ەكونوميكالىق باعىتتا 6 زاڭ قابىلدانادى
ۇلتتىق ەكونوميكا ءمينيسترى اسەت ەرعاليەۆ ەكونوميكالىق رەفورمالاردى ىسكە اسىرۋ جونىندەگى نەگىزگى شارالار تۋرالى بايانداما جاسادى. مەملەكەت باسشىسى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋى اياسىندا ەكونوميكانىڭ ساپالى ءوسۋىن قامتاماسىز ەتۋ جانە حالىقتىڭ ءومىر ءسۇرۋ دەڭگەيىن ارتتىرۋ بويىنشا ناقتى مىندەتتەر قويدى. «بارلىعى 70-كە جۋىق تاپسىرما بەرىلدى. 6 زاڭ قابىلداۋ قاجەت. بۇل – سترەستى اكتيۆتەردى ەكونوميكالىق اينالىمعا قايتارۋ, جەكە قوسالقى شارۋاشىلىقتار, اگلومەراتسيالاردى دامىتۋ, عىلىمدى دامىتۋ جانە كاسىبي بىلىكتىلىك تۋرالى زاڭدارعا, سونداي-اق سالىق جانە بيۋدجەت كودەكستەرىنە وزگەرىستەر ەنگىزۋ. ءۇش تۇجىرىمداما بەكىتۋ قاجەت. بۇل – مەملەكەت قارجىسىن باسقارۋ, كوشى-قون ساياساتى, سونداي-اق وتباسىلىق جانە گەندەرلىك ساياسات تۇجىرىمدامالارى», دەدى ءا.ەرعاليەۆ.
ونىڭ ايتۋىنشا, ءار ءوڭىر ءۇشىن ينفراقۇرىلىمدىق دامۋ باعدارلامالارى ازىرلەنەتىن بولادى.
ۇلتتىق بانك توراعاسى ەربولات دوساەۆ مەملەكەت باسشىسىنىڭ بيىلعى جولداۋىن ىسكە اسىرۋ ماقساتىندا 2022 جىلى ينفلياتسيانى 4-6% نىسانالى دالىزگە قايتارۋعا ايرىقشا كوڭىل بولىنەتىندىگىن ايتتى. «بيىلعى 8 ايدىڭ قورىتىندىسى بويىنشا, ىشكى ءوندىرىس قاجەتتىلىگىنىڭ رەسمي جابىلۋىنا قاراماستان, جەكەلەگەن نارىقتارداعى تۇراقتى تەڭگەرىمسىزدىك ناتيجەسىندە ازىق-ت ۇلىك ينفلياتسياسىنىڭ ءوسۋى 11,4%-دى قۇرادى. ماۋسىمارالىق كەزەڭدە كارتوپ پەن ءسابىزدىڭ باقىلاۋسىز ەكسپورتىنا بايلانىستى جازعى ايلارعا ءتان باعاعا قاراعاندا كۇرت ءوسۋى, سونىڭ سالدارىنان ىشكى نارىقتا دەفيتسيتتىڭ پايدا بولۋى وسى جىلعا ءتان كورىنىس بولدى», دەدى ە.دوساەۆ.
جوعارىدا كورسەتىلگەن فاكتورلاردىڭ نەگىزىندە مەملەكەت باسشىسىنىڭ تاپسىرماسىن ىسكە اسىرۋ ءۇشىن ازىق-ت ۇلىك باعاسىنىڭ وسۋىنە قارسى كۇرەستە ۇكىمەت پەن اكىمدەردىڭ نەگىزگى كۇش-جىگەرىن تاۋار ءوندىرىسىنىڭ, ەكسپورت پەن يمپورت بالانسىن ەسكەرە وتىرىپ, ىشكى نارىقتى جان-جاقتى تولىقتىرۋعا جۇمساۋ كەرەك. ينفلياتسيانى 2022 جىلى نىسانالى دالىزگە قايتارۋ بويىنشا جولداۋدا قويىلعان مىندەتتەردى ءتيىمدى تۇردە شەشۋ ءۇشىن 2021-2023 جىلدارعا ارنالعان ينفلياتسياعا قارسى ارەكەت ەتۋ شارالارىنىڭ كەشەنى ازىرلەنىپ, كەلىسۋدىڭ سوڭعى ساتىسىندا تۇر. ماكروەكونوميكالىق ساياساتتى ۇيلەستىرۋ جونىندەگى 2021-2023 جىلدارعا ارنالعان كەلىسىممەن بىرگە بۇل شارالار ينفلياتسيانىڭ ازىق-ت ۇلىككە جاتاتىن جانە ازىق-ت ۇلىككە جاتپايتىن بولىكتەرىنىڭ مونەتارلىق ەمەس فاكتورلارىن ايتارلىقتاي تومەندەتۋدى قامتاماسىز ەتۋگە, ورتامەرزىمدى نەگىزدە بولجامدى جانە تەڭگەرىمدى تاريفتىك ساياساتتى قامتاماسىز ەتۋگە ءتيىس.
قارجى ءمينيسترى ەرۇلان جاماۋباەۆتىڭ ايتۋىنشا, مينيسترلىك مۇددەلى مەملەكەتتىك ورگاندارمەن بىرلەسىپ, كولەڭكەلى ەكونوميكاعا قارسى ءىس-قيمىل جونىندەگى ءىس-شارالار جوسپارىن ىسكە اسىرۋدا.
مەملەكەتتىك جانە كۆازيمەملەكەتتىك بورىشتى باسقارۋ جونىندەگى تۇجىرىمدامانى ازىرلەۋ تۋرالى تاپسىرما شەڭبەرىندە ءىس-شارالار مەملەكەتتىك ورگاندار جۇرگىزىپ جاتقان جۇمىستى ەسكەرە وتىرىپ ۇيلەستىرىلەدى. تۇجىرىمدامانىڭ نەگىزگى تاسىلدەرى رەتىندە مىناداي شارالاردى ايقىنداۋ ۇسىنىلادى: مەملەكەتتىك بورىشتىڭ ءوسۋىن شەكتەۋ جانە ونى قاۋىپسىز دەڭگەيدە ۇستاپ تۇرۋ ءۇشىن بيۋدجەت تاپشىلىعىن كەزەڭ-كەزەڭىمەن تومەندەتۋ, بورىش تۇراقتىلىعىنىڭ نەگىزگى كورسەتكىشتەرىن بەلگىلەۋ, بارىنشا ەكونوميكالىق تيىمدىلىككە قول جەتكىزۋ ءۇشىن جوبالاردى ەگجەي-تەگجەيلى ىرىكتەۋ جانە ت.ب.
جالپى, ۇسىنىلىپ وتىرعان شارالار 2025 جىلدىڭ سوڭىنا قاراي مەملەكەتتىڭ ەكونوميكاعا قاتىسۋ ۇلەسىن جالپى ىشكى ءونىمنىڭ 14%-نا دەيىن قىسقارتۋعا مۇمكىندىك بەرەدى.
مەملەكەتتىك جوسپارلاۋدىڭ اقپاراتتىق جۇيەسىن دامىتۋ جۇمىسى جالعاسادى. جوبا شەڭبەرىندە «مەملەكەتتىك ينۆەستيتسيالىق جوبالار» ءمودۋلى ىسكە اسىرىلادى. بۇل مەملەكەتتىك ينۆەستيتسيالىق جوبالاردىڭ قۇجاتتاماسىن قالىپتاستىرۋعا جانە مەملەكەتتىك ورگاندارمەن كەلىسۋگە ارنالعان. مەملەكەتتىك ساتىپ الۋ جوسپارلارىن اۆتوماتتى تۇردە قالىپتاستىرۋ ءۇشىن مەملەكەتتىك جوسپارلاۋدىڭ اقپاراتتىق جۇيەسىن مەملەكەتتىك ساتىپ الۋ پورتالىمەن ينتەگراتسيالاۋ ىسكە اسىرىلادى.
«حالىقتىڭ مەملەكەتتىك قارجىنى باسقارۋ مەن باقىلاۋعا قاتىسۋىن كەڭەيتۋ ءۇشىن نورماتيۆتىك قۇقىقتىق اكتىلەرگە ءتيىستى تۇزەتۋلەر ەنگىزىلمەك. بۇل اباتتاندىرۋ جانە تۇرعىن ءۇي-كوممۋنالدىق شارۋاشىلىق بيۋدجەتىندەگى «حالىقتىڭ قاتىسۋ» ۇلەسىن 10 ەسەگە ارتتىرۋعا مۇمكىندىك بەرەدى», دەدى ە.جاماۋباەۆ.
ازىق داقىلدارىن ءوسىرۋ القابى 2 ەسە ۇلعايادى
اۋىل شارۋاشىلىعى ءمينيسترى ەربول قاراشوكەەۆ اۋا رايى فاكتورلارىنىڭ اۋىل شارۋاشىلىعى وندىرىسىنە تەرىس اسەرىن بولدىرماۋ, سونداي-اق مال شارۋاشىلىعىنىڭ ازىقتىق بازاسىن دامىتۋ ماقساتىندا ەگىنشىلىكتە ناقتى ءارتاراپتاندىرۋ ءىسى جۇزەگە اسىرىلاتىنىن ايتتى. «بۇل ءۇشىن اۋىل شارۋاشىلىعى تاۋارىن وندىرۋشىلەر اراسىندا كەڭىنەن ءتۇسىندىرۋ جۇمىستارى جۇرگىزىلەدى. سونداي-اق جەر پايدالانۋشىلاردىڭ قازىرگى زامانعى تسيفرلى تەحنولوگيالاردى, عارىشتىق مونيتورينگ پەن جەردى قاشىقتىقتان زوندتاۋدى, ءارتاراپتاندىرۋ پروتسەسىن مەملەكەتتىك رەتتەۋ شارالارىن پايدالانا وتىرىپ, جالداۋ شارتى شەڭبەرىندە وزدەرىنە قابىلداعان مىندەتتەمەلەردى ورىنداۋىن باقىلاۋ تەتىكتەرى ازىرلەنەتىن بولادى. ناتيجەسىندە, ازىقتىق داقىلداردى ءوسىرۋ الاڭىنىڭ اۋىسپالى ەگىستەگى ۇلەسى عىلىمي نەگىزدەلگەن نورمالارعا دەيىن جەتكىزىلىپ, كەمىندە 2 ەسە ۇلعايادى», دەدى اۋىل شارۋاشىلىعى سالاسىنىڭ باسشىسى.
يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆتىڭ ايتۋىنشا, مەملەكەت باسشىسىنىڭ وتاندىق ونەركاسىپ ءۇشىن شيكىزات تاۋارلارىنىڭ باعاسى مەن كولەمىنىڭ قولجەتىمدى بولۋى جونىندەگى تاپسىرمالارىن ورىنداۋ اياسىندا ونەركاسىپتىك ساياسات تۋرالى زاڭ جوباسىنا ىشكى نارىقتاعى شيكىزاتقا باعالاردى بەلگىلەۋگە باقىلاۋ ەنگىزىلەدى. ەكىنشىدەن, لوندون مەتالدار بيرجاسى (LME) باعاسىنان ديسكونت ۇسىنۋ قاعيداتىمەن ەل ىشىندە بيرجالىق مەتالدارعا باعا بەلگىلەۋ مەحانيزمى ەنگىزىلەدى. ول شيكىزاتتى قايتا وڭدەۋ دەڭگەيىنە بايلانىستى بولماق. ياعني قورىتپالار نەمەسە پروكات وندىرگەندە ەڭ تومەنگى جەڭىلدىك بەرىلەدى. ال دايىن بۇيىمدار وندىرىلگەندە ەڭ جوعارى جەڭىلدىك ەنگىزىلەدى. ۇشىنشىدەن, قايتا وڭدەۋشىلەر مەن جاڭادان ىسكە قوسىلاتىن كاسىپورىنداردىڭ قۋاتتارىنا قاراي ىشكى قايتا وڭدەۋگە مەتالدار كولەمىن رەزەرۆتەۋ ەنگىزىلەدى. ءمينيستردىڭ ايتۋىنشا, مينيسترلىك جىل سوڭىنا دەيىن وسى ماڭىزدى مىندەتتىڭ وڭتايلى شەشىمىنىڭ نۇسقاسىن ازىرلەيدى.
بىرىڭعاي تۇرعىن ءۇي ساياساتى پىسىقتالىپ جاتىر. ءمينيستردىڭ ايتۋىنشا, ءۇي كەزەگىندە تۇرعان ازاماتتارعا «وتباسى بانكىنىڭ» يپوتەكالىق باعدارلامالارى بويىنشا باستاپقى جارنا كولەمى باسپانا قۇنىنىڭ 10%-ىنا دەيىن تومەندەتىلەدى. وتباسى تابىسىنا بايلانىستى جەڭىلدىكتى نەسيەلەندىرۋ بويىنشا مولشەرلەمە جىلدىق 2% جانە 5% بولادى. «باسپانا جاعدايىن جاقسارتۋعا زەينەتاقى جيناقتارىن پايدالانۋ تۋرالى قاعيدالارعا وزگەرىستەر ەنگىزىلەدى. سوعان سايكەس زەينەتاقى جيناقتارىنىڭ جەتكىلىكتى شەگىنەن اساتىن بولىگىن ءۇي ساتىپ الۋ ءۇشىن «وتباسى بانكىنىڭ» شوتىنا اۋدارۋعا مۇمكىندىك بەرىلەدى», دەدى ب.اتامقۇلوۆ.
سۋتەگى ەنەرگەتيكاسىن دامىتۋ قولعا الىنادى
ەنەرگەتيكا ءمينيسترى نۇرلان نوعاەۆتىڭ ايتۋىنشا, ەلەكتر ەنەرگياسىن تۇتىنۋدىڭ ءوسۋىن جانە ەلدىڭ ەنەرگيا تەڭگەرىمىندەگى بالامالى جانە جاڭارتىلاتىن ەنەرگيا تۇرلەرىنىڭ ۇلەسىن ەسكەرە وتىرىپ, مانەۆرلىك قۋاتتاردى دامىتۋ رەسپۋبليكانىڭ ەنەرگەتيكالىق قاۋىپسىزدىگىن قامتاماسىز ەتۋ ءۇشىن قاجەتتى شارت بولىپ تابىلادى.
مينيسترلىك بەيبىت ماقساتتاعى اتوم مەن سۋتەگى ەنەرگەتيكاسىن دامىتۋ بويىنشا جاڭا تاسىلدەردى ازىرلەۋدى جوسپارلاپ وتىر. مەملەكەت باسشىسىنىڭ تاپسىرماسىن ورىنداۋ ءۇشىن مينيسترلىك «سامۇرىق-قازىنا» ۇاق» اق-مەن بىرلەسىپ, بەيبىت ماقساتتاعى اتومدى دامىتۋعا بايلانىستى ماسەلەلەردى زەردەلەيتىن بولادى. اتوم سالاسىندا بىلىكتى كادرلاردى دايارلاۋ سالاسىندا مينيسترلىك مۇددەلى مەملەكەتتىك ورگاندارمەن جانە ۇيىمدارمەن بىرلەسىپ, اتوم سالاسىنىڭ ماماندىقتارى بويىنشا الەمنىڭ جەتەكشى جوعارى وقۋ ورىندارىندا ستۋدەنتتەردى وقىتۋعا گرانتتار مەن ستيپەنديالار ءبولۋ جونىندە جۇمىس جۇرگىزەتىن بولادى. قازاقستاندا سۋتەگى ەنەرگەتيكاسىن دامىتۋ ماقساتىندا ەنەرگەتيكا مينيسترلىگى سۋتەگى ەنەرگەتيكاسىن دامىتۋدىڭ نەگىزگى تاسىلدەرىن ايقىندايتىن بولادى.
6 وبلىستا 9 جاڭا سۋ قويماسى سالىنادى
ەكولوگيا, گەولوگيا جانە تابيعي رەسۋرستار مينيسترلىگى ۇلتتىق گەولوگيالىق قىزمەتتى قۇرادى. «اتالعان قىزمەت «بىرىڭعاي تەرەزە» قاعيداتى نەگىزىندە جۇمىس ىستەيدى. ونىڭ ناتيجەسىندە ينۆەستور زاماناۋي فورماتتاعى جەر قويناۋىنىڭ ءۇش ولشەمدى مودەلى قۇرىلعان ساپالى اقپاراتپەن قامتاماسىز ەتىلەدى. سونىمەن قاتار ىرگەلى, قولدانبالى عىلىم مەن ءوندىرىس كۇشىن بىرىكتىرۋگە مۇمكىندىك الادى», دەدى ۆەدومستۆو باسشىسى ماعزۇم مىرزاعاليەۆ.
بيىل 1050 شاقىرىم كانالدى قايتا جاڭعىرتۋ جوسپارلانىپ وتىر. بۇل 78 مىڭ گا سۋارمالى جەردى اينالىمعا ەنگىزۋگە مۇمكىندىك بەرەدى. «5 جىل ىشىندە ۇزىندىعى شامامەن 2,3 مىڭ شاقىرىم بولاتىن كەمىندە 120 كانال قايتا جاڭارتىلادى. ناتيجەسىندە, 600 مىڭ گا اينالىمعا ەنگىزىلەتىن بولادى. 2025 جىلعا قاراي سۋارمالى جەرلەردىڭ كولەمى 2,2 ملن گا جەتكىزىلەدى. بۇل اۋىلدىق جەرلەردە 120 مىڭ جۇمىس ورنىن قۇرۋعا جانە جىل سايىن 510 ملرد تەڭگەنىڭ ءونىمىن وسىرۋگە ىقپال ەتەدى», دەدى ەكولوگيا ءمينيسترى.
بۇدان باسقا, 2025 جىلعا دەيىن 6 وبلىستا جالپى كولەمى 1,7 ملرد تەكشە مەتر بولاتىن 9 جاڭا سۋ قويماسى سالىندى. نىسانداردىڭ جالپى قۇنى 51,0 ملرد تەڭگەگە تەڭ.
ەڭ تومەنگى جالاقىنىڭ ءوسۋى 1 ملن 650 مىڭ جالدامالى قىزمەتكەردىڭ اقشالاي تابىسىنىڭ ارتۋىنا اكەلەدى.
ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆتىڭ ايتۋىنشا, مەملەكەت باسشىسىنىڭ جاريا ەتكەن باستامالارىنا سايكەس ەڭبەكاقىنى ارتتىرۋ بويىنشا شارالار قابىلدانادى. بىرىنشىدەن, 2022 جىلعى 1 قاڭتاردان باستاپ ەڭ تومەنگى جالاقى 60 مىڭ تەڭگە مولشەرىندە بەلگىلەنەدى. اتالعان شارا ەكونوميكانىڭ بارلىق سالاسىندا جۇمىس ىستەيتىن 1 ملن 650 مىڭ جۇمىسكەردىڭ اقشالاي تابىستارىنىڭ ارتۋىنا اكەلەدى. بۇل سونداي-اق بىلىكتىلىكتىڭ رازريادارالىق جۇيەسىن ەسكەرە وتىرىپ, باسقا دا قىزمەتكەرلەردىڭ تابىسىن ارتتىرۋعا مۇمكىندىك بەرەدى.
ەكىنشى, ازاماتتىق قىزمەتشىلەردىڭ 588 مىڭ جەكەلەگەن ساناتىنىڭ جالاقىسىن كەزەڭ-كەزەڭىمەن ارتتىرۋ بويىنشا ۇكىمەت قاۋلىسىنىڭ جوباسى ازىرلەنەدى. «سونىڭ ناتيجەسىندە 2022 جىلدان باستاپ ولاردىڭ جالاقىسى جىل سايىن 20%-عا ارتىپ, 2025 جىلعا قاراي 2 ەسە ارتادى», دەدى س.شاپكەنوۆ.
ءار جىل سايىن 200 مەكتەپ
ء بىلىم جانە عىلىم ءمينيسترى اسحات ايماعامبەتوۆ 1000 جاڭا مەكتەپ قۇرىلىسى بويىنشا ايتتى. «بيىلعى جىلدىڭ وزىندە 200 جاڭا مەكتەپتى ىسكە قوسامىز. كەلەسى 4 جىل ىشىندە جىل سايىن 200 مەكتەپ سالىناتىن بولادى. جاڭا مەكتەپتەردى سالۋ 4 نەگىزگى مەحانيزم ارقىلى ىسكە اسىرىلادى. جەرگىلىكتى اتقارۋشى ورگاندار وسى 1000 مەكتەپتى سالۋ ءۇشىن قاجەتتى جەر ۋچاسكەلەرىن الدىن الا ءبولىپ, ونىڭ ينتەراكتيۆتى كارتاسىن ازىرلەۋى قاجەت. وعان قوسا 1500, 2000, 2500, 3000 وقۋشىعا ارنالعان مەكتەپتەردىڭ زاماناۋي تيپتىك جوبالارىن دايىنداپ, مەكتەپ قۇرىلىسىنىڭ مونيتورينگى بويىنشا ەلەكتروندى پورتالدى ىسكە قوسۋ كەرەك», دەدى مينيستر.
تولىق جيناقتالعان اۋىل مەكتەپتەرىن جان باسىنا قارجىلاندىرۋعا بىرتىندەپ كوشىرۋ 2023 جىلدان باستالادى. ا.ايماعامبەتوۆتىڭ ايتۋىنشا, وسى شارا قالا مەن اۋىل مەكتەپتەرى اراسىنداعى ساپا الشاقتىعىن دا شەشۋگە مۇمكىندىك بەرەتىن بولادى.
اقپارات جانە قوعامدىق دامۋ ۆيتسە-ءمينيسترى سەرىك ەگىزباەۆ پرەزيدەنت جولداۋىن ىسكە اسىرۋ بويىنشا قازاقستاندا اۋىلدىق جەرلەردەگى ازاماتتىق باستامالاردى قولداۋ تەتىگى ازىرلەنۋ ۇستىندە ەكەنىن ايتتى.
جالپىۇلتتىق جوسپار ازىرلەنەدى
ماسەلەنى ۇكىمەت باسشىسى اسقار مامين قورىتىندىلادى. «مەملەكەت باسشىسى ەلىمىزدىڭ ودان ءارى الەۋمەتتىك-ەكونوميكالىق دامۋىنىڭ نەگىزگى باسىمدىقتارىن بەلگىلەپ بەردى. پرەزيدەنتتىڭ العا قويعان مىندەتتەرى مەن باستامالارى قوعامنىڭ سۇرانىسى مەن زاماناۋي سىن-تەگەۋرىندەرگە نەگىزدەلگەن. ونىڭ ىسكە اسىرىلۋى ەكونوميكانىڭ ورنىقتىلىعى مەن باسەكەگە قابىلەتتىلىگىن ودان ءارى ارتتىرۋدىڭ, حالىقتىڭ ءال-اۋقاتىنىڭ ارتۋى مەن تۇرمىس ساپاسىنىڭ جاقسارۋىنىڭ فاكتورلارىنا اينالماق», دەدى ا.مامين.
پرەمەر-مينيستر جولداۋدى ىسكە اسىرۋ ۇكىمەتتىڭ ناقتى ءارى ۇيلەسىمدى ءىس-قيمىلىن تالاپ ەتەتىنىن اتاپ ءوتتى. ۇكىمەت باسشىسى جولداۋدىڭ نەگىزگى باسىمدىقتارىنىڭ ءبىرى ازاماتتاردىڭ الەۋمەتتىك كوڭىل كۇيىن جاقسارتىپ, ءال-اۋقاتىن ارتتىرۋ ەكەنىن اتاپ ءوتتى. العا قويىلعان مىندەتتەردى شەشۋ حالىقتىڭ ناقتى تابىسىن, دەنساۋلىق ساقتاۋ جانە ءبىلىم بەرۋ جۇيەلەرىنىڭ تيىمدىلىگىن ارتتىرۋعا, ەڭبەك نارىعىنداعى احۋالدى جاقسارتۋعا, شاعىن جانە ورتا بيزنەستى دامىتۋعا, شيكىزاتتىق ەمەس ەكسپورت پەن ونىمدىلىكتىڭ وسۋىمەن ەكونوميكانى ودان ءارى ارتاراپتاندىرۋعا, ماكروەكونوميكالىق تۇراقتىلىقتى نىعايتۋعا, تسيفرلاندىرۋ ارقىلى مەملەكەتتىك باسقارۋ جۇيەسىن جەتىلدىرۋگە ىقپال ەتەتىن بولادى.
پرەمەر-مينيستر ەلىمىزدىڭ ءاربىر وڭىرىندە ينفراقۇرىلىمدى جاڭعىرتۋعا, ءوڭىردىڭ ەرەكشەلىگىن ەسكەرە وتىرىپ, حالىقتىڭ تۇرمىس ساپاسى مەن تابىسىن ارتتىرۋ ءۇشىن نەعۇرلىم وزەكتى ماسەلەلەردى شەشۋگە باعىتتالعان ناقتى جوبالار ىسكە اسىرىلاتىنىن اتاپ ءوتتى. مەملەكەت باسشىسىنىڭ وڭىرلىك دامۋ بويىنشا العا قويعان مىندەتتەرى اۋماقتىق دامۋ جوسپارىندا كورىنىس تابادى. مەملەكەت باسشىسى جولداۋىنىڭ بارلىق باعىتتارىن ىسكە اسىرۋ بويىنشا بيىلعى 7 قىركۇيەككە دەيىن جالپىۇلتتىق جوسپار ازىرلەنىپ, پرەزيدەنتتىڭ بەكىتۋىنە ەنگىزىلەدى. ۇكىمەت باسشىسى ءار مەملەكەتتىك جانە جەرگىلىكتى اتقارۋشى ورگان مەملەكەت باسشىسىنىڭ تاپسىرمالارى مەن باستامالارىن ورىنداۋعا دەرەۋ كىرىسۋگە ءتيىس ەكەنىن اتاپ ءوتتى.
