مەملەكەت باسشىسى نۇرسۇلتان نازارباەۆ بۇكىلالەمدىك تحەكۆوندو فەدەراتسياسىنىڭ پرەزيدەنتى چۋنگۆون چومەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسى نۇرسۇلتان نازارباەۆ بۇكىلالەمدىك تحەكۆوندو فەدەراتسياسىنىڭ پرەزيدەنتى چۋنگۆون چومەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى.
قازاقستان پرەزيدەنتى بۇكىلالەمدىك تحەكۆوندو فەدەراتسياسى باسشىسىنىڭ ساپارى ەلىمىزدەگى بۇل سپورت ءتۇرىنىڭ دامۋىنا ودان ءارى سەرپىن بەرەتىنىن ايتىپ, ريزاشىلىعىن ءبىلدىردى.
– قازاقستاننىڭ تحەكۆوندو فەدەراتسياسى بۇكىلالەمدىك تحەكۆوندو فەدەراتسياسى قۇرامىنا 1993 جىلى كىردى. وسى كەزدەن باستاپ سپورتتىق جەكپە-جەكتىڭ وسى ءتۇرى ءبىزدىڭ ەلدە قارقىندى دامي باستادى, 11 مىڭ ادام بەلسەنە اينالىسۋدا, 250-گە جۋىق جاتتىقتىرۋشى جۇمىس ىستەيدى. قازاقستاندىق سپورتشىلار الەمدىك جارىستاردا 9 قولا مەدال يەلەندى, ال ازيالىق دەڭگەيدە التىن مەدال دا بار. بۇل تاماشا سپورت ءتۇرى ودان ءارى دامي بەرەدى دەگەن ءۇمىتىمىز زور. سەبەبى, ول جاستاردى تاربيەلەۋگە جانە سالاماتتى ءومىر سالتىن ناسيحاتتاۋعا باعىتتالعان. مەن ءسىزدىڭ ساپارىڭىز جاستاردىڭ نازارىن وسى سپورت تۇرىنە ودان ءارى اۋدارا تۇسەدى دەپ سەنەمىن, – دەدى نۇرسۇلتان نازارباەۆ.
بۇعان قوسا, مەملەكەت باسشىسى ءبىزدىڭ ۇلتتىڭ جاۋىنگەرلىك ونەرگە بەيىم ەكەنىن, قازاقستان جەكپە-جەكتىڭ وزگە تۇرلەرى جانە سپورتتىڭ كۇش-قۋاتقا نەگىزدەلگەن تۇرلەرى بويىنشا جاقسى كورسەتكىشتەرگە قول جەتكىزگەنىن اتاپ ءوتتى.
چۋنگۆون چو قابىلداۋ ءۇشىن العىسىن ايتىپ, قازاقستانعا تحەكۆوندونىڭ ودان ءارى تانىلا تۇسۋىنە باعىتتالعان ساپارىنىڭ ماڭىزدى ەكەنىنە توقتالدى.
– مەن ءسىزدىڭ قازاقستاندا جانە وزگە دە ەلدەردە تحەكۆوندونى دامىتۋداعى بىلىمدىلىگىڭىزگە ءتانتى بولدىم. بۇگىندە قازاقستان – تحەكۆوندو بويىنشا جارىستاردا وليمپيالىق ويىنداردىڭ تۇراقتى قاتىسۋشىسى جانە ءسىزدىڭ ەلدەرىڭىزدىڭ الەۋەتى زور. تحەكۆوندو قازاقستاندا جەدەل دامۋدا, ال سپورتشىلارىڭىز سپورتتىڭ بارلىق ءتۇرى بويىنشا زور تابىسقا جەتۋدە. مەن جۋىق ارادا مەملەكەت باسشىسىنىڭ قولداۋىمەن سىزدەردىڭ سپورتشىلارىڭىز وليمپيادانىڭ التىن مەدالىن يەلەنەدى جانە الەم بىرىنشىلىكتەرىندە جەڭىسكە جەتەدى دەپ سەنەمىن. قازىرگى ۋاقىتتا تحەكۆوندو سپورتتىق جەكپە-جەكتىڭ قارقىندى دامىپ كەلە جاتقان ءتۇرى بولىپ سانالادى. مىسالى, الەمدە شامامەن 80 ملن. ادام شۇعىلدانادى, ال بۇكىلالەمدىك تحەكۆوندو فەدەراتسياسىنا 205 ەل مۇشەلىككە وتكەن, – دەدى چۋنگۆون چو.
سونىمەن قاتار, كەزدەسۋدە جالپى جانە سپورتتىق مەديتسينا سالاسىنداعى قازاقستان مەن كورەيا رەسپۋبليكاسى اراسىنداعى ءوزارا ىقپالداستىق, سونداي-اق, دەنساۋلىق ساقتاۋ سالاسىنىڭ الەمدىك ستاندارتتارىن ەنگىزۋ جونىندەگى جوبالاردى ىسكە اسىرۋ ماسەلەلەرى قارالدى.
سوڭىندا چۋنگۆون چو نۇرسۇلتان نازارباەۆقا تحەكۆوندو (WTF) بويىنشا قۇرمەتتى توعىزىنشى دان دارەجەسى بەلگىسىن, سونداي-اق, ءتيىستى بەلبەۋ مەن كيمونونى تاپسىردى.
مەملەكەت باسشىسى بۇل كيمونو الداعى ۋاقىتتا تحەكۆوندو بويىنشا جوعارى دان يەلەنگەن قازاقستاندىق سپورتشىعا تاپسىرىلاتىنىن ايتتى.
