ونلاين وتكەن ءباسپاسوز جيىنىندا پاۆلودار وبلىستىق بالالار جۇقپالى اۋرۋلار اۋرۋحاناسى ديرەكتورىنىڭ ينفەكتسيالىق ستاتسيونار جونىندەگى ورىنباسارى زەرە ساداقوۆا قازىرگى ۋاقىتتا كۆي جۇقتىرعان 56 بالا اۋرۋحانادا جاتقانىن ايتتى.
«بالالاردىڭ كوبى - 6 جاستان اسقاندار. 6 جاسقا دەيىنگى 20 بالا بار. 2 بالا جانساقتاۋ بولىمىنە جاتقىزىلعان. ولاردىڭ ءبىرى - 15 جاستاعى بالا. ول جۇيكەلىك سيندروم بويىنشا بۇرىننان ەسەپتە تۇرعان, باسقا اۋرۋى بار. اۋرۋحاناعا 26 تامىزدا تۇسكەن بولاتىن. بۇگىن نەگىزگى بولىمگە اۋىستىرىلۋدا», دەدى زەرە ساداقوۆا.
سپيكەردىڭ ايتۋىنشا, جانساقتاۋ بولىمىندەگى ەكىنشى بالا - 1 جاستا. نارەستە 18 كۇننەن بەرى رەانيماتسيادا جاتىر.
«كىشكەنتاي بالادا كوروناۆيرۋستىق پنەۆمونيا بولعان. وكپەسىنىڭ 36 پايىزى زاقىمدانعان. جاعدايى جاقسارىپ كەلە جاتقان بولاتىن. بىراق سوڭعى 2 كۇندە ناشارلاۋدا. ول كوكىرەكارالىققا اۋا جيىلۋىنا بايلانىستى. بۇنداي جاعداي سيرەك كەزدەسەدى. بالا وكپەنى جاساندى جەلدەتۋ اپپاراتىنا قوسىلعان. تولىق كولەمدە ەمدەۋ قابىلداۋدا», دەدى زەرە ساداقوۆا.
ايتا كەتەيىك, بۇگىندە پاۆلودار وبلىسىندا كۆي انىقتالعان بارلىعى 144 بالا ەم قابىلداۋدا. سونداي-اق كوروناۆيرۋس جۇقتىرعان 32 جۇكتى ايەل اۋرۋحانادا جاتىر. 6 ايەل اۋىر جاعدايدا.
