قاڭتاردىڭ 18-ءى باكۋدە بۇكىلالەمدىك بوكس سەرياسىنىڭ (WSB) 6-تۋرىندا جەرگىلىكتى Baku Fires كومانداسىمەن كەزدەسكەن Astana Arlans كلۋبى 1:4 ەسەبىمەن ۇتىلىپ قالدى.
قاڭتاردىڭ 18-ءى باكۋدە بۇكىلالەمدىك بوكس سەرياسىنىڭ (WSB) 6-تۋرىندا جەرگىلىكتى Baku Fires كومانداسىمەن كەزدەسكەن Astana Arlans كلۋبى 1:4 ەسەبىمەن ۇتىلىپ قالدى.
كەزدەسۋدە ەلىمىزدىڭ ءوز جىگىتتەرى تۇگەل جەڭىلىسكە ۇشىرادى. ال جالعىز جەڭىستى كومانداداعى بىردەن-ءبىر لەگيونەر, يراندىق رۋزباحاني اكەلدى. وندا دا ول ۇرىستى نوكاۋتپەن اياقتادى.
الاڭعا ءبىرىنشى بولىپ شىققان سەريانىڭ دەبيۋتانتى 52 كيلوعا دەيىنگى سالماقتاعى ءىلياس سۇلەيمەنوۆ ازەربايجان ەلۆين ماميشزادەمەن كەسكىلەسكەن شايقاستا 1:2 (48:47, 47:48, 46:49) ەسەبىمەن ەسە جىبەردى. 60 كيلوداعى سامات باشەنوۆ ءوز كەزەگىندە جاقىندا عانا رەسەيدەن بارعان البەرت سەليموۆتەن 0:3 (45:50, 45:50, 46:49) بولىپ تىزە بۇكتى. بۇدان سوڭ كەزدەسۋدىڭ تاعدىرى دا شەشىلدى. اتاپ ايتقاندا, 69 كيلوعا دەيىنگى سالماقتاعى قازاقستاندىق مەيىرىم نۇرسۇلتانوۆ ازەربايجان كومانداسىنىڭ بەلورۋس لەگيونەرى ەۆگەني روماشكەۆيچپەن تەڭ جەكپە-جەكتە اتتان اۋىپ ءتۇستى. ەسەپ – 1:2 (47:48, 48:47, 46:49). وسىمەن الاڭ يەلەرى ەسەپتى 3:0-گە جەتكىزدى.
سوسىن قازاقستاندىقتارعا ءبىرىنشى جەڭىس كەلدى. ونى 81 كيلوعا دەيىنگى سالماقتاعى پارسى ەحسان رۋزباحاني جاسادى. استانالىقتىڭ جۇدىرىعىنان داعىستاندىق سامير ماگومەدوۆ تۇرا الماي قالدى. ال سوڭىنان 91 كيلودان جوعارى سالماقتاعى رۋسلان مىرساتاەۆ داعىستاندىق لەگيونەر حادجي مۋرتۋزاليەۆتەن 0:3 (46:49, 46:49, 46:49) ەسەبىمەن جەڭىلدى.
Astana Arlans كەلەسى كەزدەسۋىن 1 اقپان كۇنى وتكىزەدى. ءبىزدىڭ جىگىتتەر ءوز الاڭىندا رەسەيلىكتەرمەن, ياعني Russian Boxing Team كومانداسىمەن جۇدىرىقتاسادى.
دامير قوجامقۇل.
