قۇجاتتا ناقتى كورسەتىلگەن 5 نەگىزگى باستامانىڭ ىشىندە ءبىزدىڭ كوڭىلىمىزدەن شىققانى – پرەزيدەنتتىڭ مادەنيەت قىزمەتكەرلەرى, مۇراعاتشىلار, كىتاپحاناشىلار, تەحنيكالىق قىزمەتكەرلەر, قورىقشىلار, كولىك جۇرگىزۋشىلەرى سەكىلدى قاراپايىم ەڭبەك ادامدارىنىڭ جالاقىسىن جىل سايىن ورتا ەسەپپەن 20 پايىزعا ءوسىرۋ تۋرالى تاپسىرماسى. مەملەكەت باسشىسى بۇل باستامانىڭ يگىلىگىن تۇتاستاي العاندا 600 مىڭ قازاقستاندىق كورەتىنىن اتاپ ءوتتى.
سونىڭ ىشىندە ءبىلىم سالاسىنداعى مادەني, مەديتسينالىق, تەحنيكالىق قىزمەتكەرلەردىڭ, كىتاپحاناشىلاردىڭ ايلىق جالاقىسىن كوتەرۋگە قاتىستى وتە قاجەتتى, وڭتايلى ۇسىنىستار ايتىلدى. ءبىز بۇل ماسەلەنى دەپۋتاتتىق ساۋال ارقىلى كوتەرگەنبىز. ويتكەنى وڭىرلەردى ارالاعان كەزىمىزدە ءدال وسى ساناتتاعى ەڭبەك ادامدارى ماردىمسىز ەڭبەكاقىلارى جونىندە ماسەلە كوتەرىپ, جاعدايلارىن ايتقان ەدى. جولداۋدا وسى قىزمەتكەرلەردىڭ جالاقىسى كەزەڭ-كەزەڭمەن كوتەرىلەدى دەپ ناقتى ايتىلدى. بۇل – وتە قۇپتارلىق جايت.
ەڭ باستىسى – ءبىلىم سالاسى الداعى ۋاقىتتا باسەكەلەستىككە قابىلەتتىلىك تۇرعىسىنان ءبىر قادام الدا ءجۇرۋى كەرەك ەكەنىنە ەرەكشە ءمان بەرىلدى. بۇل تۇرعىدا تسيفرلى تەحنولوگيالاردى تەرەڭ دامىتۋ قاجەتتىگى ايتىلدى. بۇل – ءبىرىنشى ماسەلە.
ەكىنشى ماسەلە – قازىرگى تاڭدا ءبىلىم بەرۋ ۇيىمدارىنداعى ورىن تاپشىلىعى 200 مىڭنان جوعارى. الداعى 5 جىلدا بۇل سان ميلليونعا جەتۋى مۇمكىن. وسىعان وراي Nur Otan پارتياسىنىڭ جول كارتاسىندا الداعى ۋاقىتتا 800 مەكتەپ سالۋ ەسەبىنەن ءۇش اۋىسىمدى جانە اپاتتىق جاعدايداعى مەكتەپتەر پروبلەماسىن شەشۋ قاراستىرىلعان بولاتىن. ەندى جاڭادان سالىناتىن مەكتەپتەر سانىن مىڭعا جەتكىزۋ ۇيعارىلىپ وتىر. بۇل – وتە دۇرىس شەشىم ەكەندىگى ءسوزسىز.
قوسىمشا ءبىلىمدى دامىتۋ دا ۇلكەن ماسەلە. ايتالىق, بالا ءوز مەكتەبىنەن باسقا جەرگە بارماي, جولعا ۋاقىتىن كەتىرمەي, ءبىلىم الىپ وتىرعان وشاعىندا وزىنە قاجەتتى داعدىلارىن, عىلىمعا, شىعارماشىلىققا جول اشار قاسيەتتەرىن دامىتاتىن بولسا, وسىنىڭ ءوزى تاربيە سالاسىنداعى كوپتەگەن ماسەلەلەردى شەشۋگە نەگىز بولار ەدى. سوندىقتان دا ءوز باسىم مىڭ مەكتەپ سالۋ باستاماسىن قۋانا قابىلدادىم.
جۇلدىز سۇلەيمەنوۆا,
ءماجىلىس دەپۋتاتى
