ىشكى ىستەر ۆيتسە-ءمينيسترى ەرلان تۇرعىمباەۆ «نۇر وتان» پارتياسى رەسپۋبليكالىق قوعامدىق قابىلداۋ بولمەسىندە ازاماتتارعا قابىلداۋ جۇرگىزدى.
ىشكى ىستەر ۆيتسە-ءمينيسترى ەرلان تۇرعىمباەۆ «نۇر وتان» پارتياسى رەسپۋبليكالىق قوعامدىق قابىلداۋ بولمەسىندە ازاماتتارعا قابىلداۋ جۇرگىزدى.
ەلوردا مەن رەسپۋبليكا وڭىرلەرىنىڭ تۇرعىندارى ۆيتسە-مينيسترگە ەسكى پاسپورتتارىن اۋىستىرىپ, جاڭا جەكە كۋالىك الۋ تۋرالى وتىنىشتەر ءبىلدىردى. اتاپ ايتقاندا, قاراعاندى قالاسىندا تۇراتىن ليتۆينوۆ بالالار ءۇيىنىڭ ءتاربيەلەنۋشىسى سەرگەي توكارەۆتە قازاقستان رەسپۋبليكاسى ازاماتىنىڭ جەكە كۋالىگى بولماسا, ءىلياس احمەدحانوۆ 1974 جىلدان بەرى پاسپورتىن اۋىستىرماپتى.
ۆيتسە-مينيسترگە, سونداي-اق, ءىىب مەن ءىىد قىزمەتكەرلەرى قىلمىستىق ىستەردى تەكسەرۋدە جۇرتشىلىقتى اۋرە-سارساڭعا سالاتىندىعىنا شاعىمدار ايتىلدى. ماسەلەن, ن.يبراەۆا ەسىمدى ازاماتشا وڭتۇستىك قازاقستان وبلىسى ءىىد قىزمەتكەرلەرى تۋىسىنىڭ قازا تابۋ فاكتىسى بويىنشا قىلمىستىق ءىستى ءادىل تەكسەرمەگەنى تۋرالى ارىزداندى.
س.تاڭىربەرگەنوۆا, ت.بايجولدينوۆ پەن ب.تىلەۋبەكوۆ ۇرلىق پەن الاياقتىق فاكتىسى بويىنشا الماتى جانە الماتى وبلىسى ءىىد قىزمەتكەرلەرى تاراپىنان قىلمىستىق ءىستى تەكسەرۋدى جىلدامداتۋ جونىندە ءوتىنىش ايتتى. سونداي-اق, رەسپۋبليكالىق قوعامدىق قابىلداۋ بولمەسىنە كەلگەن بىرقاتار ازاماتتار قۇقىق قورعاۋ ورگاندارى قىزمەتكەرلەرىنىڭ زاڭسىز ارەكەتتەرىنە شاعىم ءبىلدىردى.
«رەسپۋبليكالىق قوعامدىق قابىلداۋ بولمەسىندە ازاماتتاردى قابىلداۋ قورىتىندىسى بويىنشا قۇقىق قورعاۋ ورگاندارى مەن ىشكى ىستەر مينيسترلىگىنە مونيتورينگ جۇرگىزەمىز, ياعني قاي وڭىردەن شاعىمدار كوپ ءتۇستى, ەگەر ارىزدار كوپ بولسا, سايكەسىنشە ول دەپارتامەنتتىڭ جۇمىسىنداعى, سونداي-اق, باسشىلىقتىڭ قىزمەتىندەگى ولقىلىق بولىپ سانالادى. بۇگىنگى كۇنى ايتىلعان ارىزدار باقىلاۋعا الىندى, مينيسترلىككە جولدانعاننان كەيىن ولارعا جاۋاپ قايتارىلاتىن بولادى. ال اۋماقتىق ورگان ءبىر اي مەرزىم ءىشىندە ءتيىستى شارالار قولدانىپ, ەسەپ بەرۋى ءتيىس. ءبىز ادامداردىڭ ماسەلەسىن ءتۇبەگەيلى شەشۋگە تىرىسامىز», دەدى ىشكى ىستەر ۆيتسە-ءمينيسترى ە.تۇرعىمباەۆ.
قابىلداۋ بارىسىندا ە.تۇرعىمباەۆ استانا قالاسىنىڭ 13 تۇرعىنىنا كەڭەس بەرىپ, بەينەماجىلىس بايلانىسى ارقىلى قاراعاندى, اتىراۋ جانە شىعىس قازاقستان وبلىستارىنان حابارلاسقان 5 ادامنىڭ ماسەلەسىن ءوز قاداعالاۋىنا الدى. قورىتىندىلاي كەلە, ىشكى ىستەر ۆيتسە-ءمينيسترى ازاماتتاردىڭ وتىنىشتەرى بويىنشا ءماسەلەنى شەشۋ ءۇشىن اۋماقتىق ورگاندارعا بىرقاتار تاپسىرمالار بەردى.
«ەگەمەن-اقپارات».
