ساياسات • 26 تامىز، 2021

ەرەكشە قامقورلىقتا بولاتىن بالالار

36 رەت كورسەتىلدى

Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك جاڭا وقۋ جىلى قارساڭىندا ءبىلىم جانە عىلىم ءمينيسترى اسحات ايماعامبەتوۆپەن بىرگە ەلورداداعى «قىز جىبەك» بالاباقشاسىندا بولدى. وسى بالاباقشادا «بولاشاق» كورپوراتيۆتىك قورىنىڭ باستاماسىمەن ەڭ ءبىرىنشى اشىلعان ينكليۋزيانى قولداۋ كابينەتى بار.

جولدىباي بازار

«بولاشاق» قورى قامقورشىلىق كەڭەسى قۇرمەتتى مۇشەسىنىڭ ايتۋىنشا، بۇگىندە قازاقستاندا 160 مىڭنان استام ەرەكشە ءبىلىم الۋعا قاجەتتىلىكتەرى بار بالا تىركەلگەن، ونىڭ ىشىندە 35 مىڭ بالا اۋتيزممەن اۋىرادى. سوندىقتان بيىل قۇرىلعانىنا 10 جىل تولىپ وتىرعان قور جۇمىسىنىڭ نەگىزگى باعىتتارىنىڭ ءبىرى – ء«ار بالا مەكتەپكە بارۋعا لايىقتى» ينكليۋزيۆتىك ءبىلىم بەرۋدى دامىتۋ جوباسى.

– وسى جىلدار ىشىندە بولاشاقتىقتاردىڭ ىقىلاسپەن اتقارعان ىزگى ءىسىنىڭ ارقاسىندا وڭىرلەردە 59 مامانداندىرىلعان وڭالتۋ مەكەمەسى اشىلىپ، جابدىقتالدى. ونىڭ ىشىندە 22 قالادا 43 ينكليۋزيانى قولداۋ كابينەتى اشىلدى. ەرەكشە ءبىلىم الۋعا قاجەتتىلىگى بار 2 مىڭنان استام بالا قامتىلدى، ونىڭ ىشىندە 600 بالا ۇيدە ءبىلىم الۋدان شىعارىلدى. ينكليۋزيۆتىك ءبىلىم بەرۋ سالاسىندا 420 جاڭا بىلىكتىلىگى جوعارى جۇمىس ورنى اشىلدى. 2 مىڭ مامان مەن اتا-انا ارنايى ءدارىس الدى. مەملەكەت دەڭگەيىندە جۇيەلى تۇردە شەشۋ ءۇشىن قور زاڭناما اكتىلەرىنە 70-تەن استام ۇسىنىم مەن تۇزەتۋ ەنگىزدى، – دەدى ب.بايبەك.

سونىمەن بىرگە ول «بولاشاق» قورىنىڭ ساراپشىلارى نۇرسۇلتان نازارباەۆ قورىنا تۇراقتى تۇردە كونسۋلتاتيۆتىك قولداۋ كورسەتەتىنىن اتاپ ءوتتى. وتكەن جىلى قوردىڭ 8 وڭىردە 16 ينكليۋزيانى قولداۋ كابينەتىن اشۋى، سونداي-اق كەلەسى جىلدىڭ سوڭىنا دەيىن اۋتيزممەن اۋىراتىن جانە باسقا دا مەنتالدى اۋىتقۋلارى بار بالالار ءۇشىن سوڭعى ۇلگىدەگى ۇزدىك تەحنولوگيالاردى ەندىرە وتىرىپ، تاعى دا 8 زاماناۋي ەڭسەلى ورتالىق سالۋدى جوسپارلاۋى ماڭىزدى قادام بولدى.

– ەرەكشە قاجەتتىلىكتەرى بار بالالارعا قولداۋ كورسەتۋ پارتيا ليدەرى نۇرسۇلتان نازارباەۆتىڭ بۇدان 7 جىل بۇرىن باستاماشى بولعان «كەدەرگىسىز كەلەشەك» جوباسى مەن مەملەكەت باسشىسى قاسىم-جومارت توقاەۆ جاريا ەتكەن «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسى باسىمدىقتارىنىڭ ءبىرى بولىپ تابىلادى. «بارشا بالاعا – تەڭ مۇمكىندىكتەر» قاعيداتىن ىسكە اسىرا وتىرىپ، 2025 جىلعا دەيىن كوللەدجدەر مەن جوعارى وقۋ ورىندارىندا، سونداي-اق مەكتەپتەر مەن مەكتەپكە دەيىنگى ۇيىمداردىڭ
70%-ىندا ينكليۋزيۆتى ءبىلىم بەرۋدى ەندىرۋ جونىندە مىندەت قويىلدى، – دەدى پارتيا توراعاسىنىڭ ءبىرىنشى ورىنباسارى.

بۇدان بولەك، پارتيا وڭالتۋ ورتالىقتارىنىڭ سانىن ۇلعايتۋعا جانە ەرەكشە قاجەتتىلىكتەرى بار بالالارعا پسيحولوگيالىق-پەداگوگيكالىق جانە كوررەكتسيالىق قولداۋ بويىنشا مەملەكەتتىك تاپسىرىستى ەنگىزۋگە قول جەتكىزبەك. اسىراۋشىسىنان ايىرىلعان بالالار ءبىر مەزگىلدە مۇگەدەكتىگى جانە اسىراۋشىسىنان ايىرىلۋى بويىنشا 2 جاردەماقى الاتىن بولادى. سونىمەن بىرگە ەرەكشە قاجەتتىلىكتەرى بار بالالار ءۇشىن كامەلەتتىك جاسقا تولعاننان كەيىن تۇرعىن ۇيگە كەزەگىنىڭ ۇزىلمەۋى دە قامتاماسىز ەتىلەدى.

جالپى، سايلاۋالدى مىندەتتەمەلەر اياسىندا تاياۋداعى 5 جىلدا ەرەكشە قاجەتتىلىكتەرى بار ادامدار ءۇشىن تاعى دا 22 مىڭ الەۋمەتتىك ينفراقۇرىلىم نىسانىن بەيىمدەۋ جالعاستىرىلادى. جۇمىسقا ورنالاستىرۋ بويىنشا كۆوتانى ورىنداماعان جۇمىس بەرۋشىلەر ءۇشىن وتەماقى تولەمدەرى ەنگىزىلىپ، ول ەرەكشە قاجەتتىلىكتەرى بار ادامدارعا جۇمىس ورىندارىن اشۋعا باعىتتالادى.

Nur Otan ماقساتى ايقىن، ناقتى ىستەر پارتياسى رەتىندە ءوز سايلاۋالدى ۋادەلەرىنىڭ بارلىعىن ىسكە اسىرۋدى قامتاماسىز ەتەدى. بۇل ءۇشىن پارتيا ليدەرىنىڭ تاپسىرماسى بويىنشا بۇگىندە بۇعان قاجەتتى بۇكىل پارتيالىق ينفراقۇرىلىم جاڭاشا جولعا قويىلدى: جاۋاپتى دەپۋتاتتار مەن باسشىلار ناقتى بەكىتىلە وتىرىپ، 217 جول كارتاسى ىسكە اسىرىلىپ جاتىر، 12 مىڭنان استام بەلسەندى ازاماتتىڭ قاتىسۋىمەن 1،7 مىڭنان استام قوعامدىق كەڭەستەردىڭ وڭىرلىك جۇيەسى قۇرىلدى جانە ت.ب. تاياۋ ۋاقىتتا سايلاۋالدى باعدارلاما مەن ازاماتتار اماناتتارىنىڭ ورىندالۋ ساپاسىن تەكسەرۋ ءۇشىن جەرگىلىكتى جەرلەردە ءتيىستى كوشپەلى كەزدەسۋلەر وتكىزىلەدى، – دەپ تۇيىندەدى ب.بايبەك.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز