مەملەكەت باسشىسىنا كاسىپورىننىڭ جۇمىسى تانىستىرىلىپ, الداعى جوسپارلارى تۋرالى مالىمەت بەرىلدى. كومپانيا باسشىلىعىنىڭ مالىمەتىنە سايكەس 4,5 گەكتار اۋماقتى الىپ جاتقان كاسىپورىنعا 30 ميلليارد تەڭگە ينۆەستيتسيا سالىنعان.
كومپانيا جاپونيا, شۆەيتساريا جانە گەرمانيادان اكەلىنگەن يننوۆاتسيالىق قۇرىلعىلارمەن تەز دايىندالاتىن ازىق-ت ۇلىك ونىمدەرىن شىعارادى. كاسىپورىننىڭ جىلىنا 85 مىڭ توننا ءونىم شىعارۋعا مۇمكىندىگى بار.
«مارەۆەن فۋد تيان-شان» جشس 670 ادامدى جۇمىسپەن قامتىپ وتىر. ونىڭ 95 پايىزى جاقىن ماڭداعى ەلدى مەكەندەردىڭ تۇرعىندارى. كاسىپورىن 500 ميلليون قاپتاما شىعارسا, سونىڭ 70 پايىزى ەكسپورتتالادى.
قاسىم-جومارت توقاەۆقا وبلىس اكىمى اماندىق باتالوۆ وڭىردەگى جۇزەگە اسىرىلىپ جاتقان ينۆەستيتسيالىق جوبالار مەن وبلىستىڭ الەۋمەتتىك-ەكونوميكالىق دامۋى تۋرالى ەسەپ بەردى.
وبلىس اكىمىنىڭ ايتۋىنشا, ايماق ەكونوميكاسىنا 312 ميلليارد تەڭگە ينۆەستيتسيا تارتىلىپ, 40 مىڭ جۇمىس ورنى اشىلعان. بيىل وڭىردە جالپى قۇنى 112 ميلليارد تەڭگە بولاتىن 65 جوبا ىسكە اسىرىلىپ جاتىر.
اماندىق باتالوۆ پرەزيدەنتتىڭ بىلتىرعى گەرمانياعا جاساعان ساپارىنىڭ ناتيجەسىندە «باۋمانن» كومپانياسى ۇساق مال ەتىن وڭدەيتىن قۋاتى 30 مىڭ توننالىق «جەتىسۋ قوي» جوباسىن قولعا العانىن حابارلادى.
قاسىم-جومارت توقاەۆ وبلىستا اتقارىلىپ جاتقان ينۆەستيتسيالىق جوبالارعا وڭ باعا بەرىپ, باستالعان جۇمىستاردى ۋاقتىلى اياقتاۋعا تاپسىرما بەردى.
