بۇۇ-نىڭ مامانداندىرىلعان مەكەمەسى بولىپ تابىلاتىن ILO ساراپشىلارىنىڭ دەرەكتەرى بويىنشا, قازىرگى ۋاقىتتا الەم حالقىنىڭ تەك 47%-ى عانا الەۋمەتتىك ساقتاندىرۋمەن قامتىلعان, ال 4,1 ميلليارد ادام ۇلتتىق الەۋمەتتىك قورعاۋ جۇيەلەرىنەن ەشقانداي ساقتاندىرۋ تولەمدەرىن المايدى.
بايانداما اۆتورلارى الەۋمەتتىك قورعاۋ سالاسىنداعى ماڭىزدى ايماقتىق تەڭسىزدىككە ەرەكشە نازار اۋداردى. ەۋروپا مەن ورتالىق ازيادا الەۋمەتتىك ساقتاندىرۋمەن تۇرعىنداردىڭ 84%-ى قامتىلعان, بۇل الەمدەگى ەڭ جوعارى كورسەتكىش بولىپ تابىلادى. امەريكادا بۇل قامتۋ 64,3%, ازيا-تىنىق مۇحيتى ايماعىندا - 44%, اراب ەلدەرىندە - 40%, افريكادا - 17% قۇرايدى.
ء«بىز ءتيىمدى جانە جان-جاقتى الەۋمەتتىك قورعاۋ تەك الەۋمەتتىك ادىلەتتىلىك پەن لايىقتى ەڭبەكتى عانا ەمەس, سونىمەن بىرگە تۇراقتى بولاشاقتى قامتاماسىز ەتۋدىڭ ماڭىزدى قۇرالى ەكەنىن مويىنداۋىمىز قاجەت», دەيدى ILO باس ديرەكتورى گاي رايدەر.
سونداي-اق, قۇجاتتا الەمدەگى بالالاردىڭ باسىم كوپشىلىگى ءالى دە ءتيىمدى الەۋمەتتىك قورعاۋدان ايىرىلعاندىعى كورسەتىلگەن. الەمدە تەك ءاربىر ءتورتىنشى بالا بەلگىلى ءبىر الەۋمەتتىك جاردەماقى نەمەسە جەڭىلدىكتەردى پايدالانادى. جاڭا تۋعان بالالارى بار ايەلدەردىڭ تەك 45%-ى عانا انالارعا ارنالعان اقشالاي جاردەماقى الادى.
مۇگەدەكتىك بويىنشا جاردەماقىنى دەنساۋلىعى ناشار ءاربىر ءۇشىنشى ادام السا, جۇمىسسىزدىق بويىنشا جاردەماقىمەن ودان دا از ادامدار قامتىلعان. ءىس جۇزىندە ونى الەمدەگى جۇمىسسىزداردىڭ تەك 18,6%-ى عانا الادى.
ساراپشىلاردىڭ ەسەپتەۋىنشە, حالىقتى بازالىق الەۋمەتتىك ساقتاندىرۋمەن تولىق قامتۋ ءۇشىن تابىسى از ەلدەرگە جىل سايىن وسى سالاعا 77,9 ميلليارد دوللار, ورتاشا كىرىسى بار مەملەكەتتەرگە - 362,9 ميلليارد, ال تابىسى جوعارى ەلدەرگە - 750,8 ميلليارد ينۆەستيتسيالاۋ قاجەت.
