كوروناۆيرۋس ىندەتىن, ونىڭ قاۋپىن امان-ەسەن ەڭسەرۋ, بارلىق بيۋدجەتتىك قىزمەتكەرلەردىڭ جالاقىسىن ءوسىرۋ, شاعىن جانە ورتا بيزنەستى قولداۋ, ساياسي رەفورمالاردى جالعاستىرۋ, جاستاردى ىنتالاندىرۋ, باسقا دا كەزەك كۇتتىرمەيتىن شارۋالار قولعا الىنباق.
ەرەكشە اتاپ وتەرلىگى – ءسوز بولعان ءاربىر مىندەت جالپىلاما ۋادە ەمەس, ناقتى ساندارمەن, قابىلدانۋعا ءتيىس زاڭدىق اكتىمەن تولىقتىرىلعانى. ولاي بولسا, ولاردىڭ ىسكە اسۋىن قوعام ءوزى باقىلاي الادى.
ورنىعا باستاعان وسى تاجىريبە قازىردىڭ وزىندە وڭ ناتيجەلەرىن بەرىپ وتىر. ماسەلەن, وتكەن جىلعى جولداۋدا بەرىلگەن تاپسىرمالار جەمىسىن بۇگىندە كوپتەگەن ازاماتىمىز سەزىنىپ ۇلگەردى. ولاردىڭ ىشىندە جالاقىسى 25-50 پايىزعا وسكەن ۇستازدار مەن دارىگەرلەر, زەينەتاقى قورىنداعى قارجىسىن پايدالانۋ ارقىلى ءبىر ميلليوننان استام وتانداسىمىز تۇرعىن ءۇي جاعدايىن جاقسارتىپ العانى, پارتياعا كىرمەي-اق جەكە تۇلعالاردىڭ سايلاۋعا ءتۇسۋى سياقتى يگى ىستەر از ەمەس.
دەسە دە بيىلعى جولداۋ تەك اعىمداعى ماسەلەلەردى شەشۋ عانا ەمەس, سونداي-اق بولاشاققا قاراي بوي تۇزەگەن ىستەردىڭ جوسپارى بولىپ سانالادى. بۇل باعىتتا دا تالاي باتىل دا زاماننىڭ تالابىنا ساي مىندەتتەر قويىلدى.
سولاردىڭ ىشىندە وزىمە ەرەكشە ۇناعان ۇشەۋىن عانا اتاپ وتكىم كەلەدى. ءبىرىنشىسى, 2025 جىلعا قاراي جاڭادان 1000 مەكتەپ اشۋ. ەكىنشىسى, باسەكەگە قابىلەتتى IT سالاسىنىڭ 100 مىڭ مامانىن دايارلاۋ. ءۇشىنشىسى, قازاقستاننىڭ 10 ءىرى قالاسىن, الماتىنى قوسقاندا, ەكولوگياعا زياندى كومىردەن گاز بەن جاسىل قۋات كوزدەرىنە اۋدارۋ.
راسۋل جۇمالى,
ساياساتتانۋشى
