كينو • 25 تامىز، 2021

وبەكتيۆ سىرتىنداعى «وكىل اكە»

107 رەت كورسەتىلدى

الەم نازارىن ءالى كۇنگە وزىنەن اۋدارماي كەلە جاتقان كينوكارتينالار بار. سولاردىڭ قاتارىندا ءبىز البەتتە فرەنسيس فورد كوپپولانىڭ «وكىل اكەسىن» ايتار ەدىك. وزەكتىلىگىن ءالى كۇنگە دەيىن ەش جويماعان شەدەۆردى قاي جاعىنان اڭگىمەلەسەڭىز دە قىزىق.

ارينە، ونىڭ كوتەرىپ وتىرعان ارعى ماسەلەسىنەن باستاپ شەجىرەلەسەك، تىم ۇزاپ كەتەتىنىمىز انىق. ءبىز بۇگىن اتالعان تريلوگيانىڭ ءتۇسىرىلۋى بارىسىنداعى قىزىقتى ءارى قايتالانباس وبەكتيۆ سىرتىنداعى وقيعالارىن بايان ەتكەندى ءجون كوردىك. جالپى، ول دۇنيەلەردى كوزىقاراقتى وقىرماننىڭ كوبى بىلەدى. دەگەنمەن ءار كەز مۇنداي ونەگەلى دۇنيەلەر جاڭعىرىپ تۇرعانى دۇرىس. وتاندىق كينوگەرلەردىڭ دە بۇل تاراپتا ۇيرەنەرلەرى كوپ. جالپى كينو الەمى ۇلتقا بولىنبەيدى عوي، دەگەنمەن رەجيسسەرىنىڭ قولتاڭباسى ايقىن سەزىلىپ تۇراتىن كلاسسيكالار بولادى. «وكىل اكە» – سول تۇرعىدا ەشقاشان ەسكىرمەيتىن شىن مانىندەگى كلاسسيكا.

كينونىڭ ءبىز بىلە بەرمەيتىن زاڭدارى كوپ. سولاردىڭ ىشىندە كيىم، رەكۆيزيت ماسەلەسى تىم نازىك نارسە ەكەنىن كوبى ەسكەرە بەرمەيدى. بىردە قىتايدىڭ اتاقتى يمپەراتورىنىڭ ءبىرىنىڭ تاريحىن ءتۇسىرىپ جاتقان جۇمىس ۇستىندە رەجيسسەردىڭ كوزىنە كەنەت پاتشانىڭ كەڭ ەتەك ماۋىتى ىشىنەن اقىرى كامەراعا تۇسە قويماس دەپ كيگەن ارزان كەبىسى تۇسە كەتىپتى. ايعاي-شۋ. بارىنە كىنالى كيىمگە جاۋاپتى توپ ەكەنى انىقتالادى. بىلاي قاراساڭ ولاردىڭ دا ايتىپ تۇرعاندارى دۇرىس سياقتى. ەتەگى كەڭ جىبەك شاپاننىڭ ىشىندەگى، ءوزى تاقتا وتىرعان ادامنىڭ اياق كيىمىنىڭ قىمبات بولۋى قانشالىقتى ماڭىزدى بولۋى مۇمكىن؟ بىراق ماسەلەنىڭ ءبارى سول كەبىستىڭ ارزاندىعىنان شىققان. رەجيسسەردىڭ سوندا ايتقانى: «ارزان كەبىس كيىپ وتىرعان يمپەراتور ەشقاشان قىمبات ءسوز ايتا المايدى، دەرەۋ اياعىنا التىن جىپپەن ادىپتەلگەن ادەمى كەبىس كيگىزىڭدەر!». شىنىمەن دە التىننىڭ بۋى دەگەن ارقانى قوزدىرماي ما؟ الگى اتاعىنىڭ ءوزى جەر-جاھاننىڭ زارەسىن العان ەسكەندىر پاتشانىڭ ءومىر بويى شاشىن الىپ جۇرگەن مومىن شاشتارازدىڭ وقيعاسىن بارلىعى ءبىلۋى ءتيىس. پاتشانىڭ شاشىن ءبىر كۇنى اۋلادا الىپ تۇرعان بەيباق كەنەت ادەتتەن تىس اكىرەڭدەپ سويلەيتىنى بار ەدى عوي. بۇعان نە كورىندى دەپ تاڭدانىسقان ۋازىرلەر پاتشانىڭ نۇسقاۋىمەن ەكەۋى وتىرعان جەردى قازىپ كەپ جىبەرسە، الگى ورىننان ءبىر ساندىق التىن شىقپاي ما؟ قۇلدى قۇتىرتىپ سويلەتتىرىپ تۇرعان سوندا بويداعى مىنەزى ەمەس، جەر استىندا كومۋلى جاتقان جارىقتىق سارى التىننان بۇرقىراي كوتەرىلگەن بۋ ەكەن. الگى يمپەراتوردىڭ اياعىنداعى كەبىستىڭ دە قىمبات بولۋى كەرەكتىگىندە وسىنداي ءمان جاتقانى انىق.

«وكىل اكەنى» ءتۇسىرۋ الاڭىندا دا وسىعان ۇقساس، باستى رولدەردىڭ بىرىندە ويناعان اتاقتى اكتەر مارلون برانو ارىپتەستەرىمەن ازىراق ازىلدەسكىسى كەلگەن وقيعا بولسا كەرەك. اۋلەتتىڭ عانا ەمەس، ۇلكەن مافيانىڭ كوسەمى ۆيتو وققا ۇشىپ، اۋرۋحاناعا تۇسەدى دە، كەيىن كوسەم كارلەونە ۇيگە شىققاندا وكىل اكەنى بالالارى، دوستارى، وققاعارلارى ءبارى شۋلاپ ءجۇرىپ جوعارعى قاباتقا توسەگىمەن بىرگە مىقشىڭداي كوتەرەتىن ەپيزود بار. مەنىڭ فيلمدەگى دە، ومىردەگى دە سالماعىمدى سەزىنسىن دەدى مە ەكەن، مارلون برانو ءوزى زىلدەي الگى توسەكتىڭ ۇستىندە س ۇلىق جاتقانىمەن قويماي، كەرەۋەتتىڭ استىنا زىلدەي بىرنەشە كىر تاسىن بايلاتىپ قويىپتى. قاجىپ جۇرگەن اكتەرلەر، رەجيسسەرلەر ونىڭ ءازىلىن باسىندا قابىلداي الماي قاتتى اشۋلانعانىمەن، كەيىن شىنايى شىققان كادردان كوپ نارسە بايقاۋعا بولاتىنىن ايتىسىپتى. شىنىمەن دە الپاۋىت امەريكانى اۋزىنا قاراتقان يتاليالىق مافيا كوسەمىن جەپ-جەڭىل كوتەرىپ جۇرە بەرسە، ونىڭ قادىرى قايدا قالادى؟ سول كەزەڭدەگى قىلمىس الەمىنىڭ كوكجالى – دون كارلەونەنىڭ ءسوز سالماعىنان بولەك ءوز سالماعى دا كورەرمەنگە شىنايى جەتۋى كەرەك قوي شىنىمەن.

برانوعا براۆو دەمەگەندە قايتەسىڭ؟!

ايتا بەرسەك، بۇل فيلم بويىنشا كوپ دۇنيەنى قاۋزاۋعا بولادى. جالپى، اتالعان اتاقتى بەستسەللەر قوعامنىڭ دا، ادامنىڭ دا ءبىز كەز كەلگەن ۋاقىتتا وڭايلىقپەن بارا بەرمەيتىن سانانىڭ تۇپكى قالتارىستارىن كوبىرەك اشكەرەلەيدى. ادام ساياسي جانۋار دەگەننەن شىعادى، سول «وكىل اكەنى» ءتۇسىرۋ بارىسىندا، كەيىن جارىققا شىققاننان كەيىن دە ادامداردىڭ قويماي تالقىلاعان تاقىرىبى جان-جانۋارلاردى قورعاۋ تۇرعىسىندا ءوربىپتى. وعان سەبەپ، كينوداعى رەجيسسەردى قورقىتقان كارلەونەنىڭ جەندەتتەرى ەپيزود اراسىندا جىلقىنىڭ كەسىلگەن باسىن قانىن سورعالاتىپ رەجيسسەردىڭ توسەگىنە كەسىپ تاستاپ كەتەدى. سول كادرداعى جىلقىنىڭ باسى كەيىن اجەپتاۋىر داۋعا اينالادى. انىعىندا ول رەكۆيزيت-باس يتتەردى تاماقتاندىراتىن قاساپحانادان اكەلىنگەن ەكەن.

وسى تۋرالى «وكىل اكەنىڭ» رەجيسسەرى فرەنسيس فورد كوپپولا بىلاي دەيدى: «جالپى، فيلم بارىسىندا ولگەنى ءبىر عانا جىلقى، ال كىسى قولىنان قىرىلعان ادامداردىڭ سانىندا ەسەپ جوق. قىزىعى، قوعامدى قىرىلىپ جاتقان ادامدار ەمەس، جانۋاردىڭ جاعدايى كوبىرەك الاڭداتقان. جىلقىنىڭ سول باسىن قانىن سورعالاتىپ الىپ كەلگەندە ءبارىنىڭ توبە شاشتارى تىك تۇردى. اسىرەسە، جان-جانۋارلاردى قورعاۋشىلاردىڭ داۋىستارى قاتتىراق ەستىلدى. مەن سولارعا مىنانى ايتقىم كەلەدى، جان-جانۋاردىڭ قۇقىعىن قورعاۋشىلاردىڭ كوبى قاڭعىباس يتتەر مەن مىسىقتاردى قورعايتىن بولۋلارىڭىز كەرەك، ال مەن سىزدەرگە ايتايىن، سول ماپەلەپ وتىرعان يتتەرىڭىز بەن مىسىقتارىڭىز ءۇشىن مەن الىپ كەلگەندەي باستىڭ كۇنىنە 200-ءى كەسىلەدى. مەن سول تەك يت پەن مىسىق ءۇشىن سويىلاتىن 200 جىلقىنىڭ بىرەۋىنىڭ عانا باسىن اكەلدىم، ءارى ونى اقشاعا ساتىپ الدىم. مىنە، سىزدەرگە ادىلەت كەرەك بولسا، سول كىشكەنتاي كاندەندەردىڭ قارنىن تويدىرۋ ءۇشىن 200-دەي جىلقى كۇنىگە سويىلادى. ال سىزدەر ءبىر عانا باستى ايتاسىزدار!».

ەرىكسىز باسىڭدى شايقايسىڭ... شى­نىمەن دە رەجيسسەر كوپپوللا قوعامنىڭ وتىرىك وكسىگەن جالعان كەلبەتىنىڭ بەتىندەگى بەس باتپان بەتپەردەنى سىپايىلاپ تۇرىپ وسىلاي سىپىرعانىنا ريزا بولاسىڭ.

راس قوي.

سوڭعى جاڭالىقتار

قانشا ادام ۆاكتسينا سالدىردى؟

كوروناۆيرۋس • بۇگىن، 09:40

847 ادام كوروناۆيرۋس جۇقتىردى

كوروناۆيرۋس • بۇگىن، 09:00

ۇقساس جاڭالىقتار