وڭتۇستىك سۋدان ۇكىمەتى ەرەۋىلشىلەرمەن بەيبىت كەلىسىمگە كەلدى. بۇل تۋرالى 24.kz حابارلادى.
ەفيوپيا استاناسى ادديس-ابەبا قالاسىندا شىعىس افريكانىڭ دامۋىنا ارنالعان ۇكىمەتارالىق ۇيىم باستاماسىمەن وتكىزىلگەن كەلىسسوزدە تاراپتار ءبىر اي بويى جالعاسىپ كەلە جاتقان قيان-كەسكى ۇرىستاردى توقتاتۋعا ۋاعدالاستى. بىرنەشە كۇن بۇرىن اتالعان ۇيىم وكىلدەرى بىتىمگەرشىلىك وپەراتسياسى اياسىندا وڭتۇستىك سۋدانعا 5,5 مىڭ سارباز جىبەرەتىنىن مالىمدەگەن ەدى.
ەستەرىڭىزگە سالا كەتەيىك, سۋدانداعى ۇلتارالىق قاقتىعىس ءبىر اي بۇرىن باستالعان بولاتىن. ەلدە ۇستەمدىك ەتىپ وتىرعان دينكا تايپاسى, ونىڭ باسشىسى سالۆاتورە كير, سونىمەن قاتار, نۋەر تايپاسى مەن ونىڭ كوسەمى ريەك ماچار بيلىك ءۇشىن ءوزارا كۇرەسكە ءتۇستى.
Lenta.ru سايتىنىڭ حابارلاۋىنشا, 2011 جىلى سۋداننان تاۋەلسىزدىك العان وڭتۇستىك سۋدان مەملەكەتىندەگى ازاماتتىق سوعىستان بىرنەشە مىڭ ادام قازا تاپقان. ال بۇۇ مۇنداعى 400 مىڭ بەيبىت تۇرعىننىڭ ۇيلەرىن تاستاپ, شەتەل اسىپ كەتۋگە ءماجبۇر بولعانىن مالىمدەگەن ەدى.
«ءبىز قارۋلى قاقتىعىستاردى دوعارۋ تۋرالى كەلىسىمگە قول قويدىق. بىراق, ەلدەگى اتىس-شابىستى توقتاتۋ قيىن بولادى, ويتكەنى كوتەرىلىسشىلەردىڭ كوبىسى قاراپايىم تۇرعىندار. ولار اسكەري ءتارتىپتى, ەرەجەنى بىلە بەرمەيدى. ءدال وسى ازاماتتاردىڭ بۇيرىققا كونبەۋى مۇمكىن دەپ قورقامىن», – دەيدى وڭتۇستىك سۋدان ۇكىمەتى دەلەگاتسياسىنىڭ جەتەكشىسى نيال دەنگ.
ايدار ورىسباەۆ.
دەرەككوز: 24.kz
فوتو: Lenta.ru
