قازاقستاننىڭ باس سانيتار دارىگەرىنىڭ جاڭا قاۋلىسىنا سايكەس, ۆاكتسينا الماعان ستۋدەنتتەرگە جاتاقحاناعا ورنالاسۋعا تىيىم سالىنادى. الايدا بۇل شەكتەۋ 18 جاسقا تولماعان, تۇراقتى مەديتسينالىق قارسى كورسەتىلىمدەرى بار جانە كوروناۆيرۋسپەن اۋىرىپ شىققان ستۋدەنتتەرگە قاتىستى ەمەس.
«بوگدە ادامداردىڭ كىرۋىنە تىيىم سالا وتىرىپ, COVID-19-عا قارسى ۆاكتسينا العان ستۋدەنتتەر (18 جاسقا تولماعان, سونداي-اق تۇراقتى مەديتسينالىق قارسى كورسەتىلىمدەرى بار جانە سوڭعى ءۇش اي ىشىندە كوروناۆيرۋسپەن اۋىرعان ستۋدەنتتەردى جاتاقحاناعا ورنالاستىرۋعا جول بەرىلەدى) جاتاقحاناعا ورنالاستىرىلسىن», دەلىنگەن قاۋلى ماتىنىندە.
سونىمەن بىرگە, ستۋدەنتتەرگە ۋنيۆەرسيتەتكە Ashyq قوسىمشاسى ارقىلى كىرۋگە رۇقسات ەتىلەدى. بۇدان بولەك ۇستازداردىڭ, پەرسونال مەن ءبىلىم الۋشىلاردىڭ دەنە قىزۋى كۇن سايىن ولشەنەدى.
