بۇل تۋرالى اقش پرەزيدەنتى دجو بايدەن ABC تەلەارناسىنا بەرگەن سۇحباتىندا مالىمدەدى. ول وسى ايدىڭ اياعىنا دەيىن اۋعان جەرىنەن بارلىق امەريكالىقتى شىعارىپ ۇلگەرمەسە, مەرزىمدى ءارى قاراي سوزاتىنىن ايتتى.
اق ءۇي باسشىسىنىڭ مالىمەتى بويىنشا 15 مىڭ ءوز ازاماتتارىنان باسقا 65 مىڭ اۋعان تۇرعىنى قۇراما شتاتتارعا جەتكىزىلۋى ءتيىس. سونداي-اق بايدەن ەگەر ەۆاكۋاتسيا 31 تامىزعا دەيىن اياقتالسا, بارلىق اسكەر اۋعانستاننان كەسىمدى مەرزىمدە كەتەتىنىن اتاپ ءوتتى.
«اۋعانستاننان جايدان جاي, ىڭ-شىڭسىز كەتۋگە بولاتىن ەدى دەگەن يدەياعا سەنبەيمىن. اسكەرىمىزدى شىعارۋدىڭ ءتۇبى وسىنداي الاساپىرانعا ۇرىندىراتىنى بەسەنەدەن بەلگىلى ەدى. بىراق ءبىز تالىپتەر ەلدەن كەتكىسى كەلەتىن ادامداردى ۇستاپ, جىبەرمەي قويادى دەپ كۇتپەدىك جانە اقش ساربازدارىن سول جاقتا قالدىرۋ تۋرالى شەشىم قابىلداساق, وندا بۇدان دا كوپ اسكەر كىرگىزۋگە ءماجبۇر بولاتىن ەدىك», دەپ مالىمدەدى اقش پرەزيدەنتى دجو بايدەن.
