قر ءبىلىم جانە عىلىم ۆيتسە-ءمينيسترى شولپان كارينوۆانىڭ ورتالىق كوممۋنيكاتسيلار قىزمەتىندە ايتقان مالىمەتى بويىنشا, جاڭا باستالعان وقۋ جىلىندا 7 400 مەكتەپتە 3,6 ملن وقۋشى ءداستۇرلى فورماتتا ساباق وقىپ باستايدى.
ونىڭ ىشىندە 380 مىڭعا جۋىق وقۋشى مەكتەپ تابالدىرىعىن ءبىرىنشى رەت اتتاپ وتىر. ال وقۋ جىلىنىڭ اياعىندا ۇلكەن ومىرگە قادام باساتىن تۇلەكتەر سانى –165 مىڭ.
جىل بويىندا 3,6 ملن وقۋشىعا جالپى جيىنى 367,7 مىڭ مۇعالىم ءبىلىم بەرەدى. ونىڭ ىشىندە 12 مىڭنان استام مۇعالىم ۇستازدىق ەڭبەك جولىن ەندى باستاعالى وتىر. ۇلتتىق ءبىلىم بەرۋ دەرەكتەرى بويىنشا, ەلىمىزدە 3 اۋىسىممەن ءبىلىم بەرەتىن 300-دەن استام مەكتەپ بار. بۇل ەلدەگى بارشا مەكتەپتەردىڭ 5 پايىزىنا تەڭ. باسقاشا ايتساق, وقۋشىلاردىڭ 19 پايىزى ءۇش اۋىسىممەن وقۋعا ءماجبۇر.
ءبىلىم جانە عىلىم مينيسترلىگىنىڭ ءباسپاسوز قىزمەتى بەرگەن مالىمەتكە سۇيەنسەك, تاۋەلسىزدىك جىلدارى قازاق تىلىندە وقىتاتىن 965 مەكتەپ ىسكە قوسىلىپ, جالپى سانى 3733-كە جەتكەن. بۇل جالپى مەكتەپتەردىڭ 54%-نا تەڭ. 1991 جىلى قازاق مەكتەپتەرىنىڭ سانى 2768 بولاتىن. 30 جىلدا قازاق تىلىندە ءبىلىم الاتىن بالالاردىڭ ۇلەسى 32 %-دان 66 %-عا ارتقان.
بيىل مەكتەپ قابىرعاسىندا ءبىلىم الاتىن 3,6 ملن بالانىڭ 2 223 455-ءى مەملەكەتتىك تىلدە ساباق وقيدى دەگەن ءسوز. «انا تىلىندە وقيتىن ۇلتى قازاق بالالارىنىڭ سانى بۇگىنگى تاڭدا 85%-دى قۇرايدى. مەكتەپ جاسىنداعى ۇلتى قازاق بالالاردىڭ سانى - 2 568 068. ولاردىڭ 2 173 141-ءى قازاق تىلىندە وقيدى», دەلىنگەن ۆەدومستۆونىڭ مالىمەتىندە.
