«بىزدە جىلۋ بەرۋ ماۋسىمى اۋا رايىنا بايلانىستى 7,5, ءتىپتى 8 ايعا سوزىلادى. بۇل ەكونوميكاعا وتە ۇلكەن جۇكتەمە. پرەزيدەنت تاپسىرماسىنا سايكەس ءۇشىنشى جىلۋ ەلەكتر ستاناسىنىڭ جۇمىسىن جانداندىردىق. كەلەر جىلى ىسكە قوسۋعا ءتيىسپىز. ول 420 گكال جىلۋ بەرەدى نەمەسە 6,5 ملن شارشى مەتر تۇرعىن ءۇي مەن باسقا دا نىسانداردى جىلۋمەن قامتاماسىز ەتەدى», دەدى قالا اكىمى نۇر-سۇلتان قالالىق ءماسليحاتىنىڭ كەزەكتەن تىس سەسسياسىندا.
قالا باسشىسىنىڭ ايتۋىنشا, ەلوردادا جىل سايىن 3 ملن باسپانا سالىناتىن بولادى. ال مۇنداي جاعدايدا اتالعان ستانسا قالانى جىلۋمەن تولىقتاي قامتاماسىز ەتە المايدى. سوندىقتان وتكەن جىلى شەشىم قابىلدانىپ, ۇكىمەت ماقۇلداعان. ءاربىرى 360 گكال بولاتىن 2 جاڭا گاز قازاندىعىنىڭ قۇرىلىسىنا قارجى بولىنەدى.
«كەلەسى جىلدىڭ سوڭىنا قاراي 1 100 گكالدان استام جىلۋ الۋىمىز كەرەك. بۇل ەلوردامىزدىڭ, اسىرەسە جاڭا قۇرىلىس اۋداندارىنىڭ ۇزاقمەرزىمدى تىنىس-تىرشىلىگىن قامتاماسىز ەتەدى. ماسەلەن, 2020 جىلى تەك ەسىل اۋدانىنىڭ تۇرعىندارى 40 مىڭ ادامعا ءوستى. بۇل وبلىستارداعى 2-3 اۋدان تۇرعىنىمەن تەڭ», دەدى التاي كولگىنوۆ.
