بەينەۋ اۋدانىنا ارنايى بارعان سەناتورلار جەرگىلىكتى ورتا مەكتەپتىڭ جاڭا كورپۋسىنىڭ قۇرىلىس جۇمىستارىنا نازار اۋداردى. جاڭا نىسان ءبىلىم ورداسىنىڭ سىيىمدىلىعىن تاعى 312 ورىنعا كوبەيتەدى. دەپۋتاتتار بۇل جۇمىستىڭ ماڭىزدىلىعىن اتاپ ءوتىپ, جاڭا كورپۋس ءۇش اۋىسىممەن وقىتۋدى جويۋعا مۇمكىندىك بەرەتىنىن, ياعني مۇعالىمدەر مەن وقۋشىلار, سونداي-اق ولاردىڭ اتا-انالارى ءۇشىن ءبىلىم بەرۋ پروتسەسى نەعۇرلىم ىڭعايلى بولاتىنىن جەتكىزدى.
سونىمەن قاتار سەناتورلار اۋداندىق ەمحانادا بولىپ, مەديتسينا قىزمەتكەرلەرىمەن كەزدەستى. قازىرگى تاڭدا ەمحانا جۇكتەمەسىنىڭ شامادان تىس كوپ بولۋى اۋدانداعى ماڭىزدى ماسەلەلەردىڭ ءبىرى بولىپ وتىر. ناقتى ايتقاندا, باستاپقىدا ءتورت مىڭ ادامعا ەسەپتەلگەن ەمحانا قازىر 15 مىڭنان استام ناۋقاسقا قىزمەت كورسەتەدى. سوندىقتان كەزدەسۋ بارىسىندا تاعى ءبىر ەمحانا سالۋ ماسەلەسى كوتەرىلدى. دەپۋتاتتار قازىرگى قالىپتاسقان جاعدايدا اۋدان تۇرعىندارى دا, دارىگەرلەردىڭ وزدەرى دە زارداپ شەگەتىنىنە نازار اۋدارىپ, ايماق باسشىلىعىنا اتالعان تۇيتكىلدى تەز ارادا شەشۋدى قولعا الۋ قاجەتتىگىن ايتتى.
سونداي-اق سۇيىندىك الداشەۆ پەن باقتىباي شەلپەكوۆ جەرگىلىكتى ءسۇت كومبيناتىنا باردى. بۇگىندە اتالعان كاسىپورىندا جىلىنا 430 ملن تەكشە مەتر ءسۇت ونىمدەرى وندىرىلەدى. الداعى ۋاقىتتا 1 ملرد تەڭگە ينۆەستيتسيالاۋ ارقىلى كومبيناتتىڭ وندىرىستىك قۋاتىن ارتتىرۋ جوسپارلانىپ وتىر.
ال سەنات دەپۋتاتى ءابدالى نۇراليەۆ جامبىل وبلىسىنىڭ سارىسۋ اۋدانىنا باردى. ساپار بارىسىندا ول كۇيىك – قاراباستاۋ – قاراتاۋ – جاڭاتاس – ساۋداكەنت اۆتوموبيل جولىن قايتا قالپىنا كەلتىرۋ جۇمىستارىمەن تانىستى. سەناتور اتالعان اۆتوجولدىڭ اۋىل تۇرعىندارى ءۇشىن ماڭىزى زور ەكەنىن اتاپ ءوتتى. سوندىقتان ول مەردىگەرلەر مەن اۋدان باسشىلىعى جوندەۋ جۇمىستارىن ساپالى جۇرگىزۋگە جانە بولىنگەن قاراجاتتى ورىندى جۇمساۋعا باسا ءمان بەرۋ كەرەكتىگىن ايتتى.
بۇعان دەيىن اۋىل تۇرعىندارى وبلىس اۋماعى ارقىلى وتەتىن اۆتوجولداردى جوندەۋگە قوسىمشا قارجى ءبولۋ ماسەلەسىن بىرنەشە رەت كوتەرگەن بولاتىن. سەناتورمەن كەزدەسۋدە رەسپۋبليكالىق بيۋدجەتتەن 92,3 ملن تەڭگە ءبولۋ تۋرالى شەشىم قابىلدانعانى ايتىلدى. ول قارجى شىعاناق جانە جايلاۋكول اۋىلدارىنىڭ كىرمە جولدارىن جوندەۋگە جۇمسالادى.
سونىمەن قاتار ءابدالى نۇراليەۆ جاڭاتاس قالاسىندا سالىنىپ جاتقان كوپپاتەرلى تۇرعىن ۇيلەردىڭ قۇرىلىس الاڭىنا باردى. قازىرگى تاڭدا تۇرعىن ءۇي كەزەگىندە 1676 ادام تۇر. ولاردىڭ قاتارىندا جەتىمدەر, كوپبالالى انالار, از قامتىلعان وتباسىلار جانە بيۋدجەتتىك ۇيىمداردىڭ قىزمەتكەرلەرى بار. سالىنىپ جاتقان ۇيلەر بيىل پايدالانۋعا بەرىلەدى. اۋدان اكىمى مۇقتاج ازاماتتاردى تۇرعىن ۇيمەن قامتاماسىز ەتۋ جۇمىستارى جالعاساتىنىن جەتكىزدى.
سونداي-اق سەناتور ساپار بارىسىندا گاز قۇبىرلارىنىڭ قۇرىلىس بارىسىمەن تانىستى. دامۋ جوسپارىنا سايكەس الداعى 2 جىلدا اۋداندا 14 ەلدى مەكەن گازداندىرىلادى.
