تاراپتار بىرلەسكەن ءىس-شارالاردى, عىلىم, ءبىلىم سالالارىنداعى باعدارلامالاردى ىسكە اسىرۋدا ەلباسى كىتاپحاناسى مەن جەنەۆا ساياسات جانە قاۋىپسىزدىك ورتالىعىنىڭ ىنتىماقتاستىق جۇمىستارىن تالقىلادى.
كەزدەسۋ اياسىندا قوس ۇيىم ىنتىماقتاستىق مەموراندۋمىنا قول قويدى.
ب.تەمىربولات ەلباسى كىتاپحاناسىنىڭ كوپ جىلدىق تاجىريبەسى مەن رەسۋرستارىنىڭ ارقاسىندا جەرگىلىكتى, حالىقارالىق دەڭگەيدە ءبىلىم, عىلىم, قاۋىپسىزدىك ماسەلەلەرىن قولعا العان جەتەكشى ورتالىقتارىنىڭ بىرىنە اينالعانىن ايتتى.
«ەلباسى كىتاپحاناسى ايماقتىق جانە جاھاندىق قاۋىپسىزدىك ماسەلەلەرىنە ۇلكەن كوڭىل بولەدى. وسى ورايدا ىنتىماقتاستىعىمىز پراكتيكالىق دەڭگەيگە شىعۋى مۇمكىن. ەكىجاقتى ىنتىماقتاستىقتىڭ ورتاق ماقساتتارى مەن باعىتتارىن تابا الاتىنىمىزعا سەنىمدىمىن», دەدى قازاقستان دەلەگاتسياسىنىڭ باسشىسى.
«جەنەۆا ساياسات جانە قاۋىپسىزدىك ورتالىعىنىڭ ىنتىماقتاستىق ورناتۋعا نيەتى زور. اتاپ ايتقاندا, سىرتقى ساياسات مەكەمەلەرىنىڭ ديپلوماتتارى, وفيتسەرلەرى مەن ازاماتتىق قىزمەتكەرلەرى ءۇشىن حالىقارالىق قاۋىپسىزدىك ساياساتى سالاسىنداعى مامانداندىرىلعان دايىندىق پەن بىلىكتىلىكتى ارتتىرۋ باعدارلامالارى, سونداي-اق حالىقارالىق قاۋىپسىزدىك سالاسىنداعى زەرتتەۋلەر, ءتيىستى تاقىرىپتار بويىنشا كونفەرەنتسيالار مەن سەمينارلار ۇيىمداستىرۋ ۇسىنىلماق», دەدى ك.وريسيچ.
ەستەرىڭىزگە سالساق, اعىمداعى جىلدىڭ 30 تامىزى مەن 1 قىركۇيەگى ارالىعىندا ەلباسى كىتاپحاناسى جەنەۆا قالاسىندا حالىقارالىق ۇيىمداردىڭ وكىلدەرىمەن بىرقاتار ءىس-شارا مەن كەزدەسۋ وتكىزبەك. ولاردىڭ اياسىندا جاھاندىق جانە ايماقتىق قاۋىپسىزدىكتىڭ, ارحيۆتىك جانە تاريحي زەرتتەۋلەردىڭ, ديپلوماتيا مەن حالىقارالىق قاتىناستاردىڭ ماسەلەلەرىنە قاتىستى ىنتىماقتاستىقتى دامىتۋعا باعىتتالعان قۇجاتتارعا قول قويىلادى.
31 تامىزدا سەمەي يادرولىق پوليگونى جابىلۋىنىڭ 30 جىلدىعى مەن 29 تامىز – يادرولىق سىناقتارعا قارسى حالىقارالىق كۇرەس كۇنىنە ورايلاستىرىلعان «قازاقستان – بۇۇ: بەيبىتشىلىك ءۇشىن سەرىكتەستىك» حالىقارالىق كونفەرەنتسياسى وتەدى. كونفەرەنتسيا بارىسىندا اعىلشىن تىلىندەگى «يادرولىق قارۋسىز الەمگە بەتبۇرىس: ەلباسى باستامالارى» عىلىمي جيناعىنىڭ تۇساۋكەسەرى وتەدى.
