بۇل ءوز كەزەگىندە جاڭا ساياسي ماۋسىمدى جاڭا مىندەتتەر كۇتىپ تۇرعاندىعىن, ولاردىڭ جۇزەگە اسىرىلۋىنا بيلىكتىڭ بارلىق تارماعى جاۋاپتى ەكەندىگىن اڭعارتادى جانە حالىقتىڭ ورتالىق مەملەكەتتىك ورگانداردىڭ جۇمىسىن باعالاۋى كوپ جاعدايدا جولداۋدا قويىلعان تاپسىرمالاردىڭ ءتيىستى دەڭگەيدە ورىندالۋىمەن تىكەلەي بايلانىستى.
بيىلعى جولداۋدىڭ باستى وزەگى بىلتىرعى جىلدان ءورشۋىن توقتاتپاي تۇرعان پاندەميادان كەيىنگى ەكونوميكالىق دامۋ, حالىقتىڭ ءال-اۋقاتىن ءارى قاراي دا جاقسارتۋعا بايلانىستى, جاڭا جاعدايداعى قازاقستاننىڭ ءىس-قيمىلدارىنا جان-جاقتى كوڭىل ءبولىنىپ, دامۋدىڭ ءبىر-بىرىمەن تىعىز بايلانىستاعى باسىم باعىتتارى ۇسىنىلدى.
مەملەكەت باسشىسى ەلىمىزدىڭ ستراتەگيالىق ماقساتى رەتىندە ورتالىق ازيا ايماعىنداعى كوشباسشى ءرولىن نىعايتۋ, الەمدىك ەكونوميكادا ءوز ورنىن ايقىن بەكىتۋ دەپ اتاپ ءوتۋى وسى باعىتتاعى تاۋەلسىزدىكتىڭ 30 جىلىندا جەتكەن جەتىستىكتەردى ودان ءارى جەتىلدىرۋ, قازىرگى جاھاندىق ساياساتتا قالىپتاسقان احۋالعا ۋاقتىلى, جەدەل جانە كاسىبي تۇردە تويتارىس بەرۋ قاجەت ەكەندىگىن كورسەتەدى.
«اۋعانستانداعى جاعداي, جاھاندىق شيەلەنىستىڭ ارتۋى قورعانىس-ونەركاسىپتىك كەشەن مەن اسكەري دوكترينانى قايتا جۇكتەۋ مىندەتىن قويدى. قورعانىس قابىلەتىن نىعايتۋ, تيىمدىلىكتى ارتتىرۋ, قاتەرلەرگە قارسى ارەكەت ەتۋ دە مەملەكەتتىك ماڭىزى بار باسىمدىقتارعا اينالۋعا ءتيىس», دەدى ق.توقاەۆ قازاقستان حالقىنا جىل سايىنعى جولداۋىندا. وسىعان دەيىنگى اسكەري دوكترينا 2017 جىلى بەكىتىلگەن بولاتىن.
اۋعانستانداعى قازىرگى احۋال جالپى الەمنىڭ, سونىڭ ىشىندە قازاقستاندىق قوعامنىڭ دا الاڭداۋشىلىعىن تۋدىرۋدا. بۇل ەلدە بەيبىتشىلىك پەن تۇراقتىلىقتىڭ ورناۋىنا ورتالىق ازيا ايماعى ەلدەرى مۇددەلى. ايتا كەتەرلىگى, بولىپ جاتقان وقيعالار قازاقستانعا تىكەلەي قاۋىپ توندىرمەيدى, بىراق, ارينە, ولار بەلگىلى ءبىر تاۋەكەلدەردى تۋدىرادى.
بۇل ءوز كەزەگىندە ەلىمىزدەگى جاعدايدىڭ كۇردەلى سيپاتتا وربۋىنە دايىن بولۋىن تالاپ ەتەدى, قازاقستاننىڭ جانە ايماقتىڭ قاۋىپسىزدىگىنە سىرتقى سىن-قاتەرلەردى مودەلدەۋدىڭ وزەكتىلىگىن بايقاتادى. قورعانىس سالاسىندا ولقىلىقتاردىڭ بار ەكەندىگىن تاياۋ اراداعى جامبىل وبلىسىندا بولعان وقيعا دا ايقىن كورسەتتى.
اسەل نازاربەتوۆا,
قازاقستان پرەزيدەنتى جانىنداعى قسزي ءبولىم باسشىسى
