قازاقستان تاۋەلسىزدىك العان جىلدارى ىشىندە سىندارلى كەزەڭدى باستان كەشىردى. ەلدىڭ ەكونوميكاسىن دامىتۋ ماقساتىندا جاڭا باعدارلامالار قابىلداندى. وسى جۇمىستاردىڭ ساباقتاسى رەتىندە جاقىندا مەملەكەت باسشىسى نۇرسۇلتان نازارباەۆ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداۋىن جاريالادى. بۇل تۋرالى Egemen.kz ءتىلشىسى حابارلادى.
بىزگە حابارلاسقان وقىرماندار جانە ولاردىڭ ەلىمىزدىڭ بۇقارالىق اقپارات قۇرالدارى وكىلدەرىنە بەرگەن سۇحباتتارىندا ەلباسىمىزدىڭ جوعارىدا اتالعان جولداۋىنا جىلى لەبىزىن ءبىلدىردى. ەلدى ءبىر ماقساتقا ۇندەيتىن, جاڭعىرۋدىڭ سارا جولى – «قازاقستان-2050» ستراتەگياسىن باستى قۇجات رەتىندە قابىلداپ, بىرىگىپ كۇش بىرىكتىرۋگە نيەت ءبىلدىرىپ وتىر.
بەيبىت مامىراەۆ, ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ رەكتورى:
ەلباسى ادەتتەگىدەي ءوزىنىڭ جولداۋىندا الەۋمەتتىك سالاعا زور نازار اۋداردى. ونىڭ ىشىندە قوعامنىڭ ءارتۇرلى ساتىلارى بار. عالىمدار, ستۋدەنتتەر, وقۋشىلار بولسىن, زەينەتكەرلەر مەن جۇمىسكەرلەر بولسىن دەگەندەي قوعامنىڭ ءار مۇشەسى بولاشاقتا ءوزىنىڭ دامۋ جولدارىن وسى جولداۋدان ايقىن كورە الاتىنىنا سەنىمدىمىن. ارينە, الدىمىزداعى باستى ماقسات – دامىعان 30 ەلدىڭ قاتارىنا قوسىلۋ. ول اينالىپ كەلگەندە ءومىردىڭ ساپاسىن جوعارى كوتەرۋ.
ساعىندىق ءجۇمادىل, اكتەر:
ءار ونەر ۇجىمى ءان ايتساق تا, قويىلىم قويساق تا, «ماڭگىلىك ەل» تاقىرىبىنا بايلانىستىرىپ, جاس ۇرپاقتى پاتريوتيزمگە باۋلۋىمىز كەرەك دەپ ويلايمىن. ەڭ باستىسى, كوشباسشىمىز ءوزىنىڭ جولداۋىندا وسى باعداردى ايقىنداپ كورسەتىپ بەردى. ەندى تەك قانا سوعان ات سالىسىپ, جۇمىس جاساۋمىز ءتيىس.
الەكساندر ماشكەۆيچ, ەۋرازيالىق ءوندىرىس توبىنىڭ باسشىسى:
مەملەكەت باسشىسىنىڭ جولداۋىندا شاعىن جانە ورتا بيزنەستىڭ قۋاتتىلىق دارەجەسىن ارتتىرۋعا قاتىستى ايتىلعان تاراۋ بار, ونى ورىنداۋعا دايىنبىز. سوندىقتان بولاشاققا سەنىمدىلىكپەن قارايمىز. بىزدە اليۋميني كلاستەرىن دامىتۋعا زور قىزىعۋشىلىق تۋىنداپ وتىر. ول ەلىمىزگە قوسىمشا كىرىس اكەلەدى.
ءاليا يۋسۋپوۆا, كوركەم گيمناستيكادان ۇلتتىق قۇرامانىڭ باس باپكەرى:
ماعان جولداۋدا قامتىلعان بارلىق ماسەلەلەر ۇنادى. سونىڭ ىشىندە بالالار باقشاسى دا نازاردان قاعىس قالعان جوق. بۇل رەتتە جاڭا بالالار باقشاسى پايدالانۋعا بەرىلسە, ۇيىندە كوپ بالاسى بار انالارعا وتە جاقسى كومەك دەپ ويلايمىن. ويتكەنى, ول جەردە بالعىنداردىڭ تانىم-تۇسىنىگى كەڭەيەدى. سپورتپەن اينالىسۋىنا دا مۇمكىنشىلىك بار.
جامال جاقسىلىققىزى, استانا قالاسىنداعى №4 ەمحانانىڭ اعا مەيىربيكەسى:
پرەزيدەنتىمىز ءار جىلعى جولداۋىندا حالقىمىزدىڭ دەنساۋلىعىنا قاتىستى ماسەلەنى كوتەرىپ كەلەدى. بۇل جولى مىندەتتى مەديتسينالىق ساقتاندىرۋدى ەنگىزۋدى زەرتتەۋ قاجەتتىگىن اتاپ ءوتتى. ءاربىر ازامات سپورتپەن شۇعىلدانىپ, دۇرىس تاماقتانسا, پروفيلاكتيكالىق تەكسەرۋدەن الدىن الا وتسە, اۋرۋدىڭ الدىن العان بولار ەدى. سايىپ كەلگەندە, دەنساۋلىقتى كۇتۋ وزىمىزگە بايلانىستى دەر ەدىم.
دايىنداعان: ءامىرحان الماعانبەتوۆ.
دەرەككوز: Egemen.kz, «حابار» تەلەارناسى.
فوتو: اقوردا. kz.
