فوتو: parlam.kz
كونستيتۋتسيالىق رەفورما جونىندەگى كوميسسيانىڭ كەزەكتى وتىرىسىندا اتا زاڭ جوباسىن قولداۋ جونىندەگى ۇستانىمى مەن دايەكتەرىن جالپىۇلتتىق سوتسيال-دەموكراتيالىق پارتياسىنىڭ توراعاسى اسحات راحىمجانوۆ مالىمدەدى.
ول كونستيتۋتسيا جوباسى, ەڭ الدىمەن ادىلدىككە, تەڭدىككە, قۇقىقتاردى قورعاۋعا جانە مەملەكەتتىڭ حالىق الدىنداعى جاۋاپكەرشىلىگىن ارتتىرۋعا باعىتتالعانىن اتاپ ءوتتى.
سەرگەي پونومارەۆ: جاڭا كونستيتۋتسيا قازاقستانداعى قوعامدىق كەلىسىم مەن بىرلىكتى نىعايتادى
«قوعامدىق بىرلەستىكتەردىڭ قىزمەت ەتۋ ەركىندىگىن بەكىتۋ جانە ازاماتتاردىڭ قوعامدىق ومىرگە قاتىسۋ اياسىن كەڭەيتۋ – ناعىز ازاماتتىق قوعامدى دامىتۋعا جول اشادى. مۇنداي قوعامدا كاسىپوداقتار, قوعامدىق ۇيىمدار مەن باستاماشىل توپتار ەڭبەك ادامدارىنىڭ, جاستاردىڭ جانە الەۋمەتتىك وسال ساناتتاعى ازاماتتاردىڭ مۇددەلەرىن ەركىن قورعاي الادى. بۇل تەڭ مۇمكىندىكتەر مەن مەملەكەتتىڭ الەۋمەتتىك جاۋاپكەرشىلىگى قاعيداتتارىمەن تىكەلەي بايلانىستى», دەدى جسدپ توراعاسى.
سونىمەن قاتار اسحات راحىمجانوۆ وسىناۋ كونستيتۋتسيالىق نورمالار ادام مۇددەسىنە باعدارلانعان ورنىقتى ساياساتتىڭ نەگىزىن قالىپتاستىرۋ ءۇشىن ماڭىزدى ەكەنىن جەتكىزدى.
ماگەررام ماگەرراموۆ كونستيتۋتسيا جوباسىن رەفەرەندۋمعا شىعارۋدى ۇسىندى
«مەملەكەتتىك شەشىمدەر قابىلدانعاندا بولاشاق ۇرپاقتىڭ مۇددەسى مىندەتتى تۇردە ەسكەرىلۋى كەرەك. اسىرەسە ەڭبەك, جۇمىسپەن قامتۋ, ەكولوگيا جانە الەۋمەتتىك قورعاۋ سالالارىندا بۇل وتە ماڭىزدى. وسىعان بايلانىستى ۇسىنىلىپ وتىرعان كونستيتۋتسيالىق نورمالار تۇراقتى ءارى ادام مۇددەسىن باستى ورىنعا قوياتىن ساياساتتىڭ نەگىزىن قالىپتاستىرادى», دەدى كوميسسيا مۇشەسى.
ايتا كەتەيىك, بۇگىن قاسىم-جومارت توقاەۆ كونستيتۋتسيالىق كوميسسيا توراعاسى – كونستيتۋتسيالىق سوت توراعاسى ەلۆيرا ءازىموۆانى, كونستيتۋتسيالىق كوميسسيا توراعاسىنىڭ ورىنباسارى – مەملەكەتتىك كەڭەسشى ەرلان قاريندى جانە كونستيتۋتسيالىق كوميسسيا مۇشەسى – پرەزيدەنتتىڭ قۇقىقتىق ماسەلەلەر جونىندەگى كومەكشىسى ەرجان جيەنباەۆتى قابىلدادى. قابىلداۋدا پرەزيدەنت جاقىندا رەسپۋبليكالىق رەفەرەندۋم وتكىزۋ تۋرالى جارلىققا قول قوياتىنىن مالىمدەدى.
