋىنشا, ينكليۋزيا كابينەت اشۋمەن عانا شەكتەلمەۋى ءتيىس, ەڭ باستىسى – ەرەكشە ءبىلىم قاجەتتىلىگى بار بالانىڭ قوعامعا تولىق بەيىمدەلۋىنە جاعداي جاساۋ.
الداعى ۋاقىتتا وڭىرلەردەگى ينكليۋزيا كابينەتتەرىنىڭ تيىمدىلىگى زەردەلەنىپ, ناقتى ناتيجەسىنە قاراي باعالانادى.
جيىن قورىتىندىسىندا جۇلدىز سۇلەيمەنوۆا وڭىرلىك ءبىلىم باسقارمالارىنا ناقتى تاپسىرمالار جۇكتەپ, ورىندالۋ مەرزىمىن بەلگىلەدى. وڭىرلەردىڭ شىنايى قاجەتتىلىگىن ەسكەرۋ, سالا مەنەدجەرلەرىمەن بىرلەسە ارەكەت ەتۋ الداعى ستراتەگيالىق جانە ينفراقۇرىلىمدىق شەشىمدەردىڭ نەگىزى بولماق.
