ال ەندى ءداستۇرلى «العاشقى قوڭىراۋ» سالتاناتى تەك ءبىرىنشى سىنىپ وقۋشىلارى ءۇشىن عانا وتەدى. بۇل كۇنى بالدىرعاندارعا احمەت بايتۇرسىن ۇلىنىڭ ادىستەمەسى نەگىزىندە ازىرلەنگەن «الىپپە» جانە «بۋكۆار» وقۋلىقتارى تابىس ەتىلەدى. سونىمەن بىرگە, 1 قىركۇيەكتە بارلىق مەكتەپتەردە «تاۋەلسىزدىك جەتىستىكتەرى» تاقىرىبىندا سىنىپ ساعاتتارىن وتكىزۋ جوسپارلانعان.
ال ەڭ باستى جاڭالىق – قاراعاندى وبلىسىندا جاڭا وقۋ جىلى ءداستۇرلى فورماتتا باستالماقشى. وقۋشىلاردىڭ مەكتەپ فورماسىن كيۋى مىندەتتى ەمەس: كلاسسيكالىق جانە ىسكەرلىك ۇلگىدەگى كيىمگە رۇقسات ەتىلەدى.
بيىلدان باستاپ 5-8-سىنىپ وقۋشىلارى ءۇشىن «پاراساتتىلىق جانە ەتيكا», «ەكولوگيا», «ەموتسيالىق اقىل-وي جانە سىني ويلاۋ», «مەدياساۋاتتىلىق» سىندى جاڭا كۋرستار ەنگىزىلمەك. بۇل جەردە تاڭداۋدى وقۋشىلاردىڭ وزدەرى جاسايدى.
الەۋمەتتىك وسال وتباسىلاردىڭ بالالارىنا دەگەن قامقورلىق بيىل دا جالعاسىن تابادى. بۇل ماقساتتا جالپىعا مىندەتتى وقۋ قورى ەسەبىنەن 22 مىڭنان استام وقۋشى مەكتەپ فورماسىمەن جانە كەرەك-جاراقتارمەن قامتاماسىز ەتىلەدى. سونىمەن قاتار 16 مىڭنان استام وقۋشىعا تەگىن تۇسكى اس بەرىلەدى. بيۋدجەتتەن بارلىق باستاۋىش سىنىپ وقۋشىلارىن تەگىن ىستىق تاماقپەن قامتاماسىز ەتۋگە قاراجات ءبولىندى. ال «مەكتەپكە جول» رەسپۋبليكالىق قايىرىمدىلىق اكتسياسى اياسىندا الەۋمەتتىك قولداۋعا مۇقتاج 3 899 بالاعا كومەك كورسەتىلگەن.
بيىل وبلىستاعى كوللەدجدەر دە ءداستۇرلى فورماتقا ورالاتىن بولدى. وقۋ-وندىرىستىك شەبەرحانالار مەن زەرتحانالار جۇمىسىن قايتا باستايدى. ستۋدەنتتەر جاتاقحاناعا ورنالاستىرىلادى.
وبلىستىق ءبىلىم باسقارماسىنىڭ باسشىسى گۇلسىم قوجاحمەتوۆا بارلىق ءبىلىم بەرۋ ۇيىمدارى Ashyq جوباسىنىڭ قاتىسۋشىلارى بولاتىنىن ايتادى. اتاپ ايتقاندا, بارلىق سانيتارلىق تالاپتار مۇلتىكسىز ورىندالاتىن بولادى. وقۋ باستالعاندا كابينەتتىك جۇيە الىنىپ تاستالادى جانە ءتۇرلى سىنىپتار ءۇشىن ءۇزىلىس ءارتۇرلى ۋاقىتقا بولىنەدى. ساباقتاردى بىرنەشە اۋىسىممەن وتكىزۋ دە قاۋىپسىزدىكتى ساقتاۋ شارالارىنىڭ ناتيجەسىندە تۋىنداعان.
جاڭا وقۋ جىلىندا ۇستازدار قاۋىمىنىڭ ۆاكتسينا الۋ ماسەلەسى دە ءجىتى نازاردا بولماق. ءبىلىم باسقارماسى بەرگەن رەسمي مالىمەتكە سەنسەك, قازىرگى ۋاقىتتا اتالعان ۆەدومستۆو قىزمەتكەرلەرىنىڭ 90%-دان استامى كوروناۆيرۋس ينفەكتسياسىنا قارسى ۆاكتسينا سالدىرعان ەكەن.
قاراعاندى وبلىسى
