بيىل قاڭتار-شىلدە ارالىعىندا اۋىل, ورمان جانە بالىق شارۋاشىلىعى سەكتورىندا نەگىزگى كاپيتالعا سالىنعان ينۆەستيتسيا 386,1 ملرد تەڭگەنى قۇراعان. بۇل 2020 جىلعى كورسەتكىشتەن 47,8 پايىزعا جوعارى.
Finprom-نىڭ جازۋىنشا, بىلتىر سەكتورعا 261,2 ملرد تەڭگە قارجى قۇيىلىپ, ءبىر جىلدىق ءوسىم 15,3 پايىزدى قۇراعان. ينۆەستيتسيا نەگىزىنەن وسىمدىك جانە مال شارۋاشىلىعىنا بەرىلىپتى. بيىل بالىق اۋلاۋ جانە بالىق ءوسىرۋ شارۋاشىلىعىنا 2,2 ملرد تەڭگە بولىنگەن. ورمان جانە اعاش كەسۋگە 77,3 ملن تەڭگە اۋدارىلىپتى.
وڭىرلىك بولىنىستە ينۆەستيتسيانى ەڭ كوپ العان ايماق رەتىندە سولتۇستىك قازاقستان وبلىسى كوش باستايدى: 91,9 ملرد تەڭگە. بىلتىرعىدان 48,6 پايىزعا كوپ العان. ەكىنشى ورىندا – 60,2 ملرد تەڭگەمەن اقمولا وبلىسى. ءوسىم – ەكى ەسە. ۇشتىكتى 47 ملرد تەڭگەمەن پاۆلودار وبلىسى تۇيىندەگەن. بۇل وبلىسقا بيىل كەلگەن قارجى بىلتىرعىدان 95,3 پايىزعا كوپ ەكەن. بارلىق ينۆەستيتسيانىڭ ۇشتەن ەكىسىن, ناقتىراق ايتقاندا, 265,1 ملرد تەڭگەنى سەكتورداعى كاسىپورىنداردىڭ جەكە قاراجاتى قامتاماسىز ەتكەن. ال 103,7 ملرد تەڭگە بانكتىك ەمەس زاەمدار ەسەبىنەن كەلگەن. بانك بەرگەن نەسيە كولەمى – 17,3 ملرد تەڭگە. بۇل رەتتە نەسيە قاراجاتى 2020 جىلدىڭ قاڭتار-شىلدەسىمەن سالىستىرعاندا 19,1 پايىزعا از.
دەگەنمەن وسىنشاما قىرۋار قاراجات بولىنگەنىنە قاراماستان, سالاداعى كوپتەگەن ماسەلە ءالى كۇرمەۋلى قالپىندا, شەشىمىن تاپپاي وتىر. اسىرەسە بيىلعى قۋاڭشىلىق سالدارىنان كوپ وڭىردە ەگىننىڭ جايى ماردىمسىز. ماماندار بيىلعى استىق ءتۇسىمى بىلتىرعىدان 20 پايىزعا كەم بولۋى مۇمكىن دەپ بولجايدى. مۇنداي تابيعي كاتاكليزمنىڭ بولۋى الدىن الا ەسكەرىلەدى, سوعان قاراماستان سالا كۇتپەگەن جاعدايعا دايىن بولماي شىقتى دەيدى اۋىل شارۋاشىلىعى ءمينيسترىنىڭ مىندەتىن اتقارۋشى ەربول قاراشوكەەۆ. ول سونداي-اق مال شارۋاشىلىعىن دامىتۋدىڭ نەگىزگى پرينتسيپتەرىنىڭ بۇزىلعانىن, انىقتاپ ايتار بولساق, مال باسىن كوبەيتۋ شاراسى الدىن الا جەمشوپ بازاسىن دايىندالماي ىسكە اسىرىلعانىن اتاپ ءوتتى. ۆەدومستۆو وكىلىنىڭ ايتۋىنشا, احۋال بىلتىرعىداي بولماسا دا ستاتيستيكا تىم كوڭىل تۇسىرەردەي ەمەس.
«قازىر 1,5 ملن گەكتار اۋماقتان ءداندى جانە بۇرشاق داقىلدارى جينالىپ الىندى. بۇل – جالپى ەگىس القابىنىڭ 9,9 پايىزى. بىلتىر 1,6 ملن گەكتار جەردەن ءونىم جينالىپ, بۇل بۇكىل القاپتىڭ 11 پايىزىن قۇراعان ەدى. ورتاشا ونىمدىلىك گەكتارىنا 10 تسەنتنەردەن بولعان جاعدايدا 1,5 ملن توننا جينالادى. 2020 جىلى ورتاشا ونىمدىلىك 14,9 تسەنتنەر بولدى جانە 2,4 ملن توننا الىندى. قازاقستاننىڭ نەگىزگى استىق ەگەتىن ايماقتارى وسى ايدىڭ ءۇشىنشى ونكۇندىگىنەن جاپپاي ەگىن جيناۋعا كىرىسەدى. 13,24 ملن گەكتاردان استام القاپتاعى ءداندى داقىلدار جاقسى جانە قاناعاتتانارلىق جاعدايدا بولسا, 2,12 ملن گەكتار – ناشار, تاعى 78,3 مىڭ گەكتارداعى ءونىم جارامسىز بولىپ قالدى», دەگەن ەدى ە.قاراشوكەەۆ.
ول مۇنداي احۋال بىزدە عانا ەمەس, الەم ەلدەرىن دە سارساڭعا سالىپ جاتىر دەگەندى العا تارتادى: «كانادادا وتكەن جىلمەن سالىستىرعاندا بيدايدىڭ جالپى ءتۇسىمى 31,6 پايىزعا تومەندەيدى دەپ كۇتىلۋدە. اقش-تا بيداي ءتۇسىمى وتكەن جىلمەن سالىستىرعاندا 4,4%-عا تومەندەۋى مۇمكىن».
ە.قاراشوكەەۆتىڭ ايتۋىنشا, بيىل قازاقستاندا 15,3 ملن توننا استىق جينالادى دەپ بولجانىپ وتىر. سونداي-اق بىلتىردان قالعان 3,5 ملن توننا استىق بار. ونىڭ 2,8 ملن تونناسى بيداي ەكەن. «بۇل رەسپۋبليكانىڭ ىشكى قاجەتتىلىگىن تولىق قامتاماسىز ەتەدى, سونداي-اق استىقتىڭ بەلگىلى ءبىر كولەمىن ەكسپورتقا شىعارۋعا دا جەتەدى» دەدى ول.
مينيسترلىك ازىرگە ءبارى دە وڭ, ءبارى دە دۇرىس دەپ وتىر. بىراق نەگىزگى ءسوزدى ايتاتىن – ەگىن جينالاتىن كۇز مەزگىلى. قازگيدرومەت دەرەگىنە سۇيەنسەك, كۇزدە رەسپۋبليكانىڭ باسىم بولىگىندە جاۋىن-شاشىن قالىپتى دەڭگەيدە بولادى, بىراق سولتۇستىك-شىعىستا نورمادان ارتىق جاۋى ىقتيمال.
