«ونداي باسسەين
ورتالىق ازيادا جوق...»
دەرەك بويىنشا, وبلىستا 667 مىڭنان اسا ادام نەمەسە جالپى حالىق سانىنىڭ 32 پايىزى دەنەشىنىقتىرۋ جانە سپورتپەن جۇيەلى تۇردە اينالىسادى ەكەن. اسىرەسە جاستار اراسىندا سپورتقا دەگەن قىزىعۋشىلىق باسىم. ماسەلەن, وڭىردە 3 مىڭنان اسا سپورت نىسانى مەن 43 سپورت مەكتەبى جۇمىس ىستەسە, وندا 42 مىڭعا جۋىق بالا سپورتپەن شۇعىلدانادى.
بيىل وبلىستىڭ سپورتسۇيەر قاۋىمى ءۇشىن جاعىمدى جاڭالىق كوپ بولىپ تۇر. سونىڭ ءبىرى – تالدىقورعان قالاسىندا اشىلعان ءجۇزۋ باسسەينى. ورتالىق ازيادا تەڭدەسى جوق دەپ سانالاتىن بۇل ءجۇزۋ باسسەينى 570 ورىنعا ارنالعان, ەكى قاباتتى ەڭسەلى عيماراتتان تۇرادى. مۇندا جاس سپورتشىلار سۋ دوبى, سۋعا سەكىرۋ, اكۆااەروبيكا سياقتى ءجۇزۋدىڭ بارلىق تۇرىمەن جاتتىعا الادى. بولاشاقتا عيماراتتىڭ حالىقارالىق جارىستار وتكىزۋگە دە مۇمكىندىگى بار ەكەن.
– ەلباسى مەن پرەزيدەنتتىڭ ەلىمىزدەگى سپورتقا كوڭىل ءبولۋ تۋرالى تاپسىرمالارىنا سايكەس بۇگىندە الماتى وبلىسىندا13 دەنە شىنىقتىرۋ-ساۋىقتىرۋ كەشەنى جۇمىس ىستەپ تۇر. جاقىندا وبلىس ورتالىعىنان ورتالىق ازيادا تەڭدەسى جوق ءجۇزۋ باسسەينىنىڭ قۇرىلىسىن اياقتاپ, قولدانىسقا بەردىك. بۇل نىسان وسكەلەڭ ۇرپاقتى سپورتقا باۋلۋعا ۇلكەن سەرپىن بەرەدى جانە وسى جەردەن ەلىمىزدىڭ داڭقىن شىعاراتىن مىقتى سپورتشىلار تاربيەلەنىپ شىعادى دەپ سەنەمىن, – دەيدى وبلىس اكىمى اماندىق باتالوۆ.
قازىر باسسەيننىڭ اشىلعانىنا تالدىقورعاندىق جاسوسپىرىمدەر بار ىنتاسىمەن قۋانىپ ءجۇر. ماسەلەن, تالدىقورعانداعى №14 مەكتەپتىڭ 11-سىنىپ وقۋشىسى يسلام كاريموۆ 5 جىلدان بەرى جۇزۋمەن اينالىسادى ەكەن. ول مۇنداي ۇلكەن ءجۇزۋ ورتالىعىنا كەلىپ, دايىندىعىن شىڭداۋعا مۇمكىندىك تۋعانىنا ءدان ريزا.
– جاسىم – ون التىدا. جۇزۋگە دەن قويا باستاعان 5 جىلدىڭ ىشىندە ءبىرشاما جەتىستىككە جەتتىم. اشىق سۋدا جۇزۋدەن قازاقستان چەمپيونى بولدىم, سپورت شەبەرىمىن. جۇزۋمەن كاسىبي تۇردە اينالىسامىن دەپ شەشتىم. بۇگىنگە دەيىن ءبىزشاعىن «وركەن» سپورت كەشەنىندە جاتتىعاتىن ەدىك. ەندى وسىنداي زاماناۋي ءىرى باسسەيندە جاتتىعۋىمىزعا زور مۇمكىندىك تۋدى. مۇنداعى باسسەين ۇزىندىعىنىڭ 52 مەتر بولۋىۇزاققا جۇزۋدەگى شىدامدىلىقتى شىڭدايدى. مەملەكەت جاستارعا سپورتپەن اينالىسۋعا بارلىق جاعدايدى جاساپ وتىر. بۇگىن ەرەكشە قۋانىشقا كەنەلىپ تۇرمىز. وسىنداي باسسەين سالىنعاننان كەيىن سۋدا جۇزۋگە قىزىعۋشىلىعى ارتاتىن بالالار كوبەيەدى دەپ ويلايمىن, – دەيدى يسلام.
جالپى, وسى زاماناۋي ءجۇزۋ باسسەينى 3,8 گا جەردى الىپ جاتىر. بۇل عيماراتتىڭ جالپى اۋدانى 13 مىڭ شارشى مەتردەن اسادى. 570 ورىنعا ارنالعان ءجۇزۋ باسسەينىنىڭ قۇرىلىسىنا 11,4 ملرد تەڭگەدەن استام قاراجات جۇمسالعان. عيماراتتىڭ سىرتقى كەيپى تەڭىزدە ءجۇزىپ جۇرگەن الىپ بالىقتى ەلەستەتەدى. مۇندا 3 باسسەين بار, سونىڭ ىشىندە ەڭ ۇلكەنىنىڭ ۇزىندىعى – 52 مەتر, ەنى – 25 مەتر. بۇل عيماراتتا نيەت بىلدىرگەندەر سۋ دوبى, سۋعا سەكىرۋ, اكۆا اەروبيكا سياقتى ءجۇزۋدىڭ بارلىق تۇرىمەن جاتتىعا الادى.
باسسەين جىل بويى ءتۇرلى دەڭگەيدەگى سپورتتىق جارىستار وتكىزۋگە, سول سياقتى ازاماتتاردى سالاماتتى ءومىر سالتىنا بەيىمدەۋگە, بالالاردى جۇزۋگە ۇيرەتۋگە ارنالعان. مۇمكىندىگى شەكتەۋلى جاندارعا دا بارلىق جاعداي جاسالعان. الداعى ۋاقىتتا ترياتلون, بايداركادا ەسۋ, كانوە جانە باسقادا بولىمدەر اشۋ جوسپاردا بار. جالپى, وسى باسسەين ارقىلى تالدىقورعاننىڭ بولاشاقتا سۋ سپورتىنىڭ ورتالىعى بولۋىنا مۇمكىندىگى بار.
وليمپيادا جۇلدەگەرلەرى باسپانالى بولدى
جاقىندا توكيو وليمپياداسىنا قاتىسىپ, جۇلدەگەر بولىپقايتقان جەتىسۋلىق سپورتشىلارعا قۇرمەت كورسەتىلدى. ولارعا وبلىس اكىمى اماندىق باتالوۆ پاتەر كىلتىن تابىستادى. مۇنداي قۇرمەتكە اۋىر اتلەتيكادان جازعى وليمپيا ويىندارىنىڭ قولا جۇلدەگەرلەرى زۋلفيا چينشانلو مەن يگور سون يە بولدى.
– سىزدەردىڭ سپورتتاعى جەتىستىكتەرىڭىزدى ەل پرەزيدەنتى جوعارى باعالاپ, مەملەكەتتىك ناگرادا بەردى. زۋلفيا ءىى دارەجەلى «دوستىق», يگور «قۇرمەت» وردەندەرىمەن ماراپاتتالدى. وليمپيا ويىندارىنىڭ قولا جۇلدەسى – ەلىمىزءۇشىن جەتىستىك. سوندىقتان سەندەر ءبىزدىڭ ەلىمىزدىڭ ماقتانىشىسىزدار. سىزدەرگە بارلىق قاجەتتى مەملەكەتتىك قولداۋ تۇراقتى تۇردە كورسەتىلەدى. ءبىز ءوز تاراپىمىزدان كومەكتەسۋدى جانە قولداۋدى جالعاستىرامىز. بۇگىن مەن سىزدەردى جەتىسۋلىقتار اتىنان ەلەۋلى جەڭىسپەن قۇتتىقتايمىن جانە جاڭا سپورت شىڭدارىن باعىندىرۋلارىڭىزعا تىلەكتەسپىن, – دەگەن اماندىق باتالوۆ سپورتشىلارعا وبلىس اكىمىنىڭ قۇرمەت گراموتاسى جانە پاتەر كىلتتەرىن تابىس ەتتى.
ماراپاتتاۋ كەزىندە زۋلفيا چينشانلو ءۇش بولمەلى پاتەردىڭ, ال يگور سون ەكى بولمەلى پاتەردىڭ كىلتىن الدى. سپورتشىلاردىڭ جاتتىقتىرۋشىلارى دا ماراپاتتان قۇرالاقان قالمادى. ولاردىڭ ارقايسىسىنا 2 ملن تەڭگە تۇراتىن قارجى سەرتيفيكاتتارى تاپسىرىلدى. جيىندا وليمپيا ويىندارىنىڭ قولا جۇلدەگەرى, اۋىر اتلەتيكادان 2019 جىلعى الەم چەمپيوناتىنىڭ كۇمىس جۇلدەگەرى يگور سون سپورتشىلارعا كورسەتكەن كومەگى مەن قولداۋى ءۇشىن العىسىن ءبىلدىردى.
– سپورتشىلارعا بارلىق جاعىنان كورسەتكەن كومەگى ءۇشىن ەل پرەزيدەنتىنە شىنايى ريزاشىلىعىمدى بىلدىرەمىن. ءبىز ءوز تاراپىمىزدان ارتىلعان سەنىمدى اقتاۋعا بار كۇشىمىزدى سالامىز. الدا – ازيا ويىندارى. ءبىز ولارعا جوعارى ماراپاتتارعا يە بولۋ ءۇشىن بەلسەندى تۇردە دايىندالامىز, – دەدى ول.
سونداي-اق قازاقستانعا ەڭبەك سىڭىرگەن سپورت شەبەرى, حالىقارالىق دارەجەدەگى سپورت شەبەرى, يگور سوننىڭ جاتتىقتىرۋشىسى ۆلاديمير سەدوۆ تە ريزاشىلىعىن ءبىلدىردى:
– مەن 13 جىل بويى سپورت ينتەرناتىندا جاتتىقتىرۋشى بولىپ جۇمىس ىستەپ كەلەمىن. ەندى وليمپيا ويىندارىنىڭ قولا جۇلدەگەرى اتانعان تاعى ەكى تاربيەلەنۋشىم بار. ءبىرىنشىسى – كارينا گوريچەۆا, ەكىنشى – يگور. مەن بۇعان وتە قۋانىشتىمىن. جاتتىقتىرۋشىلار اتىنان سپورتشىلارىمىزدىڭ تىڭعىلىقتى جاتتىعۋى ءۇشىن جاسالعان جاعدايعا العىس ايتقىم كەلەدى. ءبىز ەلگە جانە ايماققا مەدال اكەلۋ ءۇشىن جۇمىستى جالعاستىرامىز, – دەدى جاتتىقتىرۋشى.
كەزدەسۋ بارىسىندا سپورتشىلار الداعى جوسپارلارىمەن ءبولىستى, وزدەرىنىڭ ماقساتتارى مەن سپورتتىق دايىندىق ەرەكشەلىكتەرى تۋرالى ايتتى. ال ءوڭىر باسشىسى اماندىقباتالوۆ الماتى وبلىسى چەمپيونداردىڭ تۇتاس گالاكتيكاسىن تاربيەلەپ شىعارعانىن, بۇل مەملەكەتتىڭ جان-جاقتى قولداۋىنىڭ ارقاسىندا مۇمكىن بولعانىن تىلگە تيەكەتتى.
– ءبىز جاقىندا ورتالىق ازيادا بالاماسى جوق وليمپيادالىق باسسەيندى پايدالانۋعا بەردىك. قازىردىڭ وزىندە وعان 850 بالا جۇزۋگە جازىلدى. بولاشاقتا ولاردىڭ كوپشىلىگى ءبىزدى جەتىستىكتەرىمەن, جەڭىستەرىمەن قۋانتادى دەپ ويلايمىن. ەلباسىنىڭ ايماقتاردا 100 سپورتتىق-ساۋىقتىرۋ ورتالىعىن اشۋ تۋرالى تاپسىرماسىنا سايكەس, وبلىستا 13 سپورتتىق-ساۋىقتىرۋ ورتالىعى پايدالانۋعا بەرىلدى. تاعى بەسەۋى جاقىندا ىسكە قوسىلادى. ولاردىڭ بىرەۋى – شالعايداعى بالقاش وڭىرىندە. قازىردىڭ وزىندە پايدالانۋعا دايىن. بۇل رەتتە ءبىز سپورت عيماراتتارىن, ماتەريالدىق-تەحنيكالىق بازانى رەتتەۋگە ەرەكشە نازار اۋدارامىز. مۇنىڭ ءبارى بۇقارالىق سپورتتى دامىتۋعا جانە جاڭا تالانتتاردى انىقتاۋعا ىقپال ەتىپ, ناتيجە بەرۋدە, – دەدى وبلىس اكىمى اماندىق باتالوۆ.
قالماحانبەت مۇقامەتقالي, «Egemen Qazaqstan»
