«رۋسفوند» قايىرىمدىلىق قورى قاتەرلى ىسىككە شالدىققان رەسەي ءانشىسى جاننا فريسكەنىڭ ەمدەلۋىنە تاۋلىككە جەتپەي 50 ملن. رۋبلدەن استام قارجى جيناقتادى. بۇل تۋرالى Utro.ru حابارلادى.
انشىگە كومەك كورسەتۋ ماقساتىندا «ءبىرىنشى كانالمەن» بىرگە قاراجات جيناپ جاتقان «رۋسفوند» قايىرىمدىلىق قورى ەمگە قاجەت سومادان ارتىلعان اقشانىڭ ناۋقاس بالالاردى ەمدەۋگە جۇمسالاتىنىن مالىمدەگەن بولاتىن. قاراجات قايىرىمدىلىق قورىنا sms حابارلاما ارقىلى اۋدارىلادى. ءبىر حابارلامانىڭ قۇنى 75 ءرۋبلدى قۇرايدى.
سونىمەن قاتار, ءانشى لوليتا ميلياۆسكايا دا جاننا فريسكەنىڭ ەمدەلۋىنە قاراجات جيناماقشى. «ءبىز ارىپتەستەرىمىزبەن جاننانىڭ قاتەرلى ىسىككە شالدىققانىن ەستىگەن بويدا اقشا جيناپ, ولاردى ونىڭ وتباسىنا بەرەمىز دەپ شەشتىك», – دەدى ول.
باق وكىلدەرىندە 39 جاسار جاننا فريسكەنىڭ قاتەرلى ىسىككە شالدىققانى جونىندەگى اقپار وتكەن اپتانىڭ سوڭىندا پايدا بولدى. دۇيسەنبى كۇنى ونى ءانشىنىڭ ازاماتتىق نەكەدەگى كۇيەۋى دميتري شەپەلەۆ راستادى.
ايدار ورىسباەۆ.
دەرەككوز: Utro.ru
فوتو: Mail.ru
