بيىل از قامتىلعان وتباسىنىڭ ءاربىر وقۋشىسىنا كورسەتىلەتىن كومەك مولشەرى 40 مىڭ تەڭگەنى قۇرايدى. بۇل تۋرالى تامىز ايىنداعى ونلاين-كەڭەستە ەلوردا اكىمى التاي كولگىنوۆ ايتقان بولاتىن.
«ەگەر وتباسىدا ءتورت بالا بولسا, وندا ءار بالاعا 40 مىڭ تەڭگەدەن بولىنەدى. وسىلايشا, وتباسى مەكتەپ كيىمىن, اياق كيىم مەن مەكتەپكە ارنالعان كەرەك-جاراقتارىن ساتىپ الۋعا 160 مىڭ تەڭگە پايدالانا الادى. «جالپىعا مىندەتتى وقىتۋ» باعدارلاماسى بيىل 11 تامىزدا باستالدى. جالپى ءبىلىم بەرۋمەن 15 مىڭنان استام وقۋشىنى قامتۋدى جوسپارلاپ وتىرمىز. قاجەت بولسا, قامتۋدى قوسىمشا ارتتىراتىن بولامىز. «مەكتەپكە جول» ءداستۇرلى اكتسياسى اياسىندا دا وقۋشىلارعا كومەك كورسەتىلەدى. بۇل باعدارلامامەن تاعى 7 مىڭ بالا قامتىلادى. اۋداندىق اكىمدىكتەر بولسا, 2 مىڭنان استام وقۋشىعا مەكتەپ كەرەك-جاراقتارى بار سومكەلەر تابىستايدى», دەدى التاي كولگىنوۆ.
جالپىعا مىندەتتى وقىتۋ شەڭبەرىندە كومەك الۋعا ءوتىنىش بەرۋ ءۇشىن اتا-انالار بالا وقيتىن مەكتەپكە جۇگىنۋى قاجەت. كومەك كەلەسى ساناتتاعى وقۋشىلارعا كورسەتىلەدى:
- مەملەكەتتىك اتاۋلى الەۋمەتتىك كومەك (ااك) الۋعا قۇقىعى بار وتباسىلاردان شىققان بالالارعا;
- جان باسىنا شاققانداعى تابىسى ەڭ تومەنگى كۇنكورىس دەڭگەيىنەن تومەن, ااك المايتىن وتباسىلاردان شىققان بالالارعا;
- وتباسىلاردا تۇراتىن جەتىم بالالارعا جانە اتا-اناسىنىڭ قامقورلىعىنسىز قالعان بالالارعا;
- تج سالدارىنان شۇعىل جاردەمدى تالاپ ەتەتىن وتباسىلاردان شىققان بالالارعا;
- ءبىلىم بەرۋ ۇيىمىنىڭ القالى ورگانى ايقىندايتىن ءبىلىم الۋشىلار مەن تاربيەلەنۋشىلەردىڭ وزگە دە ساناتتارى.
