قوستاناي وبلىسىندا ەسىرتكى ساۋداسىنا قاتىسى بار 10 ەكس-پوليتسەيگە سوت ۇكىم كەستى. بۇل تۋرالى «حابار» تەلەارناسى حابارلادى.
قۇقىق قورعاۋ قىزمەتكەرلەرىنە كۇدىكتىلەرمەن سىبايلاستى, باس پايداسى ءۇشىن اۋىر قىلمىستى جاسىردى دەگەن ايىپ تاعىلدى. جالپى, وسى ءىس بويىنشا 16 ادام جاۋاپقا تارتىلعان. سونىڭ ىشىندە ەسىرتكى ساۋداسىمەن اينالىسقان 6 ايەل ەكەن.
كۇدىكتىلەر پوليتسيا قىزمەتكەرلەرىنىڭ «كومەك كورسەتۋىمەن» بىرنەشە جىل بويى زاڭسىز ارەكەتتەرىن ىسكە اسىرىپ كەلگەن. ەكى تومدىق ۇكىمنىڭ ءماتىنى 500 بەتتەن تۇرادى.
سونىمەن, ەسىرتكى ساۋداسىن ۇيىمداستىرۋشى 2 ايەل 20 جىلعا باس بوستاندىعىنان ايرىلدى. قالعان 4 ايىپكەر 8-10 جىلعا سوتتالدى. ال قىلمىسكەرلەرمەن سىبايلاس بولعان بۇرىنعى قۇقىق قورعاۋ قىزمەتكەرلەرىنىڭ ءبىرى 16 جىل, قالعاندارى 2-دەن 6 جىلعا دەيىن ومىرلەرىن تەمىر توردا وتكىزەتىن بولدى. ءبارى دە شەنىنەن ايرىلدى ءارى مۇلكى تاركىلەندى.
«سوت بارلىق دايەكتەردى جان-جاقتى زەرتتەپ, ءىستىڭ اقيقاتىن اشۋعا تىرىستى. كوزىمىز جەتكەنى, بۇل ەسىرتكى ساۋداسىنا قاتىستى اركىمنىڭ اتقاراتىن مىندەتى, جۇمىسى ناقتى بەلگىلەنگەن. ال پوليتسيا قىزمەتكەرلەرى قىلمىسكەرلەردىڭ سىبايلاستارىنا اينالعان», - دەدى قوستاناي وبلىسى اۋدانارالىق قىلمىستىق ىستەر جونىندەگى سوتىنىڭ توراعاسى اسىلبەك جۇماعۇلوۆ.
ءامىرحان الماعانبەتوۆ.
دەرەككوز: «حابار» تەلەارناسى.
فوتو: «حابار» تەلەارناسى.
