ەلىمىزدە ساياسي رەفورمالار ءىس-جۇزىنە اسىرىلا بەرەدى. اۋىل اكىمدەرىنىڭ سايلاۋى اياقتالعاننان كەيىن, 2024 جىلى اۋدان اكىمدەرىنىڭ سايلاۋى وتەدى. ايەلدەر مەن جاستارعا ارنالعان 30-پايىزدىق كۆوتانى دەپۋتاتتىق مانداتتاردى بولگەن كەزدە ساقتاۋ زاڭ بويىنشا تالاپ ەتىلەدى. مۇمكىندىگى شەكتەۋلى جاندارعا پارتيالىق كۆوتا بەلگىلەۋ ايتىلدى. بۇل – وتە وزەكتى ماسەلە. وسى پروبلەمانى كوپتەگەن ازامات كوتەرگەن بولاتىن.
مەملەكەتتىك ءتىل جونىندە دە تۇششىمدى ويلار ايتىلدى. قازاقستاندا مەملەكەتتىك ءتىل – قازاق ءتىلى. مەملەكەتتىك ءتىلدى ءبىلىپ, مەڭگەرۋ – ءاربىر قازاقستاندىقتىڭ پارىزى جانە مىندەتى. مەملەكەت قازاق ءتىلىنىڭ قولدانۋ اياسىن ارتتىرۋدى جالعاستىرا بەرەدى. بۇل قادامدار ديالوگ پەن كەلىسىم رەجىمىندە ءىس-جۇزىنە اسىرىلۋعا ءتيىس.
بۇل جولداۋدى پاندەميا جاعدايىندا حالقىمىزدىڭ الەۋمەتتىك جاعدايىن تۇراقتى ۇستاپ تۇرىپ, جاقسارتۋدىڭ توتە جولى دەۋگە بولادى. مەنىڭ ويىمشا, جولداۋداعى جاڭالىقتىڭ ءبىرى – ەڭ تومەنگى جالاقى مولشەرىنىڭ ارتۋى. ول 2022 جىلدىڭ 1 قاڭتارىنان باستاپ 60 مىڭ تەڭگەگە دەيىن وسەدى. بۇل شارا حالقىمىزدىڭ 2 ملن ازاماتىنىڭ تۇرمىس جاعدايىن جاقسارتادى.
مادەنيەت, مۇراعات سالاسى قىزمەتكەرلەرىنىڭ, كىتاپحاناشىلاردىڭ جالاقىسى 2025 جىلعا دەيىن جىل سايىن 20 پايىزعا وسەدى. ازاماتتىق قىزمەتشىلەردىڭ جالاقىسىن ارتتىرۋ دا وتە ماڭىزدى. ويتكەنى مەملەكەتتىك قىزمەتشىلەردىڭ جالاقىسى كوبەيگەندە بۇل سالا ماماندارىنىڭ ەڭبەكاقىسى كوتەرىلمەي قالىپ وتىردى. ەندى وسى كۇنگە دە جەتتىك, ازاماتتىق قىزمەتكەرلەردىڭ جالاقىسى وسپەك.
ەلىمىزدە 6,5 ملن ادام – جالدامالى قىزمەتكەرلەر. وسى ازاماتتاردىڭ جالاقىسىن جۇيەلى تۇردە ارتتىرۋ ءۇشىن بيزنەسكە ىنتالاندىرۋ شارالارى جاسالادى. بۇل دا حالقىمىزدىڭ الەۋمەتتىك ستاندارتتارىن ارتتىرىپ, دامىتۋ ءۇشىن ماڭىزدى قادام.
باستى ماسەلە – ساياسي پليۋراليزم, قوعامدىق رەفورمالار سالماقتى-ساليقالى, ەۆوليۋتسيالىق تۇردە ءجۇرۋى كەرەك. مەملەكەت باسشىسى قاسىم-جومارت توقاەۆ الەۋمەتتىك ادىلەتتىلىك پرينتسيپتەرى بۇلجىماس باعىتىمىز ەكەندىگىن تاعى ءبىر قۋاتتاپ بەردى.
ەرلان سايروۆ,
ءماجىلىس دەپۋتاتى
