«انتيفراۋد» رەسپۋبليكالىق جەدەل-الدىن الۋ ءىس-شاراسى اياسىندا قوستاناي وبلىسى پوليتسيا دەپارتامەنتىنىڭ كيبەرقىلمىسقا قارسى ءىس-قيمىل باسقارماسى قىزمەتكەرلەرى قوستاناي قالاسى پوليتسيا بولىمشەسى كيبەرقىلمىسقا قارسى بولىمشەمەن بىرلەسىپ, «كسەلل» اق جانە «قازاقتەلەكوم» اق ۇيالى بايلانىس وپەراتورلارىمەن ءوزارا ءىس-قيمىل جاساي وتىرىپ, سونداي-اق وبلىستىق پروكۋراتۋرانىڭ ۇيلەستىرۋىمەن SIM-box جابدىعىن پايدالانۋ فاكتىسىن انىقتادى.
«جەدەل ءىس-شارالار ناتيجەسىندە ينتەرنەت-الاياقتار ءۇشىن تەحنيكالىق توراپ ۇيىمداستىردى دەگەن كۇدىكپەن رۋدنىي قالاسىنىڭ 22 جاستاعى تۇرعىنى ۇستالدى», دەلىنگەن حابارلامادا.
پوليتسيانىڭ مالىمەتىنشە, كۇدىكتى ءبىر مەزگىلدە ءارتۇرلى بايلانىس وپەراتورلارىنىڭ كوپتەگەن SIM-كارتالارىمەن جۇمىس ىستەۋگە مۇمكىندىك بەرەتىن SIM-box قۇرىلعىسىن پايدالانعان. مۇنداي جابدىق تەلەفون نومىرلەرىن الماستىرۋعا جانە ينتەرنەت ارقىلى الاياقتىق قوڭىراۋلار شالۋعا, قازاقستاندىق نومىرلەردەن قوڭىراۋ شالىنعانداي كورىنىس جاساۋعا قولدانىلادى.
تۇرعىلىقتى جەرىن تەكسەرۋ بارىسىندا ۇيالى تەلەفوندار, SIM-كارتالار, ينتەرنەت-روۋتەر, سونداي-اق بەينەباقىلاۋ جۇيەسى تاركىلەندى. اتالعان جابدىق ينتەرنەت-سەرۆيستەر ارقىلى كەلىپ تۇسەتىن قوڭىراۋلاردى قابىلداۋ جانە وڭدەۋ ءۇشىن پايدالانىلعانى انىقتالدى.
الدىن الا مالىمەتتەر بويىنشا, ۇستالعان ازامات مەسسەندجەرلەر ارقىلى زاڭسىز سحەمانى ۇيىمداستىرعان بەلگىسىز تۇلعالاردىڭ نۇسقاۋلارىن ورىنداعان جانە ولاردىڭ ارەكەتتەرىن ۇيلەستىرىپ وتىرعان.
قازىرگى ۋاقىتتا پوليتسيا قىزمەتكەرلەرى قىلمىستىق سحەمانىڭ ۇيىمداستىرۋشىلارى مەن باسقا دا قاتىسۋشىلارىن انىقتاۋ جانە ۇستاۋ ماقساتىندا جەدەل-تەرگەۋ ءىس-شارالارىن جۇرگىزۋدە.
«كۇدىكتى ۇستالىپ, ۋاقىتشا ۇستاۋ يزولياتورىنا قامالدى. وعان قاتىستى بۇلتارتپاۋ شاراسىن تاڭداۋ ماسەلەسى قارالۋدا. تەرگەۋ امالدارى جۇرگىزىلىپ, وقيعانىڭ بارلىق ءمان-جايى جانە باسقا تۇلعالاردىڭ قاتىسى انىقتالىپ جاتىر», دەپ ناقتىلادى پوليتسيا.
پوليتسيا دەپارتامەنتى ينتەرنەت-الاياقتىقتى انىقتاۋ جانە جولىن كەسۋ جۇمىستارى جالعاساتىنىن, مۇنداي سحەمالاردىڭ ۇيىمداستىرۋشىلارى مەن قاتىسۋشىلارى زاڭعا سايكەس جاۋاپكەرشىلىككە تارتىلاتىنىن اتاپ ءوتتى.
