بيىلعى جولداۋ – ءوزىنىڭ ءمانى مەن مازمۇنى جاعىنان مەملەكەتتىك ورگاندار, بيزنەس جانە ازاماتتىق قوعام ينستيتۋتتارى ءۇشىن الداعى كەزەڭگە ارنالعان ءىس-قيمىلداردىڭ تۇتاس ستراتەگياسىن ايقىندايتىن ايرىقشا قۇجات.
پرەزيدەنتتىڭ 2021 جىلعى قازاقستان حالقىنا جولداۋى مەملەكەت باسشىسىنىڭ بۇرىنعى جولداۋلارىندا ايتقان تاپسىرمالارىنىڭ قيسىندى جالعاسى, سونداي-اق ولاردىڭ تابىستى جۇزەگە اسىرىلعانىنىڭ ناتيجەسى ەكەنىن اتاپ ءوتۋ قاجەت.
جولداۋ مەملەكەتتىڭ پاندەميادان كەيىن ەلدى ەكونوميكالىق دامىتۋدىڭ ويلاستىرىلعان باعدارلاماسى بار ەكەنىن كورسەتتى, ول 2025 جىلعا دەيىنگى دامۋدىڭ جول كارتاسىندا كورىنىس تاباتىن بولادى.
مەملەكەت باسشىسى تاياۋداعى ونجىلدىقتىڭ كۇردەلى بولاتىنىن اشىق ايتتى, سونىمەن بىرگە الداعى مىندەتتەردى شەشۋ جونىندەگى مەملەكەتتىك الەۋمەتتىك-ەكونوميكالىق ساياساتتىڭ ۇزاق مەرزىمدى جانە قىسقا مەرزىمدى باسىمدىقتارىن بەلگىلەدى.
پرەزيدەنتتىڭ ءبىزدىڭ ەلىمىزدىڭ ءاربىر ازاماتىنا تىكەلەي قاتىسى بار, ءار قازاقستاندىقتىڭ مۇددەسىنە ءسوزسىز اسەر ەتەتىن ماڭىزدى تاپسىرمالارى دەر كەزىندە ايتىلىپ وتىر.
ولاردىڭ قاتارىندا, جولداۋدىڭ ەكونوميكالىق بلوگىنداعى – مەملەكەتتىك قارجىنى باسقارۋ جانە ۇلتتىق قوردى دامىتۋ تۇجىرىمداماسى, «قاراپايىم زاتتار ەكونوميكاسى» جانە «بيزنەستىڭ جول كارتاسى» باعدارلامالارىن ۇزارتۋ, تسيفرلى ۇكىمەتتىڭ جاڭا ارحيتەكتۋراسى قازاقستاندىقتاردىڭ ءومىر ءسۇرۋ ساپاسىن ارتتىرۋعا باعىتتالعان.
كوشى-قون ساياساتىنىڭ, قونىس اۋدارۋشىلاردى ىنتالاندىرۋدىڭ جاڭا تۇجىرىمداماسىن ازىرلەۋ حالىقتى ەتنودەموگرافيالىق تۇرعىدا ۇتىمدى ورنالاستىرۋعا ىقپال ەتەدى, ونىڭ ىشىندە ەتنوستار جيناقى قونىستانعان جەرلەردە بىرقاتار الەۋمەتتىك-ەكونوميكالىق جانە ەتنوسارالىق ماسەلەلەردى شەشۋگە كومەكتەسەدى جانە ءوزارا ءىس-قيمىلدىڭ كوپتەگەن ەتنوالەۋمەتتىك اسپەكتىلەرىن جويادى.
مەملەكەتتىڭ الەۋمەتتىك ساياساتى ەلىمىزدەگى ساياسي تۇراقتىلىقتىڭ, بىرلىكتىڭ, ۇلتارالىق تاتۋلىق پەن كەلىسىمنىڭ نەگىزى جانە سولاي بولىپ قالا بەرەدى. سوندىقتان جولداۋدىڭ الەۋمەتتىك بلوگىن ءبىز وسى تۇرعىدا قاراستىرۋىمىز كەرەك.
جولداۋدىڭ الەۋمەتتىك مىندەتتەرىن جۇزەگە اسىرۋ حالىقتىڭ ناقتى كىرىستەرىنىڭ وسۋىنە, جۇزدەگەن مىڭ ازاماتىمىزدى مەملەكەتتىڭ الەۋمەتتىك كەپىلدىكتەر جۇيەسىنە قوسۋعا قۋاتتى سينەرگيا بەرەدى.
جولداۋدىڭ باستى تاقىرىپتارىنىڭ ءبىرى كوپەتنوستى ەلىمىزدەگى بىرلىك, تاتۋلىق پەن كەلىسىمگە ارنالدى.
بۇل جەردە مەملەكەت باسشىسى بارلىق باسىمدىقتار مەن ەكپىندەردى وتە ايقىن جانە انىق قويىپ وتىر. جولداۋدا ۇلتارالىق قاتىناستاردىڭ ۇيلەسىمدى دامۋى قاشاندا مەملەكەت ساياساتىنىڭ نەگىزگى باعىتتارىنىڭ ءبىرى بولعانى جانە بولا بەرەتىنى اتاپ كورسەتىلدى. «بۇل – بەكەرگە ايتىلعان ءسوز ەمەس. مۇنداي ۇستانىمدى قازاقستاندىقتاردىڭ باسىم كوپشىلىگى قولدايدى», دەدى مەملەكەت باسشىسى.
پرەزيدەنت ازاماتتاردىڭ كونستيتۋتسيالىق قۇقىقتارىنىڭ كەپىلى رەتىندە زاڭ بويىنشا قازاقستاندا ءبىر عانا مەملەكەتتىك ءتىل بار ەكەنىن, بىراق ءبىزدىڭ زاڭناماعا سايكەس ورىس ءتىلىنىڭ قولدانىلۋىنا كەدەرگى كەلتىرۋگە بولمايتىنىن ناقتى اتاپ ءوتتى. بۇل ۇستانىم تەك قانا قازاقستان زاڭناماسىنا عانا ەمەس, سونىمەن قاتار ەتنوسارالىق قاتىناستاردىڭ ۇيلەسىمدىلىگىن قامتاماسىز ەتەتىن, تاۋەلسىزدىك جىلدارىندا سىننان وتكەن ءتىل ساياساتىنىڭ وڭ تاجىريبەسىنە سايكەس كەلەدى.
مەملەكەت باسشىسى قازاق ءتىلىن دامىتۋ مەملەكەتتىك ساياساتتىڭ باسىم باعىتتارىنىڭ ءبىرى بولىپ قالا بەرەتىنىن ايتتى. بۇل كوزقاراستى قازاقستاننىڭ بارلىق ازاماتتارى قولدايتىنى ءسوزسىز.
قازاقستان پرەزيدەنتى ءبىزدىڭ ازاماتتارىمىز ءۇشىن كەلىسىم, تولەرانتتىلىق – مادەنيەتتەر مەن تىلدەردىڭ ءوزارا كىرىگۋىنە بايلانىستى ءومىردىڭ شىندىعى ەكەنىن تاعى دا ەسكە سالدى.
ەكىنشى جاعىنان, مەملەكەت باسشىسى راديكاليزمنىڭ كەز كەلگەن تۇرىنە قاتاڭ تويتارىس بەرىلەتىنىن, قازاقستاننىڭ مەملەكەتتىك ەگەمەندىگى مەن اۋماقتىق تۇتاستىعىنا ەشكىمنىڭ قول سۇعۋىنا جول بەرىلمەيتىنىن باسا ايتتى.
ارينە, مۇنداي ۇستانىم ەل تۇرعىندارىنىڭ كوپشىلىگىنىڭ مۇددەلەرىنە ساي كەلەدى, ولار ءۇشىن تاتۋلىق پەن كەلىسىم – قاۋىپسىز ءومىر ءسۇرۋ, تۇراقتىلىق پەن دامۋ مۇمكىندىگىنىڭ العىشارتى.
پرەزيدەنتتىڭ بارلىق ازامات ەتنوسارالىق جانە كونفەسسياارالىق قاتىناستاردىڭ قانشالىقتى ماڭىزدى ەكەنىن ءتۇسىنۋى كەرەك دەگەن ويىنىڭ ماڭىزى زور.
بۇل تۇرعىدا جولداۋدىڭ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» دەگەن اتاۋىنىڭ ءوزى كوپ نارسەنى اڭعارتادى.
جولداۋدىڭ ماڭىزدى اسپەكتىلەرىنىڭ ءبىرى – تاۋەلسىزدىكتىڭ 30 جىلىندا قازاقستاننىڭ تۇڭعىش پرەزيدەنتى – ەلباسى ن.ءا.نازارباەۆ جۇزەگە اسىرعان بەيبىتشىلىك, قوعامدىق كەلىسىم جانە جالپىۇلتتىق بىرلىك ساياساتىنداعى ستراتەگيالىق ساباقتاستىقتى قامتاماسىز ەتۋى.
سونىمەن قاتار مەملەكەت باسشىسىنىڭ ءسوزى وسى ساياساتتىڭ ىرگەلى قاعيداتتارى مەن نەگىزدەرىنەن اۋىتقىماي, جاڭا تاريحي جاعدايلاردا شىعارماشىلىق تۇرعىدان دامىپ كەلە جاتقانىن ايقىن كورسەتتى.
جالپى العاندا, مەملەكەت باسشىسى حالىقتىڭ الەۋمەتتىك جاعدايى مەن ءومىر ءسۇرۋ ساپاسىن جاقسارتۋ بويىنشا تەڭدەسسىز شارالاردى بەلگىلەدى. ولارعا قول جەتكىزۋ قوعامدا كەلىسىم مەن بىرلىك ساقتالعان جاعدايدا عانا مۇمكىن بولادى.
سوندىقتان جولداۋدىڭ ماقساتتارى مەن مىندەتتەرىنە قول جەتكىزۋ ءۇشىن قازاقستان حالقى اسسامبلەياسىنىڭ جۇمىسى وتە ماڭىزدى ەكەنىن, ونىڭ تاتۋلىق پەن كەلىسىمدى قامتاماسىز ەتۋدەگى, ەتنوسارالىق قاتىناستاردى ۇيلەستىرۋدەگى جانە ءبىزدىڭ بىرەگەيلىگىمىزدى نىعايتۋداعى ءرولىن بيىلعى جىلدىڭ ءساۋىر ايىندا وسى ماڭىزدى ينستيتۋتتى باسقارۋعا تاعايىندالعان پرەزيدەنت ق.ك.توقاەۆ ايرىقشا اتاپ ءوتتى.
قازاقستان حالقى اسسامبلەياسى جاڭا جولداۋدىڭ مىندەتتەرىن تولىق قولدايدى جانە ولاردى ىسكە اسىرۋعا بەلسەنە قاتىسادى.
بارلىق قازاقستاندىق مەجەلەنگەن ماقساتتارعا قول جەتكىزۋ ءۇشىن بىرىگۋى ءتيىس. مۇنىڭ ءبارى قازاقستانداعى تاتۋلىق پەن كەلىسىمنىڭ نەگىزى.
جولداۋدى ىسكە اسىرۋ قوعامدىق كەلىسىم مەن جالپىۇلتتىق بىرلىكتىڭ, ازاماتتاردىڭ ءال-اۋقاتىن ارتتىرۋدىڭ جانە وتانىمىزدىڭ وركەندەۋىنىڭ بەرىك كەپىلى بولاتىنىنا سەنىمدىمىن.
مارات ءازىلحانوۆ,
قازاقستان حالقى اسسامبلەياسى توراعاسىنىڭ ورىنباسارى –
پرەزيدەنت اكىمشىلىگى قحا حاتشىلىعىنىڭ مەڭگەرۋشىسى
