Egypt Today-ءدىڭ حابارلاۋىنشا, الەمدەگى ەڭ ءىرى كونتەينەرلىك كەمەلەردىڭ ءبىرى Ever Given روتتەردامنان قايتىپ كەلە جاتىر. 20 تامىزدا سۋەتس كانالى ارقىلى ءوتۋى كەرەك. كانال بويىنداعى جول 10-12 ساعاتتى الادى.
بۇل جولى 400 مەترلىك كەمە تاعى دا باعىتىنان جاڭىلىپ, قىستىرىلىپ قالماۋى ءۇشىن كانال بويىمەن ەكى بۋكسيرمەن الىپ جۇرەدى.
2021 جىلى 23 ناۋرىزدا Ever Given كەمەسى سۋەتس كانالىنىڭ وڭتۇستىك بولىگىندە قىستىرىلىپ قالىپ, التى كۇن بويى كانالدى تولىعىمەن جاۋىپ قالدى. سالدارىنان 400-دەن استام كەمە ۋاقىتىنان كەشىكتى. بۇل جاعداي ءتۇرلى كومپانيالارعا ۇلكەن شىعىن اكەلدى. سۋەتس كانالى اكىمشىلىگىنىڭ مالىمەتى بويىنشا, «كەپتەلىستىڭ» سالدارىنان مىسىر كۇندەلىكتى 14 ميلليون دوللارعا جۋىق شىعىنعا باتقان.
مىسىردىڭ ەكونوميكالىق سوتى كەمەنى كەلتىرىلگەن زالالدىڭ ورنىن جانە قۇتقارۋ وپەراتسياسىنىڭ قۇنىن وتەگەنگە دەيىن قاماۋعا الۋ تۋرالى شەشىم شىعاردى. 7 شىلدەدە كەمە كانالدان شىعىپ, سۋەتس كانالى اكىمشىلىگى مەن كەمە يەسى بىتىمگەرشىلىك كەلىسىمگە كەلگەننەن كەيىن روتتەردامعا قاراي بەت الدى.
