مونيتورينگتىك توپتار وسى كەزەڭدە كارانتيندىك شەكتەۋ شارالارىن بۇزۋعا قاتىستى 812 حاتتاما ءتۇزىپ, دەپارتامەنتكە جولداعان. سوعان بايلانىستى شاعىن جانە ورتا بيزنەس نىساندارى مەن جەكە تۇلعالارعا اكىمشىلىك قۇقىقبۇزۋشىلىق تۋرالى كودەكسىنىڭ 425-بابىنىڭ 1-بولىگىمەن 540 ايىپپۇل سالىنىپ وتىر. تامىز ايى باستالعالى بەرى جۇرگىزىلگەن 830 رەيد كەزىندە 3 770 نىسان تەكسەرىلدى. كارانتين تالابىن بۇزۋشىلارعا قاتىستى 186 ماتەريال جيناقتالدى.
اتىراۋ قالالىق اكىمدىگى ءباسپاسوز قىزمەتى تاراتقان اقپاراتقا سۇيەنسەك, مونيتورينگتىك توپتار 13-19 تامىز ارالىعىندا ادام كوپ جينالاتىن 200-گە تارتا مەيرامحانا مەن وزگە دە نىسانداردا كارانتيندىك شەكتەۋ تالابى بۇزىلعانىن انىقتادى. تەكسەرۋ ناتيجەسىندە «اي-جان», «ايسبەرگ», «ايناش», Bellagio Ballroom مەيرامحانالارى, «ورتا», «گادجي 2», Sulo كافەلەرى, End ne stimz لوۋندج بار, SKY BAR تۇنگى كلۋبى, «مەكەن» دەمالىس ورنى, «لوتو كلۋب», «بالاجان» بالالار ويىن ساۋىق ورتالىعى, اۆانگارد-2 شاعىن اۋدانداعى الكوماركەت پەن س.بەيبارىس كوشەسىندەگى 99-ۇيدە ەسكەرتۋلەردى ەلەمەي, وتباسىلىق, وزگە ءىس-شارالاردى وتكىزىلگەنى بەلگىلى بولدى. بۇل نىسانداردىڭ كەيبىرى كارانتين شەكتەۋلەرىن جۇيەلى تۇردە بۇزىپ كەلەدى. سونداي-اق مەيرامحانانىڭ ارتقى ەسىگىنەن كىرىپ, قىز ۇزاتۋ, اۋلاعا توي جاساۋ, قۇدالىق وتكىزۋ, اس بەرۋ, تۋعان كۇن تويلاۋ سياقتى ءىس-شارالار ازايار ەمەس.
– مۇنايلى شاھار اكىمدىگى تاراپىنان قۇرىلعان 12 مونيتورينگ توبى ادامدار كوپ جينالاتىن مەيرامحانا مەن ءدامحانالاردى كۇن سايىن تەكسەرەدى. مونيتورينگ توپتارى سوڭعى ءۇش كۇندە 100-دەن استام ورىندى تەكسەردى. ناتيجەسىندە, Royal Hall, «يمپەراتور» مەيرامحانالارى, Café inn, Foodline, Ginza, «اققايىڭ» ءدامحانالارى, Sky بارى, Wine Time, «دونەرستان», Neft street food تاماقتانۋ ورىندارى مەن «بر-2» سەرۋەندەۋ كەمەسىندە كارانتين شەكتەۋى بۇزىلعان. ال المالى اۋىلدىق وكرۋگىندە 50-دەن استام ادام جينالعان وتباسىلىق ءىس-شارا توقتاتىلدى, – دەپ حابارلادى اكىمدىكتىڭ ءباسپاسوز قىزمەتى.
مۇنداي دەرەكتىڭ بار ەكەنىن وبلىستىق پوليتسيا دەپارتامەنتىنىڭ ءباسپاسوز قىزمەتى دە راستاپ وتىر. دەرەككە جۇگىنەر بولساق, يساتاي اۋدانىندا جەتى ءموبيلدى توپ مۇشەلەرى ءارتۇرلى ءىس-شارا, توي تۇرىندەگى باسقوسۋ وتكىزگەن 15 دەرەكتى تىركەدى. ناقتىسىن ايتقاندا, «لوتو كلۋب» كەڭسەسى مەن 14 تۇرعىن ۇيىندە توي-دۋمان وتكىزىلگەن. قىزىلقوعا اۋدانىندا 6 ءىس-شارا مەن 4 توي وتكەن. اتىراۋ قالاسىنا تاياۋ ورنالاسقان دامبى اۋىلدىق وكرۋگىندە «ادينا» مەيرامحاناسىندا ءوتىپ جاتقان ۇيلەنۋ تويى توقتاتىلدى.
ءوزىنىڭ دە, وزگەنىڭ دە ومىرىنە قاۋىپ توندىرەتىن كوروناۆيرۋس ينفەكتسياسى ءورشىپ تۇرعان ساتتە ۇيلەنۋ تويىن دەمالىس بازاسىندا وتكىزەتىندەر دە بار. مونيتورينگ توپ مۇشەلەرى جايىق وزەنىنىڭ جاعالاۋىندا ورنالاسقان بەرەكە اۋىلىنداعى دەمالىس بازاسىنىڭ بىرىندەگى تويدى درون ارقىلى انىقتادى. اۋەدەن تۇسىرىلگەن ۆيدەودا دەمالىس بازاسىنىڭ اۋلاسىندا كوپ كولىكتىڭ تۇرعانى بايقالدى. توپ مۇشەلەرى دەمالىس بازاسىنا بارعاندا 90-عا جۋىق قوناقتىڭ قاتىسۋىمەن ۇيلەنۋ تويى ءوتىپ جاتقانىن تىركەدى. دەمالىس بازاسىنىڭ اكىمشىسى كارانتين شەكتەۋىنە قاراماستان سالتاناتتى ءىس-شارا وتەتىن نىساندى جالعا بەرگەنىن جوققا شىعارمادى.
كارانتيندىك شەكتەۋ تالابىنىڭ ورەسكەل بۇزىلۋىنىڭ كەسىرى بالالارعا ءتيىپ وتىر. وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ ءبولىم باسشىسى ايسۇلۋ دوسقاليەۆانىڭ ايتۋىنشا, بىلتىرعى 28 ناۋرىز بەن بيىلعى 17 تامىزعا دەيىنگى ارالىقتا 14 جاسقا دەيىنگى بالالار اراسىندا كوروناۆيرۋس ينفەكتسياسىن جۇقتىرۋدىڭ 3 839, جاسوسپىرىمدەر اراسىندا 1 242 جاعدايى تىركەلىپتى. قازىر قاۋىپتى ۆيرۋستىڭ تارالۋىنا بايلانىستى ەڭ جوعارى كورسەتكىش اتىراۋ قالاسى مەن جىلىوي اۋدانىندا, سونداي-اق تەڭىز كەن ورنىندا بايقالدى. وزگە اۋدانداردا كوروناۆيرۋس ينفەكتسياسىن جۇقتىرۋشىلار ءالى ازايعان جوق.
ماسەلەن, 25 تامىزدا وڭىردە 316 ناۋقاس انىقتالدى. ونىڭ ىشىندە اتىراۋ قالاسىندا – 180, تەڭىز كەن ورنىندا 42 ناۋقاس تىركەلدى. ال جىلىوي اۋدانىندا – 22, يساتايدا – 20, يندەردە – 16, قۇرمانعازىدا –12, قىزىلقوعادا – 10, ماحامبەتتە – 10, ماقات اۋدانىندا 4 ادامنان قاۋىپتى ۆيرۋستىڭ بەلگىسى تابىلدى.
– قازىر 8 469 ادام ءۇي جاعدايىندا ەمدەلىپ جاتىر. اۋدانداردا اشىلعان ينفەكتسيالىق ستاتسيونارلاردا – 316, تەڭىز كەن ورنىنداعى ستاتسيوناردا – 316, مودۋلدىك اۋرۋحانادا – 188, №2 وبلىستىق اۋرۋحانادا – 177, وبلىستىق اۋرۋحانادا – 111, كارديولوگيالىق ورتالىقتا – 100, تەمىر جول اۋرۋحاناسىندا 90 ناۋقاس وقشاۋلاندى. سونداي-اق فتيزيوپۋلمانولوگيالىق ورتالىقتا 59, ستاتسيونارعا لايىقتالعان جاتاقحانادا 81 پاتسيەنت ەم قابىلداۋدا, – دەپ ءمالىم ەتتى وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتىنەن.
ينفەكتسيالىق ستاتسيونارلاردىڭ جانساقتاۋ بولىمىندە كوروناۆيرۋس ينفەكتسياسىن جۇقتىرىپ, جاعدايى ناشارلاعان 101 ناۋقاس جاتىر. ونىڭ ىشىندە ءبىر جۇتىم اۋاعا زار بولعان 11 پاتسيەنت وكپەنى جاساندى جەلدەتۋ اپپاراتىنا قوسىلعان. بۇل بولىمدەگى جۇكتەمە 82,1 پايىزدى قۇراپ وتىر.
